Luka

11 Ddikpa cha Yesu ngʉ sala nji ddikpa ngana. Føro b’lo ke d’ya sala njidha tso nari goti, ke unakpa kana ddikpa ke pongʉeri ke dho: “Bboke, addi sala njidha nga ko dho, Yohani ddingʉe sala njidha nga ndi unakpa dho nari bbai.”

2 Føri dho ke pongʉeri kpa dho: “Sala ni nji ró, anipori ɨ: ‘Baba, aliri ni ró dho tsetse.* Aliri nidzá Pidhinga si. 3 Krʉ ddo ró, abbʉ kodhó lo u fø dyinga dho ná nyo ko nyó. 4 Ndirigoti anji kodhi chenga zø, dhonalo ko nganga maddi adi kodhó ddeni kʉ nǎ ná ndrŭ zø njinji; føri goti nzɨ bbari ko tsu mbudha na.

5 Føri goti ke pongʉeri kpa dho: “Loroji na, ni kana ddikpa ke rá ndidzá kau bba kuna saa sita na ndirigoti ke pori ke dho: ‘Madzá kau, awø mukati ro gbo ma dho, 6 dhonalo madhó ddikpa kau si kpadjo go ma bbá danga nǎ ro ndirigoti ke nyó ma bbʉ ná ritsi ro nga kʉ ri. 7 Ro, ke ngʉngʉe logoti adzá ro: ‘Nzɨ ngbʉ ma djǒ nanga, dzaitso le tø b’lo ndirigoti ko kʉ ra djó madzá nzø ma na. Ma ro nzá ka ma dani ndiro ma bbʉ ddikpa ritsi ro ma ni dho ddi d’e ri.’ 8 Ma ripo ni dho, rie nzɨ ma ke dani ndi bbʉ ritsi ke dho, ke kʉ ndidhó kau nari dho ri ró, ke ve dani da dhé, ke b’a ndi ró nzɨ ndi do nji ro nari dho ndirigoti ndi bbʉ ke dhó lo u ná ritsi krʉ ke dho. 9 Føri dho, ma ripo ni dho, anidi ri kóko ndirigoti le si ri bbʉbbʉ ni dho, anidi ri nene ndirigoti ni si ri baba, anidi dzaitso d’od’o ndirigoti le si ri tso pʉpʉ ni dho. 10 Dhonalo ritsi kó ná le adi ri baba, ritsi ne ná le adi si ri ro si, ndirigoti dzaitso d’o ná le dho le si ri tso pʉpʉ. 11 Bbʉbbʉ dhé, ni kana ngbá nzø ba i ká ka ndi bbʉ su ngba dhona njati ngba kó bbè ndi tso ró? 12 Inga ngba kó ø-bbi ró, ndi bbʉ ranga ngba dhona? 13 Nì mai ni kʉ che ro, ni adi bblo ritsi bbʉ nidhi nzø dho. Nde, ra nǎ Baba ká ka ndi bbʉ roho takatifu gʉ ngbabø ndi tso ri kó ná ndrŭ dho!”

14 Luti Yesu pʉngʉe ddikpa ke tso ngʉ adi chɨni dho ná gó ke nǎ ro. Gó vʉ ke nǎ ro nari goti, ke tingʉe lo ti, ná føri kengʉe birobiro kʉ ná ndrŭ nanga ke. 15 Ro, nja ndrŭ ngʉ ripo: “Fø ke gó di, gó djó bbonga Belzebuli* dhó kpakpanga na.” 16 Ndiro ndima mbu ke d’e nja ndrŭ ngʉ ripo ke njí ra nǎ ro si ná ddikpa ddù ndima dho. 17 Ke chungʉe kpadhó ngaddidha chu nari dho, ke pongʉeri kpa ni: “Ddikpa pidhinga nanga ndoni ndó ró, ri tso adi d’ød’ø, ndirigoti ddikpa dza nanga ndoni ndó ró, ri adi bʉni bʉ.” 18 Føri bbai, njati Shetani di hwini ndi tso ró i ró, føro ká kedhó pidhinga ka ndi tøni ngbaribbai? Dhonalo ni ripo ma gó di Belzebuli dhó kpakpanga na. 19 Njati rie ma gó di Belzebuli dhó kpakpanga na ri ró, nde, ni ddui ká adi gó di ie dhó kpakpanga na? Ri kʉ føri dzá lo dho i, ni ddui si kʉ lod’i ni djo ri. 20 Ro, njati rie Mungu thó-kpa chulu ma gó pʉ ri ró, føri na mana kʉ Mungu dhó Pidhinga si bbʉbbʉ ni kʉ ná ngana. 21 Kpakpa kʉ ndirigoti là njidha dhi ritsi kʉ dhó ná ke di ndibbá nga b’ob’o ró, fø ke dhó ritsi adi di b’o. 22 Ro, ke djolu kʉ kpakpa ná ke si ke tso ro ndirigoti ke sisi ke djolu ró, ke adi ke thí ke e li djo ná là dhi fø ritsi sø krʉ ndirigoti ke adi ri ndo ndrŭ dho. 23 Ddikpa ke é ma laidjó nga ró, fø ke tøni ma tso ró ndirigoti ddikpa ke di ri tso nju ddinga ma na nzá ró, fø ke ri nanga plipli.

24 “Gó vʉ ddikpa ke nǎ ro ró, ri adi d’yá nga dda kʉ ná ngalu ndi ronga chʉdha dhi nga ndi ne ro. Ro, ri ba fø di ná nga ro nzá ró, ri adi ripo: ‘Ma ngʉngʉ ma vʉe nǎ ro ná dza na.’ 25 Ro, ri ngʉ ró ri adi si dza ro vii le tsu ndi nanga ro ndirigoti bblo le thɨ ndi nǎ nga ro. 26 Føro ri adi ra bbo tsɨ sani ndi djolu ná gó ki dzi 7 ndi kina. B’lo ndima tsu fø dza na ró, ri adi di føga ndirigoti fø ke dhó hali gʉ adi sani bbo pli anziro nga djolu.”

27 Fø lo ke ngʉ po ro, ddikpa isɨle jøngʉe ndi nanga birobiro kʉ ná ndrŭ kana ro ɨ: “Hwè na kʉ nari kʉ, ni d’u ndi zz nǎ ndirigoti ni njʉ ba ná le.” 28 Ro, ke pongʉeri: “Nga, føri rɨngana, hwè na kʉ nari kʉ Mungu dzá lo rr ndirigoti njínji ri na ná ndrŭ.”

29 B’lo birobiro kʉ ná ndrŭ gba ndima tso nari goti, ke ngangʉe ɨ ndi ripo nari tso: “I ri kʉ che kʉ ná gø; kpa ddù ne, ro kpa nzɨ si ddikpa ddù ro ma nja ddi ri, rie nga Yona dho njingʉeni ná ddù dhé ri ró. 30 Dhonalo, ddiddi Yona ngʉngʉe alama Ninawi nǎ ndrŭ dho nari bbai, ndrŭ Ddù maddi sie alama i gø dho. 31 Lod’idha dhi ddo dyina agʉnga laidjó isɨ pi ma si dani i gø ma na ddinga ndirigoti le si lod’i kpa djo, dhonalo le singʉe dz’ tso d’ø ná nga nǎ ro Sulemani dhó nyod’yu rrdha dho. Ro, aninja! ni njí kʉ dada Sulemani djolu ná ke. 32 Lod’idha dhi ddo dyina Ninawi nǎ ndrŭ ma si dani i gø ma na ddinga ndirigoti kpa si lod’i kpa djo. Dhonalo Ninawi nǎ ndrŭ dho Yona d’ralo nari goti ndrŭ lengʉe ndima dhó nyi thika le. Ro, aninja! ni njí kʉ ná ke dada Yona djolu. 33 Tala le tø nari goti, nzɨ le adi ri li ru runi ná ngana inga d’yó* tsena ri. Ro, ri le adi li ri dho le thɨ ná ngana ndiro ri í nga adzá tsu ná ndrŭ dho d’e. 34 Le ndí dzá kadha kʉ le nyǒ. Njati ni nyǒ é ddikpa ritsi djó* ró, ni ndí krʉ e kadha nǎ. Ro, ni nyǒ é ddá* ró, ni ndí krʉ e tɨtɨnga nǎ. 35 Ab’o ni ronga ndiro nzɨ ni nǎ kʉ ná kadha ngʉ tɨtɨnga ró. 36 Føri dho, njati ni ndí krʉ é kadha nǎ, ndirigoti ddikpa ri ro ma é tɨtɨnga nǎ nga ró, ri di nga í ddiddi tala adi nga í nari bbai.

37 Fø lo Yesu po nari goti, ddikpa Farisayo nzingʉe Yesu, ke rá nganyo ndi bba. Føri dho, ke tsungʉe ke bba ndirigoti ke dingʉe mesa tso ro. 38 Ro, fø Farisayo nanga kengʉeni, ke njangʉeri Yesu gbo dda* nzá nyo njí nari dho. 39 Ro, Bboke pongʉeri: “Ni Bbafarisayo, ni kopo ma, sani ma na ró arugu nga i ʉʉ, ro ni nanga i lili tamaa ma, ndá le chelo nji nari ma na na. 40 Rrchu ná kpa! Ri ró arugu nga thɨ ná ke i ká thɨ ri nanga maddi nzá? 41 Njati rie njedha dhi ndrŭ dho ni ritsi bbʉ* ri ró, anibbʉ atsɨ ro si ná ritsi, føro nidhó kʉ ná ritsi krʉ sie tse ndi tse ro. 42 Njedha ni dho Bbafarisayo, dhonalo ni adi munanaa dhi tsó ma, peganoni dhi tsó ma, í na le adi zʉ ná njonjo kʉ ná tsó kpari ma na nanga le ndo 10 nari lai ro bbʉ ddikpa. Ro, Mungu dzá chølo ma, jidha ma na i ni bbabba! Føri kʉ nga ringaeni ni di bbʉ ná ritsi, ro nzá ni bba nja ri bba ro. 43 Njedha ni dho, Bbafarisayo, dhonalo sinagogi nǎ ni jiri ni di anziro* kʉ ná kiti djolu ndirigoti ni jiri ndrŭ di ni ronga zʉ soko lu! 44 Njedha ni dho dhonalo ni kʉ nzɨ njani ná kabuli* bbai, nzá nga ndima chu ro, ndrŭ bbi ndi djó ro.

45 Føro, bbo chu Yadha ná kpa kana ddi ke pongʉeri Yesu ni: “Mwalimu, ni ti ná fø lo chulu ni ko nganga ma dhu ddi.” 46 Yesu ngʉngʉe logoti: “Njedha ni dho maddi, bbo chu Yadha ná kpa dhonalo ni li o ná no li ndrŭ djo, ro ni nganga i nzɨ ri ronga ro lø ni thó-kpa ddikpa ri na maddi ri!

47 “Njedha ni dho, dhonalo ni bbanabi dhó kabuli* chi, ro kpa i ni bbui nganga chengʉe! 48 Bbʉbbʉ dhé, ni chu ni bbui njingʉe ná lo bblo, ro i ni ni tso gba kpa njingʉe ná fø lo na dhonalo kpa chengʉe bbanabi, ro ni kpadhó kabuli chichi. 49 Ri kʉ føri dzá lo dho i Mungu pori ɨ ndidzá nyod’yu nǎ: ‘Ma si bbanabi ma, cho le cho ná kpa ma na cho kpa dhi ngana, ro nja kpa, kpa si cheche ndirigoti nja kpa, kpa si nzanza, 50 ndiro dz’ dherr le li ná nga djó ro dzá ju d’rørieni ná bbanabi dzá ju le kó i gø tso d’e, 51 Abeli dzá ju djó ro kpø Zekaria dzá ju djo, mazabahu ma, hekalu ma na kana le hwingʉe ndi ro.’ Bbʉbbʉ dhé ma ripo ni dho, fø lo krʉ le si d’i i gø djo.

52 Njedha ni dho, bbo chu Yadha ná kpa dhonalo ni tu lochudha dhi kle-kpa tu. Ni nganga ma tsu nzɨ ddi ndirigoti ngbà jiri ndima tsu ná ndrŭ ronga tso ma ni chocho ddi.

53 Adzá ro ke vʉ ro nga ndi ná kpa ma, Bbafarisayo ma na ngʉ tsá ke ro bbo ndirigoti kpa ngʉ ke thí nzá bí kʉ ná ngadhudha kpari na, 54 kpa ngʉ mutego li ke nji ndiro ndima lø ke, ke tso nǎ lo chulu d’e.