Luka

18 Føri goti Yesu bbʉngʉe kpa dho ná loroji chulu ke dhongʉeri nari kʉ, kpa dho ringani ndima di nganzi krʉ ddo ró, nzá ndima d’i ji ro. 2 Ke pongʉeri: “Ddikpa vile nǎ ngʉe ná lod’i ná ke nzɨ ngʉ adi Mungu do ro njiri ndirigoti ke nzɨ ngʉ adi heshima ro bbʉ ie dho maddi ri. 3 Fø vile nǎ ngʉe dhe bbá ke dhe ná ddikpa le maddi, ná fø le ngʉ adi si fø ke dhi ngana bí ina, ɨ ndi ripo ro, ‘Ad’i ko kana kʉ ná lo chø kʉ ná chu nǎ, ma soni tso ró ná le na.’ 4 Lod’i ná fø ke gʉngʉe le ngʉ po ná fø lo ndi nji nari bí ina, ro luti ke vengʉe ra riddi ɨ, ‘Nzɨ mai ma adi Mungu do nji inga nzɨ mai ma adi heshima ro bbʉ ie dho ma ro, 5 dhe bbá ke dhe ná i le nzɨ ma thí ndi nzá nari tso ro bbari nari dho, ma rili chølo njini le dho; ndiro le bbá ma dhi ngana ndi si nari tso ndirigoti nzɨ le di ma he si ndidhó fø lo na ró.’” 6 Føro Bboke pongʉeri: “Anirr, nga mai ndi kʉ chølo dhi ke ro, lod’i ná fø ke pongʉe ná fø lo! 7 Nde, Mungu ká ka ndi liri nzá chølo njini ndidzá vʉ ndi vʉ ndirigoti ndi ró dzz dyina ma, kuna ma ná ndrŭ dho, nì ndi kpa tso veve ro? 8 Ma ripo ni dho, ke si rili chølo njini tse kpa dho. Nì mai ri kʉ fø ro, nde ndrŭ Ddù si si ná saa na ká ke si si fø di ná udha ro nì dz’ djó?”

9 Chølo dhi ri ndima nja ndirigoti pá nja ndrŭ bé ná ndrŭ dho ke bbʉngʉe i loroji: 10 “Aro kʉ ná kpa rangʉe sala nji hekalu na, ddikpa ri ngʉe Farisayo ndirigoti ddi ri ngʉe kitas tso nju ná ke. 11 Føro Farisayo tøngʉeni ro, ke ngangʉe ri nzidha tso ɨ, ‘Madzá Mungu jee! ma mbai po ni dho dhonalo kʉ, ma ro nga kʉ nja ndrŭ bbai ri: Føri i kʉ ndrŭ dhó ritsi adi dhʉ ná ndrŭ ma, nga kʉ chølo dhi ri ná ndrŭ ma, uzinifu* nji ná ndrŭ ma, ndirigoti kitas tso adi nju ná afø ke bbai ma nga ddi. 12 Ma adi nyo chi aro ina yenga ddi kana; ma adi ma ba ná ritsi krʉ nanga le ndo kumi nari lai ro bbʉ ddikpa.’ 13 Ro, kitas tso ngʉ adi nju ná ke tøngʉeni da ngana, ke nzɨ ngʉ ji ndi ngbé ndi nyǒ kpali ma røna ddi ri, ro ke ngʉ ndi badjo b’ɨ ɨ ndi ripo ro, ‘Kɨɨ madzá Mungu, anji ma zø, ma kʉ chenga dhi ke ró.’ 14 Ma ripo ni dho, fø ke ngʉngʉe ndi bba chølo dhi ri ndi dho ndi fø Farisayo djolu ro. Dhonalo ngbe ndi ngbé ná ke le si thʉthʉ ndirigoti thʉ ndi thʉ ná ke le si ngbengbe.”

15 Føri goti, ndrŭ ngʉ si ndima dhó rere nzø na ke dhi ngana, nja ke lø nzø ronga d’e, ro ke unakpa nja fø lo ro, kpa ngangʉe nzø tso ndima gʉ nari tso. 16 Ro, Yesu nzingʉe rere nzø ndi dhi ngana ɨ ndi ripo ro: “Anibbari nzø si ma dhi ngana, nzɨ ni mburi ni cho kpa tso dhonalo ra nǎ Pidhinga kʉ ddiddi kpa bbai kʉ ná ndrŭ dho. 17 Bbʉbbʉ dhé ma ripo ni dho, njati ddikpa ke kó Mungu dhó Pidhinga re ngba bbai nzá ró, fø ke ro nzɨ tsu ri na pɨpɨ nanga ri.”

18 Føro, chutso ngʉ adi ddá ná kpa kana ddikpa ke dhungʉeri Yesu tso: “Bblo Mwalimu, ri ká ngani ma njí addu ndiro ma ba cho ró nŭnŭ di ná shinga d’e?” 19 Yesu ngʉngʉe logoti ke dho: “Ni ká ma nzǐ bblo kʉ ná ke addudho? Ddikpa le ro ma kʉ bblo nga, rie nga Mungu ddiro dhé ri ró. 20 Ni chu i yadha chu: ‘Nzɨ nji uzinifu,* nzɨ hwi ndrŭ, nzɨ nji gbʉ, nzɨ d’ya kali dhi lo tso ni lai djo, abbʉ heshima nidzá baba ma dho, nidzá mama na.’” 21 Føro ke pongʉeri: “Føri krʉ kʉ nì ma adi nji madzá jaddanga nǎ ro ná lo.” 22 Fø lo ndi rr nari goti Yesu pongʉeri ke dho: “Nidhó ro tso vʉni ná lo kʉ ddikpa: Ara, ni dzí nidhó ritsi nanga krʉ, nari ni ndó njedha dhi ndrŭ dho, føro ni si kʉ mali ba ra nǎ. Føri goti asi, ni ngʉ ma unake.” 23 Fø lo ndi rr ro, ke thí bʉngʉeni bbo dhonalo kedhó mali ngʉe bbo.

24 Yesu nja fø ke ro, ke pongʉeri: “Mbø kʉ dhó ná ndrŭ dho ri sie kpakpa bbo ndima tsu Mungu dhó Pidhinga na! 25 Bbʉbbʉ dhé, mali dhi ke tsu Mungu dhó Pidhinga na nari kʉ kpakpa pli ngamia da nga le adi ro na ná shendani nyoi lú nari djolu.” 26 Fø lo rr ná kpa dhungʉeri: “Nde, afø ro ká ie ka ndi ve gø?” 27 Ke pongʉeri: “Nzɨ ka ndrŭ dho ná lo adi ka Mungu dho i ka.” 28 Ro, Petro pongʉeri: “Anja! Ko bba kodhi ritsi bba ndirigoti ko ra ni ulu.” 29 Yesu ngʉngʉe logoti: “Bbʉbbʉ dhé ma ripo ni dho, ddikpa ke i bbá ndidhó dza inga ndibbá le inga ndi djoi inga ndidhó gø dhi ndrŭ inga ndidzá nzø Mungu dhó Pidhinga djotsina ró, 30 ke si fø ritsi ba bí bbo njʉ kʉ ná i dz’* djó ndirigoti gosi ná dz’* djó ke si cho ró nŭnŭ di ná shinga ba.”

31 Føro ke tungʉe 12 kʉ ná kpa ngatsotso ndirigoti ke pongʉeri kpa dho: “Anirr di! Ko dji Yerusalemu na ndirigoti ndrŭ Ddù djo bbanabi ndingʉe ná lo krʉ si njini nji. 32 Loroji na, ke si bbʉni ndrŭ tsɨ dhona, kpa si ke gbogbo, kpa si ke dhudhu ndirigoti kpa si sadda hwi ke djo. 33 B’lo ndima dhɨ ke nari goti kpa si ke hwihwi, ro ddo gbo djó ke si gaga.” 34 Ro, kpa nzɨ ngʉ fø lo na mana ro famu ddikpa maddi ri dhonalo fø lo rungʉeni ru kpa ró, ná føri dho kpa nzɨ ngʉ ke po ná fø lo ro famu ri.

35 Chøchø Yesu ngʉ si Yeriko na ro, nga nyǒ kʉ ná ddikpa ke ngʉ di chu tso ró, ndrŭ tso ndi nga kó ro. 36 Ke rrngʉe birobiro kʉ ná ndrŭ da nari ro, ke ngangʉe føri ká kʉ addu ma njini ri nari dhudha tso. 37 Ndrŭ pongʉeri ke dho: “Føri kʉ Nazareti nǎ Yesu da ri!” 38 Føro, ke jøngʉe nga bbò ndi chu na: “Yesu, Daudi Ddù, abe zø ma djo!” 39 Anziro ngʉ ra ná ndrŭ ngʉ tá ke djó ndiro ke go ddi d’e, ro føro i ke vengʉe ndi nanga gʉ jø pli ɨ ndi ripo ro: “Daudi Ddù, abe zø ma djo!” 40 Føro, Yesu tøngʉeni ro, ke pongʉeri le si ke na ndi dhi ngana. Føro ke si ro, Yesu dhungʉeri ke tso: 41 “Ni ká jiri ma njí addu ni dho?” Nga nyǒ kʉ ná fø ke pongʉeri: “Bboke, aliri ma njanga ki vi.” 42 Føri dho, Yesu pongʉeri ke dho: “Anjanga ki vi. Nidzá udha gø ni gø ró.” 43 Føro thei ke njangʉe nga ki vi ndirigoti ke ngangʉe Yesu una ndi ra nari tso, Mungu ndi má ro. Godhé, fø lo ndima nja ro, ndrŭ krʉ bbʉngʉe madha Mungu dho.