Luka
15 Kitas tso nju ná kpa krʉ ma, chenga dhi ndrŭ ma na njungʉe ndima tso Yesu kuso ndiro ndima rr ke d’e. 2 Føro Bbafarisayo ma, nga ndi ná kpa ma na nanga dingʉe nu ɨ ndima ripo ro: “I ke chenga dhi ndrŭ kóko ndirigoti ke ma nganyo kpa ma na.” 3 Føro ke bbʉngʉe i loroji kpa dho: 4 “Njati ni kana ddikpa ke dhó chembø é 100 ndirigoti ri kana ro ddikpa ri vi ró, ká ke ka ndi bbá 99 kʉ ná ri nzá ndi goti ngødja na ndirigoti ndi rá vivi ná ddikpa fø ri ne kpø ri ndi ba ná nga djo? 5 Njati ke ba ri ró, ke adi ri d’u ndi kù djo ndirigoti ke nanga adi jini bbo. 6 Føri goti, abba ke ngʉ ró, ke adi ndidhó bbakau ma, ndi lai ndrŭ ma na tso gbá, ndirigoti ke adi ripo, ‘Aninji hwè ma na ddinga dhonalo ma ba madhó vi vie ná chembø ba.’ 7 Ma ripo ni dho, føri nganga bbai, njati chenga dhi ddikpa ke dhé leni ró, ra nǎ hwè sie bbo, nzá dhó lo uri ndima leni ná 99 kʉ ná ndrŭ djolu.
8 “Inga ddikpa isɨle dhó drakma* é kumi ndirigoti ri kana ro ddikpa ri vi ró, le ká adi tala tø nzɨ ndirigoti ndi tsú ndibbá dza nanga vii ndirigoti ndi ne ri kpø ri ndi ba ná nga djo? 9 Ri le ba ná saa na, le adi ndidzá bbakau* ma, ndibbá nga kuso lú kʉ ná ndrŭ ma na nzǐ ndirigoti le adi ripo: “Aninji hwè ma na ddironga dhonalo madzá vi vie ná drakma* ma ba b’lo.” 10 Ma ripo ni dho, ri kʉ føri bbai i hwè e bbo Mungu dzá malaiká kana njati chenga dhi ddikpa ke leni ró ri.”
11 Føri goti ke pongʉeri: “Ddikpa ke dzá kpetsi nzø ngʉe aro. 12 Føro kpa kana jadda pli kʉ ná ke pongʉeri ndidzá baba ni: “Baba, abbʉ ma dho si che ná ritsi.” Føro ke ndongʉe ndidhó ritsi nanga kpa dho. 13 Sese ddo da nari goti, fø jadda ke ka ndidzá ritsi sø krʉ ndirigoti ke ka ra da ngø na, ná følu ke ka ndidzá ritsi sa krʉ bbe ndi nji nari na. 14 B’lo ke sa ndidzá ritsi krʉ nari goti, ddikpa bbò ù chingʉe fø ngø na ndirigoti ke rangʉe ndi ba nga dhó ritsi ro. 15 Kpø ke rangʉe njí ne fø ngø nǎ ddikpa ke bba, ná fø ke chongʉe ke ndidzá nza gʉ ndidhó djø kpari ronga b’odha dho. 16 Ke jingʉeri ndi nyó djø nyo ná nyo ro ma che, ro ri bbʉ ke dho ná ndrŭ ro nga ngʉeri.
17 Ndi thí kana ke ngʉ ná saa na, ke dingʉe riddi: “Madzá baba dhó njí dhi ndrŭ krʉ i nganyo kpø ndima o lɨlɨ nanga djo, ro i ma dhe ù dho iga! 18 Ma ngʉ madzá baba dhi ngana ndirigoti ma ripo ke dho: “Baba, ma tani ra dho ndirigoti ni dho. 19 Ma ro nzá kaka ni nzi ma ki nidhi dduna ri, ali ma nidzá njí dhi kpa kana ma che.” 20 Ke dangʉeni ndirigoti ke ngʉngʉe ndidzá baba bba. Go ke ngʉe da ro, kedzá baba njangʉe ke ndirigoti ke dzá ri zø njingʉe kedzá baba ro, ke d’angʉe ke dhi ngana ndirigoti ke mbʉngʉe* ke drèe bbo ndi nanga jini ro. 21 Føro ke pongʉeri ndidzá baba dho: “Baba ma tani ra dho ndirigoti ni dho, ma ro nzá kaka ni nzi ma ki nidzá ngba ri.” 22 Ro, kedzá baba pongʉeri ndidhó njí dhi kpa dho: “Anisi bbo d’ani ná rù na lele ni thó ke ro ndirigoti ni thó pete ke thó ro ndirigoti ni thó ss ke kó ro. 23 Anisi gbøgbø ná jadda tsí-kpa na, aniji ri, akonyo nga ndirigoti akonji fete. 24 Dhonalo madzá i ngba dhee dhe ro ke ki ngʉ shi, ke vie vi ro ke ki bani vi. Ndirigoti kpa ngangʉe fete njidha tso.
25 “Fø saa na kedzá sidjó ke ngʉe nza gʉ, ro abba ke ngʉ ngʉ ro, chøchø ke si abba ro, ke rrngʉe dyi ma, bé ma na. 26 Føro ke nzingʉe njí dhi kpa kana ddikpa ke ndiro ndi dhú addu ma njini nari ke tso d’e. 27 Njí dhi fø ke pongʉeri ke dho, ‘Nidhi djona ngʉngʉ ndirigoti nidzá baba ji gbøgbø ná tsí-kpa ke ngʉ shi ndi* kʉ ro nari dho.’ 28 Ro, sidjó ke lú føri kangʉeni ka ndirigoti ke nyingʉe adzá ndi tsu nari nyi. Arugu ndi vʉ ro, ledzá baba ngangʉe ke ró ndi ddoni nari tso ndiro ke tsu adzá d’e. 29 Føro ke pongʉeri ndidzá baba dho: “Anja! Ma njinjí ni dho cho bí nokpa bbai ndirigoti ma nzá d’erie nidhó lo ro gʉ ddikpa maddi ri, føro mai ni nzá d’erie sese ndrrkpa kpali ro ma bbʉ ddi ndiri ko á madhó bbakau ma na d’e ri. 30 Ro, nidhi dduna, krʉ sa nidhó ritsi ndumba kʉ ná isɨ ndrŭ na, ná fø ke si ró thei ni ji gbøgbø ná tsí ke dho.” 31 Føro ke pongʉeri ndidhi dduna dho: “Madzá ngba, ni ma na ko e drrdrrnga djó ro ndirigoti madhó ritsi krʉ kʉ nidzá ri. 32 Ro, ri thoe nga tho ko njí fete ndirigoti ko njí hwè dhonalo nidhi djona dhee dhe, ro ke ki ngʉ shi, ke vie vi, ro ke ki bani vi.’”