Yohani
20 Yenga ddo kana ya kwanza ddo dyi, Maria Magdalene singʉe kabuli* djo bbʉtso kukú, ringʉe go nga kʉ tɨtɨ ro ndirigoti le njangʉeri nari kʉ kabuli* tso ró ngʉe ná dju ngʉe b’lo le tu ndi tu ro. 2 Føro le d’angʉe Simoni Petro ma, Yesu una bbo ke jingʉe ná ke ma na dhi ngana ndirigoti le pongʉeri: “Bboke kpa tutu kabuli nǎ ro ndirigoti ko nzá chu ke kpa li ná nga ro ri.”
3 Føro Petro ma, Yesu una nja fø ke ma na rangʉe kabuli djo. 4 Kpa aro ro krʉ ngangʉe ngø tso, ro Yesu una nja fø ke i d’angʉe pli Petro djolu nari dho, ke singʉe kabuli djo ya kwanza. 5 Ke d’ingʉe ndi nanga ro ke njangʉe nga ri na, ro ke njangʉe rù* dhé, ke ro nzá tsungʉe ri na ri. 6 Føri goti Simoni Petro maddi singʉe ke una ndi ngʉ d’a ro, ke singʉe tsu kabuli na, ro ke singʉe rù* ro dhé. 7 Yesu djǒ ronga tso le chingʉe na ná rù tso nzá le gbangʉe ke ronga tso le ndɨngʉe na ná nja rù na ri, ri tso le kungʉe nari le lingʉe d’i. 8 Yesu una ya kwanza singʉe kabuli djo ná nja fø ke maddi tsungʉe kabuli na ndirigoti ke njangʉe ri ro, ke ungʉeri u. 9 Kpa nzá d’engʉe ndi ndini ná lo pongʉeri ke dho ringani ndi gaga bʉ ndrŭ kana ro nari ro famu ri. 10 Føri dho ke una fø kpa ngʉngʉe ngʉ ndima bba lu.
11 Ro, Maria mangʉe ma kabuli djo dzz ndi dzz ro. Dzz dhé ndi dzz ro le d’ingʉe ndi nanga ro le njangʉe nga kabuli na, 12 føro le njangʉe aro kʉ ná malaiká ndima ró sawø rù na Yesu dzá bʉ le langʉe ná ngana ndima di ro, ddi ke ngʉe agʉro ndirigoti ddi ke ngʉe arø ro. 13 Kpa dhungʉeri le tso: “Isɨle ni ká addu dzz?” Le ngʉngʉe logoti kpa dho: “Madzá Bboke kpa tutu iga ro ndirigoti ma nzá chu ke kpa li ná nga ro ri.” 14 Fø lo ndi po nari goti le lengʉe ndi thí ro, le njangʉe Yesu føga ndi tøni ro, le nzá chungʉe ri ká kʉ Yesu nari ro ri. 15 Ro, Yesu dhungʉeri le tso: “Isɨle ni ká addu dzz?” Ni ká ie ne?” Le ngʉ rid’ya føga ngabbɨ í nǎ ná ke nari dho le pongʉeri: “Bboke njati rie ni tu kedzá bʉ ri ró, apo ngbaga ma ni li ke nari ma dho ndirigoti ma ra ke dzidzi.” 16 Føro Yesu nzingʉe le: “Maria!” Le lengʉe ndi thí ro, le pongʉeri ke dho Kiebrania nǎ: “Raboni” (fø lo na mana kʉ “Mwalimu!”) 17 Yesu pongʉeri le ni: “Nzɨ lø ma dhonalo ma nzá d’e ra madzá Baba dhi ngana ri. Ro, ara ripo ma djoi dho, ‘Ma ra madzá Baba ndirigoti nidhi Baba dhi ngana; madzá Mungu ndirigoti nidhi Mungu dhi ngana.’” 18 Maria Magdalene rangʉe rid’ra ɨ ke unakpa dho: “Ma nja Bboke!” Føri goti le d’rangʉe ke d’rae ndi dho ná lo kpa dho.
19 Yenga ddo kana ya kwanza ddo dyina ngasdjó, Yesu unakpa ngʉ Wayaudi do nji nari dho kpa tøngʉe ndima ronga tso tø adzá. Føro Yesu singʉe ro, ke tøngʉeni kpa kana kati na ndirigoti ke pongʉeri: “Ngoi é ni na.” 20 Fø lo ndi po nari goti ke dhongʉe ndi thó ma, ndi ikpa ma na kpa dho ndirigoti kpa nanga jingʉeni bbo Bboke ndima nja nari dho. 21 Føri goti Yesu pongʉeri ki kpa dho: “Ngoi é ni na. Ddiddi Baba chongʉe ma nari bbai, ma maddi ni chó.” 22 Fø lo ndi po nari goti ke vʉngʉe hè kpa djo ndirigoti ke pongʉeri: “Aniba roho takatifu. 23 Njati ni njí ddikpa ke dhó chenga zø njí ró, fø ke zø njini nji; ro njati ni njí ddikpa ke dhó chenga zø nzá ró, fø ke zø nzá njini ri.”
24 Kumi na mbili kʉ ná kpa kana Tomas, Zʉ* ndrŭ ngʉ adi nzǐ ná ke nga ngʉe Yesu singʉe ná saa na ri. 25 Føro ke una nja kpa pongʉeri Tomas dho: “Ko nja Bboke nja.” Ro, ke pongʉeri kpa dho: “Njati ma nja ke thó nanga le tɨe misumari na ná nga nzá ndirigoti ma ti ma thó misumari bbù na nzá, føri kina ma ti ma thó ke ikpa na nzá ró, ma nzɨ fø lo ro uri.”
26 Ddo munane da nari goti kpa tøngʉe ndima ronga tso ki adzá vi, ná fø dyi Tomas ngʉe nì kpa kana. Føro ngbà mai le tøngʉe dzaitso tø ro, Yesu singʉe tøni kpa kana kati na ndirigoti ke pongʉeri: “Ngoi é ni na.” 27 Ndirigoti ke pongʉeri Tomas dho: “Ali ni thókpa iga ndirigoti anja ma thó; abbʉ ni thó ndirigoti atsu ri ma ikpa na, abba ni nanga rɨni* nari tso, ró auri u.” 28 Tomas ngʉngʉe logoti: “Madzá Bboke ndirigoti madzá Mungu!” 29 Føro Yesu pongʉeri: “Ni nja ma nja ró, ni ká u ri ngbà? Hwè na kʉ nari kʉ, nzá ndima njari ro riu ná ndrŭ.”
30 Føri kina ke njingʉe bí kʉ ná nja ddù maddi ndi unakpa nyǒ njí nari nzá le ndi kú nanga le ku ná i buku nǎ ri. 31 I ri le ndi ndiro ni uri u Yesu kʉ Kristo, Mungu Ddù ndirigoti ri ni u nari dho ni ba shinga ke ró dho chulu d’e.