Ni Ká Chu Ri Ngba?

Drdr le ndingʉe nalo ká ridho Biblia kʉ bbʉbbʉ ngbaribbai?

YERUZALEMU nǎ Biblia nǎ drdr ritsi le adi dho na nga na le li ddikpa bbo dju, ri djó le ndingʉe nga cho 700-600 Y.G.N. (Yesu Gøni nari Nji). Fø dju ro le singʉe Izraeli nǎ Hebroni dhi bbagʉ nrŭ le ngʉ adi d’ø ná ngana. Ri djó le ndi ri: “Yahweh Sabaot wà Hagav dzá ngba Hagaf wa.” Føri ká Biblia kʉ bbʉbbʉ nari dho ngbaribbai? Føri ridho Mungu rodho Yova, le ndingʉe YHWH Kiebrania nǎ ná føri nrŭ chuechu anziro, ndirigoti nrŭ ngʉ njí nji ri na Biblia le ngʉ ndí ná saa na. Nrŭ le ngʉ d’ø ná fø ngana le ndingʉe ná njalo ma ngʉe ddi. Nrŭ ngʉ adi ndima dhó ritsi ru fø ngana, ndirigoti nrŭ ngʉ adi ndima rodho ndi Mungu rodho ma na fø ukuta djo.

Georgia nǎ Universite nǎ Doktere Rachel Nabulsi pongʉeri i fø lo djo: “Mungu rodho YHWH djo le tilo bí ina, ná føri nǎ mana kʉ bbo. Fø lo ridho nari kʉ Mungu rodho YHWH nǎ mana ngʉe bbo Izraeli bbá ndirigoti Yuda nǎ.” Føri ridho Kiebrania nǎ le ndie Mungu rodho YHWH ndirigoti ri bani Biblia nǎ bí ina ná føri kʉ bbʉbbʉ. Bí ina nrŭ rodho nǎ le ngʉ adi si Mungu rodho ro.

Dho “Yahweh Sabaot,” le ndingʉe dju djó ná føri nǎ mana kʉ “Basødda dhi Yova.” Føri ridho nrŭ ngʉ njí nji Mungu rodho na, ndirigoti madha dhi dho “Basødda dhi Yova” na maddi Biblia le ngʉ ndi ná saa na. Føri ridho Biblia tilo “Basødda dhi Yova” djo 283 ina Maandiko ya kiebrania nǎ, lorojina Isaya, Yeremia ndirigoti Zakaria dzá buku nǎ kʉ ná følo ma kʉ bbʉbbʉ ddi.