SOMO 04
Mungu ká kʉ ie?
Drrdrr nga djó ro kpø njʉ nga djo ndrŭ adi bí kʉ ná kpetsi miungu ma, isi miungu ma na má. Ro, Biblia tilo “ddikpa bbo pli kʉ ná Mungu djo, da ndi dà nja miungu krʉ djolu ro.” (2 Mambo ya Nyakati 2:5) Føri ká kʉ ngbá Mungu? Ndirigoti addui ká rili fø Mungu é bbo pli ndrŭ adi má ná nja miungu krʉ djolu? I somo nǎ, anja ngbaribbai ma fø Mungu riji ni chulo ndi djo nari.
1. Mungu ró dho ká kʉ ie ndirigoti addui ká ridho ke jiri ko chu ndi ró dho chu?
Biblia nǎ, Mungu dhò ndi ró dho ko dho. Ke pori: “Ma kʉ Yova. Føri kʉ ma ró dho.” (Azø Isaya 42:5, 8.) “Yova” kʉ Wayahudi (Kiebrania) dha nǎ ro si ná dho; ri na mana kʉ “Ke adi rinji rie.” Yova jiri ko chu ndi ró dho chu. (Kutoka 3:15) Følo ká ko ka ko chu ngbaribbai? Ke liri ndi ro fø dho ndini Biblia nǎ 7 000 ina djolu!a Yova dhé kʉ ddikpa bbʉbbʉ “Mungu ró dho, ra nǎ arø ma, dz’ djo agʉ ma.”—Kumbukumbu la Torati 4:39.
2. Biblia ká adi addu ddi ko dho Yova djo?
Ndrŭ adi madha bbʉ dho ná miungu kʉ bí, ro Biblia pori Yova ddiro dhé kʉ bbʉbbʉ Mungu. Ká addudho? Føri ko po dho ná lo kʉ bí. Yova dzá bbonga sisi krʉ kʉ ná bbonga djolu, ndirigoti ke ddiro dhé kʉ “Pli Ngbeni dz’ lu djó ná ke.” (Azø Zaburi 83:18.) Ke kʉ “Ritsi ddí na ka ná ke,” føri na mana kʉ ke kaka ndi njí ndi thí ji ná lo. Ke “no krʉ kʉ ná ritsi” ngø ma, dz’ djó shi di ná ritsi krʉ ma na. (Ufunuo 4:8, 11) Yova ddiro dhé kʉ nzá ndi tso ro ngani ro, ndirigoti ke tso ro nzá ka ndi d’ø ri.—Zaburi 90:2.
ANE LONANGA BBO
Aneri ni chu Mungu dzá bbonga dhǒ ná dho ma kana njonjonga ke ró ddikpa dhé kʉ ná dho na. Føri goti achu ngbaribbai ma ndirigoti addudho ma ke liri ni chu ndi ró dho nari.
3. Mungu ró heshima dhi dho kʉ bí, ro ke ró dho kʉ ddikpa dhé
Ndiro ni nja ddikpa le ró madha dhi dho ma kana njonjonga le nganga ró dho na d’e, aninja VIDEO, ndirigoti anitilo i ngadhudha djo.
Loroji na, heshima dhi dho “Bboke” ma kana ká kʉ ngbá njonjonga dho nganga na?
Biblia ripo bí kʉ ná ndrŭ adi madha bbʉ miungu dho ma, bbobbokpa dho ma. Azø Zaburi 136:1-3, ndirigoti anitilo i ngadhudha djo:
“Miungu dhi Mungu”, ndirigoti “bbobbokpa dhi Bboke” ká kʉ ie?
4. Yova jiri ni chu ndi ró dho chu ndirigoti ni di njínji fø dho na
Addui ká ridho Yova jiri ni chu ndi ró dho chu? Aninja VIDEO, ndirigoti anitilo i ngadhudha djo.
Ni ká riddi Mungu jiri le chu ndi ró dho chu? Ká addudho?
Yova jiri le di njínji ndi ró dho na. Azø Waroma 10:13, ndirigoti anitilo i ngadhudha djo:
Ká addu dzá lo dho ri kʉ bbo na mana kʉ ná lo le di njínji Mungu ró Yova dhi fø dho na?
Ni ká ka ni mbu ni ngbǎ njati ddikpa ke nó ni ró dho nga, ndirigoti ke nzi ni, ni ró dho nganga ró ro?
Ni ká riddi Yova adi ndi rr ngbǎ le di ndi nzi ndi ró dho ró ro?
5. Yova jiri ni é ndidzá kau
Cambodia dhi bbagʉ Soten ró dho kʉ ná ddikpa isɨle pori: “Mungu ró dho ndi chungʉe ná føri bbʉngʉe hwè ndi dho bbo pli.” Aninja VIDEO, ndirigoti anitilo i ngadhudha djo.
Video nǎ ni njari nari bbai, Soten ká mbue ndi ngbaribbai Mungu ró dho ndi chue ná saa na?
Nja le ngʉ ddikpa ke dzá kau d’e, bí ina le adi rine le chu ke ró dho vi. Azø Yakobo 4:8a, ndirigoti anitilo i ngadhudha djo:
Yova ká ngbá lo nzi ni tso?
Ká addu dzá lo dho ni chu Mungu ró dho ndirigoti ni njínji ke ro fø dho na nari ka ndi si ni tsotso ko ni ngʉ kedzá kau?
NJA NDRŬ ADI RIPO: “Mungu kʉ ddikpa, føri dho le nzi ke ngbá dho na ma ró, ri nga kʉ che ri.”
Yova kʉ Mungu ró dho nari ká ni u u?
Mungu jiri ko njínji ndi ró dho na. Føri nanga ká ni ka ni tu ngbaribbai ndrŭ dho?
LO DZÁ DɄNGA
Yova kʉ ddikpa dhé kʉ ná bbʉbbʉ Mungu ró dho. Ke jiri ko chu ndi chu ndirigoti ko njínji ndi ró dho na nja ko ngʉ ndidzá kau d’e.
Lo djolu le ngʉ nari
Addui ká adi rili Yova é njonjo ndrŭ adi má ná nja miungu ró ro?
Ká addudho ringani ko njínji Mungu ró dho na?
Addui ká ridho Mungu jiri ni é ndidzá kau?
NI KA NI CHU NÁ NJA LO
Anja Mungu kʉ nì nari ni ka ni u u dho ná lo ro 5.
Mungu kʉ nì nari ká le ka le u addudho?
“Ni Nani Aliyemuumba Mungu?” (Munara wa Mulinzi, 1 Mwezi wa 8, 2014)
Aneri ni chu addudho ma ringani ko njínji Mungu ró dho na nari, nzá mai ko chu ngbaribbai ma le ngʉ adi rinzi anziro nari ro.
Ko ká ka ko nzi Mungu ró dho ko jiri nari bbai dhé? Anja addudho ma ko ka ko pori nari kʉ, ke ró dho nganga kʉ ddikpa dhé nari.
a Njati ni ji ni chulo bbo fø dho na mana djo inga addudho ma fø dho kʉ nga nja Biblia nǎ nari djo ró, anja Nyongeza A4 Biblia—Tafsiri ya Ulimwengu Mupya nǎ.