SOMO 11
Ngbaribbai ma ni ka ni ba faida bbo Biblia ni zø nari nǎ ro nari
Ddikpa bbo njí tso ni nga nari goti, ká ni d’erie ni ro mbu si djolu fø njí si nari bbai nzá? Ndiro ni nji fø njí bblo d’e, njaro ni ndongʉe fø njí nanga ro nɨnɨ ndiro ri ngʉ sʉsʉ ni dho d’e. Biblia le ji le zø ró ma ri kʉ føi. Njaro ni ka ni dhuri ni tso ‘Ma ká ka ma nga ritso ngbaga ro?’ I somo nǎ, ko si ni ka ni njí ná dhʉdhʉ kʉ ná lo nja ndiro ri kó ni tsotso ni nanga jini ji Biblia zødha dho ndirigoti ri nǎ longanedha dho d’e.
1. Ká addudho ringani ko di Biblia zø krʉ ddo ró?
Ddikpa ke di Biblia zø inga “Yova dzá sheria,” zø krʉ ddo ró ró, ke ka ndi e hwè na ndirigoti ke tsotso ka ndi koni ko. (Azø Zaburi 1:1-3.) Ndiro ni nga ri tso d’e, adi ri ro zø krʉ ddo ró sese miniti kana. Njati Mungu dzá lo ni zø nari dhi ù tsu bbo ni na ró, ni nanga si jini bbo Biblia zødha dho.
2. Addui ká ka ndi kó ni tsotso nja ni ba faida Biblia ni zø nari nǎ ro d’e?
Ndiro Biblia nǎ ro ko zø ná lo kó ko tsotso ko d’e, ringani nja saa na ko ro tøni vi ndirigoti ko ddinga ko zø ná lo djo. Biblia ko zø ná saa na, ri kʉ bblo ko “ddinga ri nǎ lo djo.” (Yoshua 1:8, maelezo ya chini) Nga ni zø ná saa na, adi nga ro dhu ni tso ɨ mai: ‘I lo ká ngba loddi ma dho Yova Mungu djo? Ri na ká ma ka ma njinjí ngbaribbai madhó maisha nǎ? I andiko na ká ma ka ma kó nja ndrŭ tsotso ngbaribbai?’
3. Ni ká ka ni njiri ngba nja ni ba saa Biblia zødha dho d’e?
Ni dho ká rie kpakpa ni ba saa Biblia zødha dho? Bí kʉ ná ndrŭ dho fø rie kpakpa. Amburi ni di “njínji bblo nidhó saa na.” (Waefeso 5:16) Føri ni ka ni njí saa ro ni ba Biblia zødha dho krʉ ddo ró nari chulu. Nja ndrŭ vʉrie ri ndima di Biblia zø kukutso. Nja ndrŭ vʉrie ri ndima di Biblia zø dyina, loroji na nga ndima nyo ná saa na. Ndirigoti nja ndrŭ adi Biblia zø ngasdjo ddo ndima ra ddo nari njí. Nde, ni dho ka ndi e bblo nari ká kʉ ngba saa?
ANE LONANGA BBO
Aneri ni chu ngbaribbai ma Biblia ni zø nari ka ndi bbʉ hwè ni dho nari. Anja ngbaribbai ma ni ka ni tayarisha ni bblo ndiro ni ba faida Biblia ni zø nari nǎ ro nari.
Ko ka ko vú ko njonjo kʉ ná nyo nyodha na nari bbai, ko ka ko vú ko ndiro ko nanga jini Biblia zødha dho d’e
4. Aba hwè Biblia zødha dho
Biblia zødha tso le nga nari nga ka ndi e sʉsʉ ri. Ni mai ri kʉ fø ro, ko ka ko liri Biblia ko zø nari dzá “ù tsutsu” ko na, ddiddi ddikpa ke ka ndi tsú nzá ro ndi d’erie nyo ná nyo dzá ù ndi na nari bbai. Azø 1 Petro 2:2, ndirigoti anitilo i ngadhudha djo:
Njati ni di Biblia zø krʉ ddo ró ró, ni ká riddi ni ka ni ba hwè ndirigoti ni nanga ka ndi jini ri zødha dho bbo nzá?
Aninja VIDEO ndiro ni chu ngbaribbai ma nja ndrŭ bangʉe hwè Biblia zødha dho nari d’e. Ndirigoti anitilo i ngadhudha djo.
Video nǎ, jadda kpa ká sie ngbá kpakpalo djolu?
Addui ká koe kpa tsotso ndiro nzɨ kpa bba Biblia zødha tso ro?
Kpa ká njie ri ngba nja Biblia ndima zø nari tho ndima nyǒ bbo d’e?
Ni tsotso ka ndi kó ná shauri nja ni nga ri tso d’e:
Avʉ ngba nanga le tu d’ʉ i ddo ró luga nǎ ná Biblia. Amburi ni zø Tafsiri ya Ulimwengu Mupya njati rie ni ri kʉ nidhó luga nǎ ri ró.
Anga Biblia zødha tso bbo tho ni nyǒ ná sehemu djó ro. Nja ni ba nja lo ki d’e, anja i djǒ ripo ná kisanduku “Anga Biblia zødha tso.”
Ali alama b’lo ni zø ná lo tso ro. Anjinjí i buku nǎ ɨ djǒ ripo ná kisaduku nǎ kʉ ná lo na “Ara anzi Biblia ni zø nari na.”
Anjinjí JW Library na®. Ri chulu ni ka ni zø Biblia inga ni ka ni rr Biblia chu le lø nari krʉ ngalu nidhó telefone na inga elektroniki dhi nja ritsi na.
Anjinjí Tafsiri ya Ulimwengu Mupya nǎ nyongeza na. Ri nǎ karte ma, kisanduku ma, ji ma na ka ndi liri Biblia ni zø nari tho ni nyǒ bbo.
5. Adi matayarisho nji Biblia nǎ longanedha dho
Azø Zaburi 119:34, ndirigoti anitilo i ngadhudha djo:
Ká addudho ri kʉ bblo ni nga lo tso sala na rie Biblia ni ji ni zø inga Biblia nǎ longanedha dho ni matayarisho nji ri ró?
Ni ká ka ni ba faida ngbaribbai Biblia nǎ longa ni ne nari kana? Ɨ buku nǎ somo ni tayarisha ná saa na, amburi ni njínji ro ɨ lo na:
Azø somo tso le nga djó ro ná paragrafu.
Ane ndirigoti azø maandiko ndirigoti amburi ni famu ngbaribbai ma fø maandiko nǎ lo ronga nju fø ga le ti ná lo na nari.
Ali alama bbo na mana kʉ ná lo tse na inga krʉ kʉ ná ngadhudha dhi majibu tsena, fø ri si rili ni tilo ddinga nidhó mwalimu na.
Ni ká churi ngba?
Yova dzá Dimu njirie njí bbo b’lo njonjo kʉ ná tafsiri na. Ni mai ri kʉ fø ro, bbo pli ko jirie nari kʉ Biblia—Tafsiri ya Ulimwengu Mupya dhonalo ri kʉ d’ʉ, ri nǎ lo kʉ wazi ndirigoti ri nǎ Mungu ró dho ma bani ddi.—Anja jw.org djó kʉ ná lo “Mashahidi wa Yehova Wanakuwaka na Biblia Yao?”
NJA NDRŬ ADI RIPO: “Biblia nǎ longa le ne ná føri kʉ bbo njí. Ma dho nga saa kʉ ri, inga ma dho nzɨ føri ka ri.”
Nde ni ká adi riddi ngba?
LO DZÁ DɄNGA
Nja ni ba faida bbo Biblia nǎ ro d’e, ali programu ri zødha dho, anzinga nja ni famu ni zø ná lo d’e ndirigoti anji matayarisho Biblia nǎ longanedha dho.
Lo djolu le ngʉ nari
Ni tsotso ká addu ka ndi kó nja ni ba faida bbo Biblia nǎ lo nǎ ro d’e?
Ngba saa ká ka ndi é bblo ni dho Biblia zødha dho ndirigoti ri nǎ longanedha dho?
Addudho ká ri kʉ bblo ni di matayarisho nji Biblia nǎ longanedha dho?
NI KA NI CHU NÁ NJA LO
Ni tsotso ka ndi kó ná nja lo ndiro ni ba faida bbo Biblia nǎ longa ni ne nari nǎ ro d’e.
“Namna ya Kupata Faida Wakati Unasoma Biblia” (Munara wa Mulinzi Na. 1 2017)
Aneri ni chu Biblia le ka le zø bblo ná chu ro gbo.
“Biblia Inaweza Kunisaidia Namna Gani?—Sehemu ya 1: Ujue Muzuri Biblia Yako” (Jw.org djó kʉ ná lo)
Anja ngbaribbai ma ni ka ni ba hwè Biblia ni zø nari nǎ ro nari.
Aneri ni ba shauri bicha zø Biblia ná ndrŭ dhó ro.