SOMO 12
Ni tsotso ká addu ka ndi kó ndiro ni ra Biblia nǎ longa ni ne nari na anzi d’e?
Biblia nǎ longa le ne nari adi faida bbʉ bbo, ro ri nanga nedha dho le saa ba nari nga e sʉsʉ ri. Nja saa na, ni ka ni dhú Biblia nǎ longanedha na ni ra anzi nari ká ka ndi ka ngba ma ni dho nari ni tso. Ká addudho ri kʉ bblo le njí kpakpanga le rá ri nǎ longanedha na anzi d’e? Rie kpakpalo ma kʉ ri ró, addui ká ka ndi kó ni tsotso ni rá ri nǎ longanedha na anzi d’e?
1. Biblia nǎ longa le ne nari na mana ká kʉ bbo addudho?
“Mungu dzá lo kʉ shi ndirigoti kpakpanga na.” (Waebrania 4:12) Biblia na mana kʉ bbo dhonalo ri Mungu dhó ngaddidha ma, ke ndi mbu ni djo nari ma na d’ra. Biblia nzɨ ni tsotso kó ndiro ni e lochudha na dhé ri, ro ri rili ni e bbʉbbʉ nyodyu na ndirigoti ngab’odha na. Bbo pli nǎ mana kʉ ná lo kʉ, Biblia ni tsotso kó ndiro ni ngʉ Yova dzá kau d’e. Biblia nǎ longa ni di ne ró, ri ka ndi liri nidhó maisha é mana na.
2. Ká addudho ringani le nja Biblia nǎ bbʉbbʉlo mana na bbo?
Biblia nǎ bbʉbbʉlo kʉ bbo mali bbai. Føri dho Biblia ripo ko dho “adzi bbʉbbʉlo ndirigoti nzɨ dzi ri nanga.” (Mezali 23:23) Biblia kʉ mana na nari djo ko di ngaddi ró, ko ka ko njí kpakpanga ko ne ri nanga, rie kpakpa ma ri kʉ ko dho ri ró.—Azø Mezali 2:4, 5.
3. Yova ká ka ndi kó ni tsotso ngbaribbai ndiro ni ra anzi Biblia nǎ longanedha na d’e?
Yova kʉ ritsi ddi na ka ná Ngano ná ke ndirigoti nidzá kau nari dho, ke riji ndi kó ni tsotso ni chulo ndi djo. Ke ka ndi bbʉ “ritsi njidha dhi ù ma, ri njidha dhi kpakpanga ma na ni dho.” (Azø Wafilipi 2:13.) Føri dho njati nidhó lo jiri ke kó ni tsotso ni ne Biblia nǎ longa inga ni njinjí ri nǎ lo na ró, ke ka ndi kó ni tsotso ko. Njati nidhó lo jiri ni ba kpakpanga ndiro ni ve upinzani tso inga nja kʉ ná kpakpalo tso ró, ke ka ndi bbʉ ri bbʉ ni dho. Krʉ saa ró, adi rinzi Yova kó ni tsotso ndiro ni ra anzi Biblia nǎ longanedha na d’e.—1 Watesalonike 5:17.
ANE LONANGA BBO
Aneri ni chu ngbaribbai ma ni ka ni ra Biblia nǎ longanedha na anzi nari, ni mai nidhó njí kʉ bbo inga upinzani ma kʉ ro. Ndirigoti anja ngbaribbai ma Yova ka ndi kó ni tsotso nari ndiro ni ra Biblia nǎ longanedha na anzi d’e.
4. Ali Biblia nǎ longa ni ne nari anziro
Nja saa na, kodhó njí ka ndi e bbo nari ka ndi liri nzɨ ko ba saa Biblia nǎ longanedha dho. Nde addui ká ka ndi kó ko tsotso? Azø Wafilipi 1:10, ndirigoti anitilo i ngadhadhu djo:
Ni ká riddi maisha nǎ “bbo pli na mana” kʉ nari kʉ addu?
Biblia nǎ longa ni ne nari ká ni ka ni li anziro ngbaribbai?
Njati ni li sø (muchanga) ya kwanza ddikpa zando nǎ ndirigoti ni li dju luti ri na ró, dju nzá ka ndi banga ro ri
Njati ni li dju i ya kwanza ri na ró, ni ka ni ba sø ni li nanga ba. Føri bbai, njati ni li “bbo na mana kʉ ná lo” anziro nidhó maisha nǎ ró, ri ka ndi kaka ni njí fø lo ndirigoti ni ka ni ba saa nja lo njidha dho maddi
Biblia nǎ longa ko ne nari adi rili kodhó kiroho nǎ lo tso gbani gba, føri kʉ ko chú Mungu ndirigoti ko bbʉ madha ke dho. Azø Matayo 5:3, ndirigoti anitilo i ngadhudha djo:
Ko ká ka ko ba faida ngbaribbai njati ko li Biblia nǎ longa ko ne nari anziro ró?
5. Atøni kpakpa upinzani tso ró
Nja saa na, nja ndrʉ ka ndima pori nzɨ ni ne Biblia nǎ longa. Anja Francesco dhó loroji. Aninja VIDEO, ndirigoti anitilo i ngadhudha djo.
Video nǎ ni njari nari bbai, Francesco dhó kau ma, kedzá mama ma na ká njingʉeri ngba ke tingʉe lo ndi chu ná lo djo kpa dho ná saa na?
Ke nzá d’ingʉe ji ri nari dho, ká ke bangʉe faida ngbaribbai?
Azø 2 Timoteo 2:24, 25, ndirigoti anitilo i ngadhudha djo:
Nidhó familia ma, nidhó kau ma ká adi ndima rr ngbaribbai Biblia nǎ longa ni ne nari djo?
I maandiko ripo nari bbai, njati ddikpa ke nanga di jini nzá Biblia nǎ longa ni ne nari dho ró ká ringani ni njiri ngba? Ká addudho?
6. Ali ni thí Yova djo ndiro ke kó ni tsotso d’e
Yova ro ko di ko ndri chøchø ró, ko ka ko jiri bbo ko njí ke ji ná lo. Ni mai ri kʉ fø ro, njaro ri ka ndi e kpakpa ko thɨ kodhó lo thika ndirigoti ko njí Yova ji ná lo kodhó maisha nǎ. Njati rie fø ni adi ni mbu ri ró, nzɨ bbari ni thí bʉni. Yova ka ndi kó ni tsotso ko. Aninja VIDEO, ndirigoti anitilo i ngadhudha djo.
Video nǎ ni njari nari bbai, Jim ká lengʉe ngba lo thika ndiro ndi nji Yova ji ná lo d’e?
Kedhó loroji ká tho ni nyǒ addudho?
Azø Waebrania 11:6, ndirigoti anitilo i ngadhudha djo:
Yova ká si ngba lo nji ndima “thí nǎ ro krʉ ndi ne ná ndrŭ dho?”
Biblia nǎ longanedha dho ni kpakpanga nji nari Yova adi nja ni, ná føri ká ngba longaddi ni dho?
NJA LE KA NDI DHURI: “Ni ká adi Biblia nǎ longane addudho?”
Ni ká ka ni ngʉe fø logoti ngbaribbai?
LO DZÁ DɄNGA
Nga mai Biblia nǎ longa le ne nari e sʉsʉ ro, ri nǎ longa ni ne nari ka ndi kó ni tsotso ni nji maisha hwè theinga dho. Ali ni thí Yova djo ndirigoti ke si ni kobe bbʉ ni.
Lo djolu le ngʉ nari
Biblia nǎ bbʉbbʉlo ká kʉ mana na bbo ni dho addudho?
“Bbo na mana kʉ ná lo” ká ni ka ni li anziro ngbaribbai?
Ri ká ngani ni nziri Yova kó ni tsotso ndiro ni rá Biblia nǎ longanedha na anzi d’e addudho?
NI KA NI CHU NÁ NJA LO
Anja bí kʉ ná ndrŭ tsotso korie ná 4 kʉ ná lo ndiro ndima njínji nyodyu na ndima dhó saa na d’e.
Ddikpa le ngʉ kpakpanga nji ndiro ndi njí Yova nyǒ tho ná lo d’e nari nzɨ ngʉ le bbá ke nyǒ tho ri. Nde Yova ká kongʉe fø le tsotso ngbaribbai nari anja di.
Yova adi kpakpanga bbʉ ko dho ndiro ko ve kpakpalo tso d’e (5:05)
Anja ngbaribbai ma ddikpa ke bangʉe faida ndi bbá le dhó ngatsovedha dzá lodho nari.
Nja saa na ndrŭ adi ripo nari kʉ, Yova dzá Dimu adi rili familia nanga ndoni ndo. Nde føri ká kʉ bbʉbbʉ?