Ni ka ni ba ngoi ngbà kpakpalo dhi saa na

1. “Mungu dhó ngoi,” ká kʉ addu ndirigoti ri ká adi ko tsotso kó ngbaribbai? (Wafilipi 4:6, 7)

NZÁ djo i dz’ dzá ndrŭ chulo ro ddikpa maddi ná ngoi ro kʉ thé. Føri kʉ “Mungu dhó ngoi,” kodhi ra nǎ Baba ma na le ma kana kʉ bblo kʉ ná kau nari nǎ ro adi si ná le thí jotso ko nari. Njati ko é Mungu dhó ngoi na ró ko e b’odidha na. (Azø Wafilipi 4:6, 7.) Ko kana kau e jiji ke ná ndrŭ na. Ndirigoti ko kana kau e chøchø “ngoi dhi Mungu” na. (1 Te. 5:23) Njati ko chu kodhi ra nǎ baba, ko li ko thí ke djo ndirigoti ko rrnga ke dho ró, Mungu dhó ngoi ka ndi liri ko thí jotso ko ko rie ko nanga ri d’o ko bani kpakpalo na nari dho ri ró.

2. Ká addudho ko ka ko uri u nari kʉ, ri ka ndi kaka le ba Mungu dhó ngoi?

² Ri ká ka ndi kaka ko ba Mungu dhó ngoi kpakpalo na ko bani ná saa na, loroji na, rie ko hwini nya ndi nanga nyá ná dhe tso ró, chʉ adi ngaba ná lo tso ró, ngbʉngbʉ ndrŭ nji nari tso ró inga ndrŭ ko nzá nari tso ró ná saa na? Fø kpakpalo krʉ ka ndi liri ko nji do. Ro, Yesu jangʉe i lo ndi unakpa dho: “Nzɨ ni bba ri d’o ni thí nanga, nzɨ ni ngʉ aluti do dho.” (Yoh. 14:27) Hwè dhi lo kʉ le-djoi ma, le-vei ma na adi ngarr nì Yesu dhó fø shauri dho. Yova dhó le tsotsokodha chulu ri kaka kpa dho kpa ba ngoi che pli kʉ ná kpakpalo tso ró ndima hwini ná saa na.

NGBARIBBAI MA LE KA LE BA NGOI NYA NDI NANGA NYÁ NÁ DHE DHI SAA NA NARI

3. Nya ndi nanga nyá ná dhe ká ka ndi sa kodhó ngoi ngbaribbai?

³ Nya ndi nanga nyá ná dhe ka ndi le kodhó maisha nǎ njonjo kʉ ná lo thika chʉ. Akonja coronavirus nji bí kʉ ná ndrŭ ró ná lo. Ddikpa lo dhori nari kʉ ndrŭ dhó hesabu dzá nusu djolu da ná ndrŭ dho ri e kpakpa ndima ddo coronavirus dhi saa na. Coronavirus dhi saa na ndrŭ nanga ri d’o nari ma, ndrŭ thí bʉni nari ma, wa ndrŭ jø nari ma, rɨ le rɨ ná ritsi na ndrŭ njínji nari ma, fudjo ndrŭ nji nari ma, ndrŭ ndima hwi ndima ro nari ma na dhó hesabu ndrieni bbo. Njati ni di ná ngana nya ndi nanga nyá ná dhe banga ró ká ni ka ni njiri ngbǎ ndiro nzɨ ri d’o ni nanga bbo ndirigoti ni é Mungu dhó ngoi na d’e?

4. Yesu d’rangʉe ngasini ná saa djo ná unabi ko chu nari ká ka ndi bbʉ ngoi ko dho addudho?

⁴ Yesu d’rangʉeri nari kʉ ngasini ná saa na, nja ke ró ro le lø ná dhe ka ndi sie “i ngana ndirigoti nja ngana.” (Lu. 21:11) Nde, fø lo ko chu nari ká ka ndi bbʉ ngoi ko dho ngbaribbai? Ko nanga nzá ka ndi keni nya ndi nanga nyá ná dhe ngaba nari dho ri. Ko d’i ri utso nari kʉ lo njini Yesu d’rangʉeri ri ka ndi njieni nari bbai nganga. Føri dho ko adi Yesu d’rangʉe ngasini ná saa na di ná ndrŭ dho ná i shauri dyø: “Anidi krr nzɨ ni nji do ró.”​—Mt. 24:6.

5. (a) Wafilipi 4:8, 9 ripo nari bbai, ko ká ka ko nzinga ngbá lo djo nya ndi nanga nyá ná dhe tso ró ko hwini ná saa na? (b) Biblia nǎ lø chu le lø ná lo ni rr nari ká ka ndi kó ni tsotso ngbaribbai?

⁵ Nya ndi nanga nyá ná dhe banga nari ka ndi liri ko njí do bbo. Føri kʉ Desib ro dhó kʉ ná le-ve bangʉeni na ná lo. Ledzá baba goti ke ma, ledzá baba njí ke dzá kpetsi ngba ma, ledhó doktere ma na krʉ coronavirus chengʉe, nari goti le do ngʉ nji ndi ro maddi dhe si ta ndirigoti ndi ró ro dhe si ta ndidzá ngó ngʉ ná mama ro nari dho. Ndirigoti le do ngʉ nji njaro coronavirus dzá lo dho ndi si ndidhó njí vivi nari dho. Føri dho le ngʉ ngbaribbai ma ndi ka ndi dzi nyo ma, dza tso ma na nari dhu ndi tso. Fø lo le nanga d’o nari dho le ro nzá ka ndi ddoe ddo maddi ri. Ro, Desi bangʉe ngoi ki vi. Ká ngbaribbai? Le nzingʉeri Yova kó ndi tsotso ndi thí jotso koko ndirigoti ndi di ngaddi bblo lo djo. (Azø Wafilipi 4:8, 9.) Le rrngʉe Yova “loti” ndi dho nari Biblia nǎ lø chu le lø ná lo ndi rr nari chulu. Le pori, “nga zø ná kpa lo zø ko ndima jotso ko ro nari lingʉeri ma nǎ do jotso ko ko ndirigoti fø lo nongʉe Yova dzá zølo nga ma dho.”​—Zb. 94:19.

6. Ddiro le ngazø nari ma, njudha dhi ngana le si nari ma na ká ka ndi kó ni tsotso ngbaribbai?

⁶ Nya ndi nanga nyá ná dhe banga nari adi kodhó anziro e ná programu sasa, ro nzɨ bba ddiro ni ngazø nari ma, njudha dhi ngana ni si nari ma na tso. Kodhó vichapo ma, video ma ndirigoti ndrŭ dhó maisha djo tilo ná lo si ngano ni dho nari kʉ, ni djoi ma, ni vei ma na tøni chi nì mai ndima bani kpakpalo na ro. (1 Pe. 5:9) Njudha si ni tsotso ko ni ddinga Biblia nǎ kpakpa ka ndi li ni ná lo djo. Ndirigoti føri si rili ni li nja ndrŭ kpakpa ndirigoti ni maddi ri si li kpakpa. (Ro. 1:11, 12) Ni di ngaddi ngbaribbai ma, Yova kongʉe ndidzá ndrŭ tsotso dhe ma, do ma na ngʉ kpa nji ná saa na, ddiro kʉ nari bbai kpa ngʉ ndima mbu ná saa na nari djo ró, nidhó udha si ngʉ kpakpa ndirigoti ni si ri uu nari kʉ, ke si kʉ ni tsotso ma ko ddi.

7. Mutume Yohana dhó loroji nǎ ro ká ni ka ni ba ngbá somo?

⁷ Adi loti ni djoi ma, ni vei ma na. Nya ndi nanga nyá ná dhe ka ndi liri ko di da ko lai Wakristo ró ro. Fø di ná saa na ni ka ni mbu ni mutume Yohana bbai. Ke jingʉeri ndi nja ndidhi djona Gayo ndi ronga na. (3 Yo. 13, 14) Ro, Yohana chungʉeri chu nari kʉ ddikpa saa ro dho nzá ndi ka ndi njae ke ro ri. Yohana njingʉe ngbà ndi ka ndi njie ná lo, ke ndingʉe barua Gayo dho. Njati rie nzá ri ka ndi ka ni dho ni rá ni djoi ma, ni vie ma na ronga bé ri ró atilo kpa na telefone chulu, apele video chulu, inga acho mesaje kpa dho. Ni di loti ni lai Wakristo na ró, ni si ni mbu nga kʉ ddiro nari bbai ndirigoti ni si ni mbu ngoi na. Njati ni rá ri utso d’i ni nanga ri d’o bbo ró, anzi wazee ndirigoti au kpadhó jidha dhi le tsotsokodha tso.​—Isa. 32:1, 2.

NGBARIBBAI MA LE KA LE BA NGOI CHɄ ADI NGABA NÁ LO DHI SAA NA NARI

8. Chʉ adi ngaba ná lo ká ka ndi sa nidhó ngoi ngbaribbai?

⁸ Njati rie nzá ni ro d’erie bani dda ngasa nari ma, rɨ ngaja nari ma, inga kazz ngabɨ nari na ri ró ni nanga ri ka ndi d’o bícha fø di ná lo njini ni ró ro. Njati ni ró ji ni ji ná ndrŭ cheni inga nidhó ritsi sani ró ni ka ni ba njedha, ni ka ni vi nidhó ngab’odha ndirigoti ni ka ni é thø na. Føri na mana nga kʉ ni ji le ndí ronga dhi ritsi bbo ri inga nidhó udha kʉ sese ri. Ni bani kpakpalo na nari dho nja ndrŭ ka ndima jiri ni é che kʉ ná ngaddidha na. (Yob. 1:11) Ro, ri ka ndi kaka ni ba ngoi. Ká ngbaribbai?

9. Yesu ká tayarisha ngʉe ko ngbaribbai chʉ adi ngaba ná lo dho?

⁹ Ano Yesu d’rangʉe ná unabi nga. I dz’ djó nja ndrŭ adi riddi nari kʉ, chʉ adi ngaba ná lo nzá ka ndi ba ndima nganga ro ri, ro ko churi chu ko di ná i saa na chʉ ngaba ná lo ka ndi é bí, ndirigoti ri kana nja ri ka ndi lø ko nganga ronga maddi. Yesu d’rangʉeri ndi unakpa dho nari kʉ “bbobbo rɨ ma” ndirigoti chʉ ngaba ná nja lo ma na ka ndi njieni mwisho si nari njí. (Lu. 21:11) Ke d’rangʉeri ki nari kʉ “sheria nanga ndrŭ d’ri nari ka ndi ndrieni ndri.” Loroji na, ndrŭ le che nari ma, fudjo ma, che kʉ ná nja lo ma na adi ngaba. (Mt. 24:12) Yesu nzá pongʉeri ro nari kʉ fø lo ka ndi bae nzɨ njínji Yova dho ná ndrŭ dhé ri. Føri dho, chi tøni Yova dho ná bí kʉ ná ndrŭ maddi adi bani chʉ ngaba ná lo na. (Isa. 57:1; 2 Ko. 11:25) Yova nzá ka ndi b’o ko ronga chʉ adi ngaba ná lo ró ddù chulu ri, ro ke si krʉ kodhó lo u ná lo bbʉ ko dho ndiro ko di ko ko thí jotso ko ro ndirigoti ko é ngoi na d’e.

10. Ká addudho njʉ le le tayarisha chʉ adi ngaba ná lo dho ná føri kʉ udha le dhǒ ri? (Mezali 22:3)

¹⁰ Ri ka ndi é sʉsʉ ko di ko ko thí jotso ko ro kpakpalo dhi saa na njati ko tayarisha ko ngbà ró. Nde, nzina ko tayarisha ko ná føri na mana ká kʉ ko nga kʉ udha na Yova djo ri? Ri nga kʉ føri. Ro, nzina ko ko tayarisha chʉ ngaba ná lo dho ná føri ridho ko kʉ udha na Yova kaka ndi b’o ko ronga. Ká addudho ko ripo fø? Mungu dzá lo rija ko dho ko tayarisha ko chʉ adi ngaba ná lo dho. (Azø Mezali 22:3.) Ndirigoti kodhó vichapo ma, kutaniko nǎ njudha ma, matangazo ma na chulu Yova dhó tengenezo adi loja bí ina ko dho le tayarisha le kpakpalo ka ndi banga nari dho.c Ko ká lirie ko thí Yova djo ngbà? Njati rie ngbà ró ko ka ko rrnga fø shauri dho njʉ dhé nzá mai chʉ adi ngaba ná lo d’e ngaba ro.

11. Margaret dhó loroji nǎ ro ká ni jifunza ngbá lo?

¹¹ Akonja le-ve Margaret dangʉe lu ná lo. Bbobbonga na kʉ ná kpa pongʉeri le dho, le rárá ndi bbá ro dhonalo ledhó eneo na kazz tangʉe gógó ro. Ndrŭ krʉ ngangʉe nganyidha tso théi abbaro, motokari ngʉe bí chu nǎ ndirigoti anzi le ra ná nga ro nga ngʉeri. Hewa nanga tingʉe mbi koi dzá lo dho, ndirigoti Margaret dho nzá ri kangʉe ndi vʉ ndidhó motokari nǎ ro ri. Nì mai ri kʉ føro, le dingʉe shi dhonalo le tayarisha ngʉe ndi bblo. Ledhó malete nǎ ngʉe ddikpa karte nari ka ndi koe le tsotso le ba fø eneo nǎ ro ndi nyi nga ná d’i chu d’e. Le vʉngʉe chu na tse ndiro fø karte ndi dyø nari si ndidho sʉsʉ lelenga ri u ná saa na d’e. Mbai bbo le njingʉe ná matayarisho dho, Margaret gøngʉe gø fø lo nǎ ro.

12. Ká addudho ringani ko dyø ko dho le bbʉ ná lojadha?

¹² Ndiro ko b’o ko ma, nja ndrŭ ma na ronga d’e, njaro bbobbonga na kʉ ná kpa ka ndima nziri ko di abba inga ko vʉvʉ abbaro inga ko dyø nja kʉ ná lojadha. Nja kʉ ná ndrŭ nzɨ adi ngarr fø lojadha dho ri, dhonalo kpa nzɨ adi riji ndima bbá ndima dhó ritsi ri. Wakristo ká ka ndima njiri ngbǎ? Biblia pori ko dho i: “Bboke djotsina anidjø ni ndrŭ kpe ná krʉ kʉ ná lo dho rie pi dho ma, ndi kʉ bbonga na nari dho, inga bbaguvernere dho ma ndima ke cho nari dho ri ró.” (1 Pe. 2:13, 14) Mungu dhó tengenezo maddi adi rija ko dho ko b’o ko ronga. Bí ina le adi rija ko bbʉ kodhó kpadjo kʉ ná adresi wazee dhona ndiro kpa si ko ba tsé lelenga riu ná saa na d’e. Ni ká njiri fø b’lo? Føri goti njaro le ka le ja lo ko di ko kʉ ná nga na inga ko rárá ndirigoti ko tsotso ka ndi kó ná ritsi djo inga nja ndrŭ tsotso ká ko ka ko kó ngbaribbai inga ngbá saa na ma nari djo. Anonga nari kʉ chi tøni ná fø kpetsi kpa adi ko djó nga nja. (Ebr. 13:17) Margaret pori, “Ma uri u nari kʉ, wazee ma, tengenezo ma na dhó chutso ddadha ma dyø nari i gøngʉe madhó shinga.”

13. Rara ndima di ná nga nǎ ro ná Wakristo dho ká addu adi hwè ma, ngoi ma na bbʉ?

¹³ Chʉ adi ngaba ná lo ma, la ma, ngbʉngbʉ dhi nja lo ma na rili bí kʉ le-djoi ma, le-vei ma na rárá ndima adi di ná nga nǎ ro, ro kpa kpakpanga nji bbo ndiro ndima chuni ndima dhó ø hali na d’e. Ndirigoti kpa njínji bbo Yova dzá njí kana. Kpa ra anzi “hwè dhi lo-i ndima d’ra” nari na, anziro ngʉe ná Wakristo nyingʉe nga njonjo kʉ ná nga lu ndrŭ ndima nzá nari dho ná saa na kpa njingʉeri nari bbai. (Mdo. 8:4) Lo kpa d’ra nari adi kpa tsotso kó ndima li ndima thí Pidhinga djo ndima dhó hali djo ndima lié ndima thí nari rɨngana. Føri dho kpa adi ndima dhó hwè ma, ngoi ma na ronga b’o bblo.

NGBARIBBAI MA LE KA LE BA NGOI NDRŬ LE NZA NÁ SAA NA NARI

14. Ndrŭ ko nzá nari ká adi kodhó ngoi sa ngbaribbai?

¹⁴ Ndrŭ di ko nzanza ná saa na ko ka ko kosa ngoi adi bbʉ ko dho ná bí kʉ ná ritsi. Ko e hwè na ko di njuni uhuru na, ko di lod’ra pʉlʉpʉlʉ, ndirigoti ko di krʉ ko adi nji ná ritsi nji nzɨ ko ko ndrŭ si sʉ prizo na nari do ro nji ro ró. Njati ko é fø uhuru ro na nga ró, ko nanga ri di d’od’o ndirigoti gosi ná lo do ka ndi di ko njinji. Fø le le mbu nari kʉ kawaida kʉ ná lo. Ro, ringani ko é krr. Yesu pongʉeri fø di ná nzadha ka ndi lieri ndi unakpa thí bʉni bʉ. (Yoh. 16:1, 2) Føri dho ko ká ka ko b’o kodhó ngoi ronga ngbaribbai nza ndrŭ ko nzá ná saa na?

15. Ndrŭ ko nzá nari do ká ringani ko nji nzá addudho? (Yohana 15:20; 16:33)

¹⁵ Mungu dzá lo ripo ko dho ɨ: “Krʉ jiri ndima di Mungu na le chini nari na ddironga Yesu Kristo ma na ná ndrŭ, ndrŭ si kʉ nzanza.” (2 Ti. 3:12) Andrei ró dho kʉ ná ke dho ringʉe kpakpa ndi u Yesu pongʉe ná fø lo kodhó njí le gʉngʉe kpadhó ngø nǎ ná saa na. Ke ngʉ riddi ɨ: ‘I bba Yova dzá Dimu kʉ bí, nde ri ká ka ndi kaka bbobbokpa sʉ ko krʉ?’ Fø ngaddidha nzá bbʉngʉe ngoi ro Andrei dho ri, ro ri lingʉeri ke nanga rid’o nari ra anzi. Nja le-djoi lingʉe ndima thí Yova djo, ndirigoti kpa nzɨ ngʉ riddi ndima ro nzá le ka le sʉ ri. Kpa chungʉeri chu ndima le ka le sʉ ngbà. Ro, kpa nanga ro nzɨ ri ngʉ d’o Andrei bbai ri. Føri dho ke vʉngʉeri ndi dyø kpadhó nganjadha ndirigoti ndi li ndi thí lú Mungu djo. Føro tsé ke bangʉe ngoi, ndirigoti kpadjo ke kʉ ngoi na nì mai kpakpalo kʉ ro. Ringani ko maddi njí ri føri bbai. Ko ndrŭ si nzanza nari Yesu pongʉe ná saa na, ke pongʉeri ri ka ndi kaka ko tøni chi maddi.​—Azø Yohana 15:20; 16:33.

16. Nzá ndrŭ ko nzá ná saa na ká ringani ko rrnga ngbá lojadha dho?

¹⁶ Njati le gʉ kodhó njí gʉ ró, ko ka ko ba lojadha tawi nǎ ro ma, wazee dhó ro ma. Fø ri ka ndi liri ko ronga b’oni b’o ndirigoti ko rá anzi kiroho nǎ nyo ko ba nari na ndirigoti ko rá anzi lod’radha na ngbà ri ka ndi ka ná ngatsi. Anji krʉ kʉ ná kpakpanga ni rrnga fø lojadha dho ri é nzá ma ni famu ri ká le bbʉ addudho ma nari bblo ri ró. (Yak. 3:17) Nzɨ tu siri kʉ ná longa le-djoi ma, le-vei ma na djo inga kutaniko na njí djo nga kʉ haki na ndima chu ri ná kpa dho.​—Muh. 3:7.

17. Karne ya kwanza nǎ mitume bbai ká ko ka ko njí addu?

¹⁷ Shetani adi la nji Mungu dzá ndrŭ tso ró dho ná ya kwanza sababu kʉ, “kpa adi nji ná njí kʉ ndima d’ralo Yesu djo.” (Ufu. 12:17) Nzɨ bbari Shetani ma, ndidhó dz’ ma na tá do ni na. Le lod’ra ndirigoti le longaddi nì mai upinzani kʉ ro nari adi hwè ma, ngoi ma na bbʉ ko dho. Karne ya kwanza na Wayaudi djó bbobbonga jangʉeri mitume bbá lod’radha tso ná saa na, chi ngʉ tøni ná fø kpetsi kpa vʉngʉeri ndima rrnga Mungu dho. Kpa rangʉe anzi dhé lo ndima d’ra nari na ndirigoti fø njí lingʉeri kpa é hwè na. (Mdo. 5:27-29, 41, 42) Bbʉbbʉ dhé kodhó njí le gʉgʉ ná saa na, ringani ko d’ralo krr ko kʉ ro. (Mt. 10:16) Ro, njati ko njí krʉ kʉ ná kpakpanga ngbà ró, ko si kʉ Mungu ji ná lo le nji nari ma, ndrŭ dhó shinga gø ná lo le d’ra nari nǎ ro adi si ná ngoi ba.

“NGOI DHI MUNGU SIE NI NA NÌ”

18. Bbʉbbʉ ngoi ká ko ka ko ba ie dhó ro?

¹⁸ Auri u njati ko bani bbo kʉ ná kpakpalo na ma ró, ri ka ndi kaka dhé ko ba ngoi. Fø di ná saa na ringani ko nonga nari kʉ, kodhó loji Mungu dhó ro si ná ngoi, føri kʉ Yova dhé adi bbʉ ná ngoi. Ali ni thí ke djo nya ndi nanga nyá ná dhe ma, chʉ adi ngaba ná lo ma, ndrŭ le nza nari ma na tso ró ni hwini ná saa na. Adi chøchø kedzá tengenezo ró. Ali ni nyǒ ni njí kʉ ná bbo thonga ná saa djo, ni njiri føro, “ngoi dhi Mungu sie ni na nì.” (Flp. 4:9) Gosi ná lo nǎ ko si ngbaribbai ma ko ka ko kó ko lai Wakristo tsotso Mungu dhó ngoi ndima bae nari tso ró ndima hwini ro nari nja.