LONGANEDHA DHI RI 37
DYI 118 “Andri kodhí udha ki”
Ko tsotso ka ndi kó ndiro ko ve ngatso chi ko tøni ro kpø mwisho djo d’e ná barua
“Akotøni kprɨ anziro ko ungʉe ná lo kana kpø mwisho djo.”—EBR. 3:14.
RI NǍ LO
Waebrania kʉ ná Wakristo dho ndingʉeni ná barua nǎ kʉ ná shauri ka ndi kó ko tsotso ko ve ngatso chi ko tøni ro kpø i dz’ si ndidzá mwisho na ná nga djo.
1-2. (a) Waebrania dho Paulo ndingʉe barua ná saa djo ká Yudea nǎ hali ngʉe ngbaribbai? (b) Fø barua nǎ lo na mana ká ngʉe kpa dho bbo addudho?
CHO 33 na Yesu dhe nari goti Yerusalemu ma, Yudea ma na nǎ ngʉe ná Wakristo bangʉeni bí kʉ ná kpakpalo na. Wakristo dhó kutaniko tso ngani nari goti tse, ndrŭ nzangʉe kpa bbo. (Mdo. 8:1) Fønga djó ro cho da 20 nari goti, ù chingʉe kpa bba ndirigoti kpa ngʉ bani mbø dhi kpakpalo na. (Mdo. 11:27-30) Ro, cho 61 na Y.G. G, Wakristo bangʉe sese kʉ ná ngoi ro, le ddieri luti kpa sie bani na ná nzadha na ró. Fø saa na, Yova ddangʉe chutso mutume Paulo dho ndiro ke chó ddikpa barua kpa dho d’e. Fø barua nǎ ngʉe kpadhó lo ungʉe ná shauri nganga ndiro kpa tayarisha ndima karrnga goti ndima sie bani na ná kpakpalo dho d’e.
2 Waebrania dho Paulo ndingʉe ná fø barua singʉe bblo saa djo dhonalo kpa bangʉe ná fø ngoi nzá ka ndi die theinga dho ri. Paulo bbʉngʉe bblo pli kʉ ná shauri fø Wakristo dho nari ka ndi sie kpa tsotso ko ndiro kpa ve gosi ná saa djo kpa ka ndima sie bani na ná kpakpalo tso d’e. Yesu pongʉeri nari bbai, Wayaudi bbá pidhinga tso sie d’ø ná ddo ngʉe chøchø. (Lu. 21:20) Bbʉbbʉ dhé, Paulo ma, Yudea nǎ Wakristo ma na krʉ nzá chungʉe fø lo ká sie ngaba ngbá saa djo ma nari ro ri. Føri dho, go gʉ di ná fø saa kana fø Wakristo ka ndima njíe kpakpanga ndiro ndima li ndima dho udha ma, ngatsovedha ma na kpakpa d’e.—Ebr. 10:25; 12:1, 2.
3. Waebrania dho le ndingʉe ná fø barua ro ká ringani Wakristo li ndima dyu njʉ addudho?
3 Karrnga goti ko si bani na ná mbudha si dada Waebrania bangʉeni na ná ri djolu. (Mt. 24:21; Ufu. 16:14, 16) Føri dho akoddinga Yova bbʉngʉe fø Wakristo dho ná shauri ro djo dhonalo ri ka ndi kó ko tsotso maddi.
“ADHIDHI KIROHO NǍ”
4. Wakristo ngʉngʉe ná Wayaudi ká bangʉeni ngbá kpakpalo na? (Anja ji maddi.)
4 Wakristo ngʉ ná Wayaudi dho ringangʉeni ndima ø bí kʉ ná lo thika, ná føri ro nga ngʉe sʉsʉ ri. Anziro, Wayaudi ngʉe vʉ Yova vʉ ndi dho ná ndrŭ tsɨ. Cho bí kana Yerusalemu ngʉe bbo na mana ngʉe ná bba, Yova rɨngana ngʉ adi dhoni ná pikpa ngʉ adi pinyo fø bba gʉ, ndirigoti ngbà jiri ndima má Yova ná ndrŭ ngʉ adi si ke ma Yerusalemu na. Chi tøni ná Wayaudi krʉ ngʉ adi Musa dhó yadha dyø dini na bbobbonga tu ri nanga ndima dho nari bbai. Fø mafundisho i ngʉ adi chutso ddá kpa dho nyo le chi (mafungo) nari ma, toara ma, nga kʉ Wayaudi ná ndrŭ na ká kpa ka ndima njini ngbaribbai ma nari ma na djo. Ro, Yesu dhe nari goti nzɨ Yova ngʉ adi hekalu nǎ Wayaudi ngʉ adi bbʉ ná bbʉdha ki ro u ri. Fø lo ngʉe kpakpa Wakristo ngʉngʉe ná Wayaudi dho, dhonalo kpa chungʉeni b’lo Musa dhó yadha ndima dyø nari na. (Ebr. 10:1, 4, 10) Kpakpa dhó udha kʉ ná Wakristo dho ma nga ddi fø lo ro ngʉe sʉsʉ ri. Loroji na, Petro dho ma ringʉe kpakpa ddi. (Mdo. 10:9-14; Gal. 2:11-14) Fø Wakristo ungʉe ná fø lo djotsina, Wayaudi bbá dini djó bbobbonga ngʉ adi kpa nzanza.
Wakristo dho ringangʉeni ndima tøni kprɨ bbbʉbbʉlo kana ndirigoti ndima nyi Wayaudi bbá dini nǎ ndima tso ro ngʉ adi tøni ná kpadhó ngaddidha (Anja paragrafu 4-5)
5. Wakristo dho ká ri ngʉ ngani ndima b’o ndima ronga ngbá lo ró?
5 Yudea nǎ Wakristo tso ró ngʉ adi ddani ná kikundi ngʉe aro ddi. Ya kwanza, ri ngʉe Wayaudi bbá dini djó bbobbonga, ná fø kpa ngʉ adi fø Wakristo nja tsatsa udha ró nari bbai. Føri kina, kutaniko nǎ nja ndrŭ ngʉ adi ripo kpadho ringani ndima dyø Musa dhó sheria. Njaro ndrŭ ngʉ ripo fø ndiro nzɨ Wayaudi kpa nzanza ró. (Gal. 6:12) Fø Wakristo tsotso ká ngbá lo ka ndi kóe ndiro ndima tøni chi Yova dho d’e?
6. Paulo ká lingʉe ndi lai Wakristo kpakpa ngbaribbai? (Waebrania 5:14–6:1)
6 Waebrania dho ndi ndingʉe ná barua nǎ, Paulo lingʉe ndi lai Wakristo kpakpa ndiro kpa di Mungu dzá lo zø ndirigoti kpa di ngaddi bbo ri nǎ lo djo d’e. (Azø Waebrania 5:14–6:1.) Waebrania dho ndi ndingʉe ná fø barua chulu, Paulo dhongʉe ngbaribbai ma Wakristo Yova má ná chu kʉ bblo pli Wayaudi ngʉ Yova má ná chu djolu nari.a Paulo lingʉe fø Wakristo kpakpa kpa chu ndirigoti kpa famu Biblia nǎ bbʉbbʉlo bblo pli ndiro kpa d’i kali dhi mafundisho utso ndirigoti kpa pʉ ri pʉ ndima ró ro d’e.
7. Njʉ ká ko adi bani ngbá kpakpalo na?
7 Njʉ ko di na ná ndrŭ adi nzá tso gbani Yova dhó yadha na ná lo ma, ngaddidha ma na nanga pli. Nja ndrŭ adi ripo Yova dzá Dimu kʉ che dhonalo kpa adi ngarr Biblia d’ra ngono djo ná lo dho. Dz’ dzá ndrŭ dhó ngaddidha ngʉ njonjo bbo Yova dhó ri ró ro. (Mez. 17:15) Føri dho, ri kʉ bbo na mana kʉ ná lo ko d’i che kʉ ná ngaddidha utso ndirigoti ko pʉ ri pʉ ko ró ro. Ri nzá ngani ko bbari kodhó mbubai tá do ko na ndirigoti kpa liri ko bbá Yova dho ko njínji nari tso ri.—Ebr. 13:9.
8. Nde, addui ká ka ndi kó ko tsotso ko dhidhi kiroho nǎ d’e?
8 Paulo pongʉeri Waebrania dho kpa ra anzi dhi ndima dhi kiroho nǎ nari na ndirigoti ko dho maddi ringani ko njiri fø. Føri na mana kʉ, ringani ko di Biblia zø li ko li ko dyu ro ndiro ko chu Yova ma, kedhó ngaddidha ma na bblo pli d’e. Rie b’lo ma ko ba batiso ró, ringani ko ra fø ko rinji nari na anzi dhé. Rie cho thɨ ma ko nji bbʉbbʉlo kana ri ró, ko krʉ dho ringani ko di Biblia zø krʉ ddo ró. (Zb. 1:2) Krʉ ddo ró ko Biblia zø ná føri chulu ko adi kodhó udha li kpakpa, føri kʉ Waebrania dho Paulo jangʉeri kpa é na ná sifa.—Ebr. 11:1, 6.
“AKODI UDHA NA NJA KO B’O KODHÓ SHINGA RONGA D’E”
9. Waebrania dho ká ri ngʉ ngani ndima dhó udha é kpakpa addudho?
9 Waebrania dho ri ngʉ ngani kpadhó udha é kpakpa ndiro kpadhó shinga ronga sie b’oni Yudea si sani ná saa djo d’e. (Ebr. 10:37-39) Yesu jangʉeri ndi unakpa dho Yerusalemu ronga tso bassødda si d’e ró, kpa si nga nyi glʉ djo. Kedhó fø shauri ka ndi kóe Wakristo krʉ tsotso, kpa ée Yerusalemu nǎ inga Yudea nǎ nja bba gʉ lu ma ró. (Lu. 21:20-24) Lɨ ta ná saa na, nja bba gʉ lu ngʉe ná ndrŭ krʉ ngʉ adi nganyi Yerusalemu na dhonalo ri ró lubba ka ndi b’oe ndrŭ ronga b’o. Ro, ngøtsi djo le nganyi ná føri ka ndi njaeni nga kʉ d’ʉ ná lo bbai ndirigoti fø lo dho le ngarr nari dho ri ngʉ ngani ledhó udha é kpakpa.
10. Kpakpa kʉ ná udha ká ka ndi choe Wakristo ronga kpa njiri ngbǎ? (Waebrania 13:17)
10 Godhé, Waebrania dho ringangʉeni kpa li ndima thí li Yesu lingʉe chutsoddadha dho kutaniko nǎ ná kpa djo. Njaro fø kpa bbʉngʉe chutsoddadha ngbá saa na ma ndirigoti ngbaribbai ma ndrŭ ka ndima nyie nga nari djo ngbà. (Azø Waebrania 13:17.) “Mutume Paulo pongʉeri ndi djoi ma, ndi vei ma na dho “kpa di ngarr ndima dho chutso ddá ná kpa dho.” Ke nzɨ ngʉ ripo kpa di ngarr ndima dho ringani ndima di rinji fø nari dho ri, ro kpa di rinji fø ndima ndima thí lili wazee djo nari dho.” Føri dho, Waebrania dho ri ngʉ ngani ndima chu ndima thí ndima li wazee djo nari ma, kpadhó chutsoddadha ndima dyø nari ma na nzá mbudha d’e si nari njí. Njati Wakristo di ngarr chutso ddá ná kpa dho ngoi dhi saa djo ró, ri sie sʉsʉ kpa rrnga kpakpalo dhi saa djo.
11. Njʉ ká ringani Wakristo é kpakpa kʉ ná udha na addudho?
11 Waebrania bbai, kodhó lo maddi uri ko é udha na. I dz’ tso si d’ø na ddo kʉ chøchø nari ro nzɨ bí kʉ ná ndrŭ adi u ri. Ndirigoti kpa adi ko gbogbo fø lo ko u nari dho. (2 Pe. 3:3, 4) Føri kina, ngbà mai Biblia d’ra bbò mbudha dhi saa djo si njini ná nja lo ro ko dho ro, nzá ko chu ná lo kʉ bí. Føri dho ringani ko uri u nari kʉ, Yova vʉ i dz’ tso ndi si d’ø ná saa b’lo ndirigoti ke si ko ronga b’ob’o fø saa na.—Hab. 2:3.
12. Ko tsotso ká addu si ko ndiro ko gø bbò mbudha dhi saa na d’e?
12 Ringani ko uri ko thí nǎ ro krʉ nari kʉ, Yova adi chutso ddá ko dho njʉ, “nyodyu dhi chi njí dhi noke” chulu. (Mt. 24:45) Bbò mbudha tso si ngani ná saa na, njaro ko si kodhó shinga ka ndi gø ná nja lojadha ba, Waroma d’engʉe Yerusalemu ronga tso ro Wakristo bangʉe ri nari bbai. Ri kʉ bbo na mana kʉ ná lo ko di ko thí li njʉnga djó ro Yova dhó tengenezo nǎ chutso ddá ko dho ná kpa djo. Njati rie nzɨ ko ko thí li kpa djo ndirigoti rie nzɨ ko ngarr kpa bbʉ ná chutsoddadha dho njʉ ri ró, ri sie kpakpa ko rrnga kpadho bbò mbudha dhi saa na.
13. Waebrania 13:5 nǎ shauri na mana ká kʉ bbo addudho?
13 Nga ndima si nyi nari ndima ngʉ b’o ro, Waebrania dho ringangʉeni ndima ngʉ ndima dhó maisha tso dhʉdhʉ, ndirigoti ndima pʉ “bbo le ji mbø nari ndima ró ro.” (Azø Waebrania 13:5.) Kpa kana nja kpa ro ù ro chingʉe b’lo ndirigoti nja kpa ro ngʉe njedha maddi. (Ebr. 10:32-34) Nì mai kpa ngʉe tayari ndima ve kpakpalo tso hwè lo-i dzá bblonga dho ro, kpa kana nja kpa ka ndima die ri mbu ndima ne mbø bbo ndiri b’o ndima ronga hatari ró inga njedha ró d’e. Ro, Yerusalemu sie sani ná saa na, fø mbø nzá ka ndi gøe kpadhó shinga ro ri. (Yak. 5:3) Bbʉbbʉ dhé, bbo jingʉe kimwili nǎ ritsi ná ndrŭ dho ri ka ndi ée kpakpa ndima nyinga ndirigoti ndima bbá ndima dhó dza ma, ndima dhó nja ritsi ma na ndima goti.
14. Njʉ ká kpakpa kʉ ná udha ka ndi liri ko vʉ lonanga bblo kimwili nǎ ritsi djo ngbaribbai?
14 Njati ko li kodhó udha kpakpa Yova si che kʉ ná i dz’ sa ná ddo kʉ chøchø nari djo ró, ko nzá ka ko di rinja mbø kʉ ledhó bbo inga ritsi kʉ ledhó bí ná føri na mana kʉ bbo ri. Bbò mbudha dhi saa na mbø na mana ro nga sie ri, Biblia ripo, “Ndrŭ si ndima dhó feza bu chu lu” dhonalo kpa si ri famu nari kʉ, “Feza ma, or ma na nzá ka ndi gø ndima dhó shinga ro Yova dzá thø ddo dyina ri.” (Eze. 7:19) Ko dié ko thí li mbø djo nari rɨngana, ringani ko nanga vʉ ná lo di rili ko é kiasi na kodhó maisha nǎ. Føri na mana kʉ nzɨ ko tsu ngana mana kʉ ná ddeni ko na inga nzɨ ko di rine kimwili nǎ ritsi é kodhó bí. Føri kina, ringani ko di krr ndiro nzɨ b’lo ko ba kimwili na ná ritsi di kodhó saa d’u bbo ró. (Mt. 6:19, 24) I dz’ tso si d’ø ná ddo kʉ chøchø nari bbai, ringani ko vʉ ko ká ka ko li ko thí Yova djo inga kodhó kʉ ná ritsi djo ma nari nanga.
“NIDHÓ LO U NGATSOVEDHA”
15. Waebrania ngʉe ná Wakristo dhó lo ká ungʉe ngatsovedha bbo addudho?
15 Waebrania ngʉe ná Wakristo dhó lo ungʉe ngatsovedha ndiro ndima njínji Yova dho d’e, dhonalo kpakpalo ka ndi sie ngaba karrnga goti. (Ebr. 10:36) Ngbà mai fø Wakristo kana nja kpa nzangʉeni bbo anziro ro, kpa kana bí kʉ ná kpa ro nzá d’engʉe nzani ri. Føri dzá lo dho Paulo jangʉeri kpa tayarisha ndima bbo kʉ ná nzadha dho ndirigoti kpa tøni chi kpø dhe djo, Yesu njingʉeri nari bbai. (Ebr. 12:4) Bí kʉ ná ndrŭ ngʉngʉe Wakristo nari dho, bí kʉ ná Wayaudi ngʉe thø na ndirigoti kpa ngʉ adi fø ndrŭ nzanza. Fønga njí dangʉe ná cho na, Paulo ngʉ lod’ra Yerusalemu nǎ ro, biro biro kʉ ná ndrŭ tøngʉeni ke tso ro. Dada 40 djolu ná Wayaudi “tsongʉeni tso nari kʉ ndima nzɨ nganyo inga dda jø ri njati ndima d’e Paulo hwi nzá ró.” (Mdo. 22:22; 23:12-14) Ngbà mai ndrŭ ndrongʉe kpa ndro ndirigoti ndrŭ ngʉ kpa nzanza ro, fø Wakristo dho ringangʉeni ndima ra anzi dhé Yova ndima má nari ma, lo ndima d’ra nari ma, kpakpa ndima ndima dhó udha li nari ma na na.
16. Waebrania dho le ndingʉe ná fø barua ká ka ndi kó ko tsotso ko é bblo kʉ ná nganjadha na ndrŭ ko nzá nari djo ngbaribbai? (Waebrania 12:7)
16 Waebrania ngʉe ná Wakristo tsotso ká addu ka ndi kóe ndiro kpa ve ndrŭ ndima nzá nari tso d’e? Paulo jingʉeri fø Wakristo li ndima thí nzadha tso le ve nari nǎ ro adi si ná faida djo. Ke tungʉe ri nanga kpa dho nari kʉ, Mungu adi ribba kpadhó udha mbuni ndiri chulu ndi bbʉ formasio kpa dho d’e. (Azø Waebrania 12:7.) Fø formasio ka ndi ddie longa kpa dho inga ndi liri kpa rá anzi Yova dho ndima hwè bbʉ nari na. Nzadha nǎ ro adi si ná bblolo djo kpa ndima thí li ná føri ka ndi lieri rie sʉsʉ kpa ve ngatso.—Ebr. 12:11.
17. Paulo ká chungʉe ngbá lo nzadha tso le ve nari djo?
17 Paulo jangʉeri Waebrania ngʉe ná Wakristo dho kpa di nga nǎ do ro ndirigoti nzɨ kpa d’i ji kpakpalo na ndima bani ná saa djo. Mutume Paulo ka ndi bbʉe bblo kʉ ná shauri ngbaribbai ma le ka le ve nzadha tso nari djo. Dhonalo nzá ke d’e ngʉ Mukristo nari njí ke nzangʉe Wakristo bbo ndirigoti ke njangʉe ngbaribbai ma ndrŭ ngʉ adi njini kpa na nari nja. Føri kina, ke chungʉe ngbaribbai ma le ka le ve nzadha tso nari chu. Godhé, b’lo ke ngʉ Mukristo nari goti ma ke nzangʉeni njonjo chu lu ddi. (2 Ko. 11:23-25) Føri dzá lo dho Paulo chungʉe ngbaribbai ma le ka le ve nzadha tso nari bblo pli. Ke nongʉe nga fø Wakristo dho nari kʉ, nzadha dhi saa djo ri nzá ngani kpa li ndima thí ndima djo ri, ro Yova djo. Paulo ka ndi poeri nga nǎ do ro: “Yova kʉ ma tsotso kó ná ke; ma nzɨ do ro nji ri.”—Ebr. 13:6.
18. Ko tsotso ká addu ka ndi kó ndiro ko ve gosi ná saa djo ko si bani na ná nzadha tso d’e?
18 Ko djoi nja kpa nzadha tso ve njʉ. Ko ka ko dhǒ jidha fø kpa dho sala ko nji kpa dho nari chulu ndirigoti nja saa na ko ka ko kó kpa tsotso kpadhó lo u ná ritsi na. (Ebr. 10:33) Biblia pori pʉlʉ, “chi riji ndima tøni Mungu dho ddi ndima tso gbani Yesu Kristo na, ro ná ndrŭ maddi ndrŭ si nzanza.” (2 Ti. 3:12) Føri dzá lo dho, ko krʉ dho ringani ko tayarisha ko gosi ná saa djo ko si bani na ná kpakpalo dho. Akora anzi ko thí nǎ ro krʉ ko ko thí li Yova djo nari na, ndirigoti ako uri u nari kʉ, ke si ko tsotso koko ndiro ko ve gosi ná saa djo ko si bani na ná kpakpalo krʉ tso d’e. Bblo kʉ ná saa djo, ke si nì tøni ndi dho chi ná ndrŭ krʉ dhó kpakpalo sisi.—2 Te. 1:7, 8.
19. Ko ká ka ko tayarisha ko bbò mbudha dho ngbaribbai? (Anja ji maddi.)
19 Bbʉbbʉ dhé, Waebrania dho Paulo ndingʉe ná fø barua kongʉe karne ya kwanza na Wakristo tsotso bbo ndiro kpa tayarisha ndima gosi ná saa djo sie njini ná lo dho d’e. Paulo jangʉeri ndi djoi dho kpa zø Mungu dzá lo li ndima li ndima dyu ro ndirigoti kpa famu ri bblo pli. Fø kpa rinji nari ka ndi kóe kpa tsotso kpa d’i pʉ ndima ka ndima pʉ ndima ró ro ná lo utso, dhonalo ri ka ndi djøe kpadhó udha djø. Ke chongʉe kpa ronga kpa li ndima dhó udha kpakpa ndiro kpa é tayari ndima dyø Yesu ma, kutaniko nǎ chutso ddá ná kpa ma na dhó ro si ná chutsoddadha d’e. Ke kongʉe Wakristo tsotso kpa ve ngatso bblo kʉ ná nganjadha na ndima kʉ nzadha djo nari chulu ndirigoti kpa di nzadha nja formasio Yova bbʉ ndima dho ná chu. Ko ma ka ko njínji ddi Biblia bbʉ ná fø shauri na. Njati ko njiri fø ró ko si tøni chi kpø mwisho djo.—Ebr. 3:14.
Chi tøngʉeni ná Wakristo ronga lengʉeni le ndima dhó ngatsovedha djotsina. Yudea nǎ ro ndima nyinga nari goti kpa rangʉe anzi dhé nju ndima njuni nari na. Følo nǎ ro ká ko ka ko ba ngbá somo? (Anja paragrafu 19)
DYI 126 Adi kere, atøni kpakpa
a Paulo tilo Maandiko ya Kiebrania nǎ lo djo sabba ina ndiri na ndi dhǒ Wakristo Yova má ná chu kʉ bblo pli Wayaudi ngʉ adi Yova má ná chu djolu nari d’e.—Ebr. 1:5-13.