Kodhó lo zø ná kpa adi dhu ná lo

Sulemani chingʉe ná hekalu na le tsu ná nga dzá danga ká ngʉe ngbá ngatsi?

Fø ngalu le ngʉ adi tsu hekalu nǎ Takatifu kʉ ná nga na. Cho 2023 njí ngʉe ná Biblia Tafsiri Ya Ulimwengu Mupya pongʉeri, “tsu le ngʉ adi tsu ná nga dzá ládhanga ngʉe le kù 20, føri kʉ dza dzá bonga na ddiddi ndirigoti arø ridzá danga ngʉe le kù 120.” (2 Ny. 3:4) Luga nanga tu ná nja kpa pori arø ri dzá danga ngʉe “le kù 120,” ná føri nǎ mana kʉ ri ngʉe metre 53 (175-maelezo ya chini) arø!

Ro, 2023 na vʉngʉe ná Tafsiri Ya Ulimwengu Mupya pongʉeri Sulemani dhó hekalu na le tsu ná nga djo: “Arø ri dzá danga ngʉ le kù 20,” inga metre 9 (30 maelezo ya chini).a Anja fø lo thika le thɨ dho ná sababu ro sese di.

1 Wafalme 6:3 nǎ nzá le tilo ro tsu le ngʉ adi tsu lu ná nga dzá danga djo ri. Fø verse nǎ, ri ndingʉe ná ke Yeremia ndi ri dzá ládhanga ma, ri dzá atsi tsu ná nga ma na, ro nga arø ká ri dzá danga ngʉe ngbá ngatsi ma nari ri. Føri goti ro kʉ ná sura nǎ, ke tilo hekalu ró bbo na mana ngʉe ná nja sehemu djo. Føri i kʉ ddo le ddo ná chuma dhi jʉdda ma, kumi ngʉe ná sharete ma, tsu le tsu ná nga njí ngʉe ná aro ngʉe ná tødha ma na kuivre na le thɨngʉe ndi ro. (1 Fa. 7:15-37) Njati rie bbʉbbʉ mbaraza dzá arø ra ná nga dzá danga dangʉe da 50 metre djolu ndirigoti ri dangʉe da hekalu ró nja nga dzá arø ra ná nga dzá danga djolu ri ró, Yeremia ká ndingʉe ri dzá danga nzá addudho? B’lo cho da bí føri goti ro, Wayaudi bbá historia ndi ná kpa pongʉeri mbaraza dzá arø ra ná nga dzá danga ro nzá dangʉe Sulemani dhó hekalu ró nja nga djolu ri.

Darasa zø ná kpa nanga rɨni rɨ hekalu ró dzaikpa ká ka ndi d’ue le kù 120 dzá danga kʉ ná fø mbaraza bbʉbbʉ nari djo. Drrdrr ndrŭ ngʉ adi chi briki inga dju na ná dza dherr nditso ngʉe bbo ndirigoti arø ri ngʉe gbagbá, loroji na Misri nǎ hekalu ró dzaitso dingʉe fø. Ro, Sulemani chingʉe ná hekalu nga ngʉe fø ri. Darasa nji ná kpa pori ri nditso nzá dangʉe le kù d’eti 6 inga metre 2.7 (9 maelezo ya chini), djolu ri. Fø lo ró ro dza ngʉ adi chi drrdrr ná ke Theodor Busink pori: “Ngbá ngatsi ma dzaikpa nditso ngʉe nari ró ro, [hekalu na le tsu ná nga] dzá danga ro nzá ka ndi sie le kù 120 [arø ri].”

2 Mambo ya nyakati 3:4 ka ndi é kosa kpa ndingʉe ndi nǎ ro. Ngbà mai nja drrdrr buku nǎ fø verse po “120” ro, li djo le ka le li le thí ná nja buku po “le kù 20.” Loroji na, karne ya 15 nǎ Codex Alexandrinus ma, karne ya 16 nǎ Codex Ambrosianus ma na. Nde, ngandi ná ke ká ka ndi ndie “120”, 20 rɨngana addudho? Le ripo “mia ddi” ndirigoti “le kù” ná fø lo le adi ndi na Kiebrania nǎ ná lo dirie ddiddi. Føri dho, njaro ngandi ná ke ndingʉe “mia ddi” “le kù” rɨngana.

Bbʉbbʉ dhé, nì mai ko e rimbu ko famu fø lo ndirigoti ko dhǒ Sulemani dhó hekalu dzá bbʉbbʉnga ro, ko e ko thí li fø hekalu ngaddi ko dho ná lo djo, føri kʉ kiroho nǎ bbò hekalu. Ko adi mbai po bbo Yova nzi ndi dho njínji ná ndrŭ krʉ ndima si ke ma fø hekalu na nari dho!​—Ebr. 9:11-14; Ufu. 3:12; 7:9-17.