Ad’u ni dho ringani ni d’ú ná no ndirigoti abu nja ri bu ni djó ro

1. Waebrania 12:1 ridho nari bbai, ri ká ngani ko njí addu ndiro ko d’á shinga dhi ngø kpø mwisho djo d’e?

WAKRISTO ko kʉ ro kodhó maisha Biblia ddi ngø le d’a nari na. Ngbà d’á kpø mwisho djo ná kpa si choro nŭnŭ di ná shinga ba. (2 Ti. 4:7, 8) Ringani ko njí kpakpanga bbo pli ndiro ko rá anzi ngø ko d’a nari na d’e, dhonalo ko si chøchø bbo kodhó ngø dzá mwisho na. Mutume Paulo d’angʉe shinga dhi ngana le mba ná ngø kpø mwisho djo nari dho, ke pongʉe ná lo ka ndi kó ko tsotso ko si kpø ko d’a ná ngø dzá mwisho na. Ke pongʉeri, ko “bu li o ná no krʉ ko djó ro ndirigoti . . . ko d’á ko njí le li ná ngø ngatsovedha na.”​—Azø Waebrania 12:1.

2. Le ripo le “bu li o ná no krʉ le djó ro” ná føri na mana ká kʉ addu?

² Mutume Paulo ndingʉeri ringani ko “bu li o ná no krʉ ko djó ro” ná saa na ká ke ngʉ riji ndi pori Mukristo dho ringani ndi d’ú ná no ro kʉ nga? Ke nzɨ ngʉ ripo fø ri. Ro, ke ngʉ ripo ringani ko bu nga kʉ lazima ná no krʉ ko djó ro. Fø di ná no ka ndi liri ko o li ndirigoti ko njeni nje. Ndiro ko ve ngatso d’e, ringani ko njí lelenga ndiro ko d’i ko ká fø di ná no d’ú ddi ma nari utso ndirigoti ko bu ri théi ko djó ro d’e. Nì mai ri kʉ føro, ri nzá ngani ko bu ngbà ringani ko d’ú ná no ko djó ro ri. Njati ko bu fø no bu ko djó ro ró, ko nzá ka ko má ngø d’a ná ndrŭ kana ri. (2 Ti. 2:5) Nde, ri ká ngani ko d’ú ngbá no?

3. (a) Wagalatia 6:5 ripo nari bbai, ri ká ngani ko d’ú ngbá no? (b) I lo nǎ ká ko si ngbá lochu ndirigoti addudho?

³ Azø Wagalatia 6:5. Paulo d’rangʉe ko dho ringani ko d’ú ná no d’ra. Ke ndingʉeri “nja ke ddiro si ndi nganga djó no d’u.” Iga Paulo loti djo nari kʉ Mungu nzi ndi dho njínji ná ndrŭ krʉ tso ná lo, ná fø lo ro nzá d’i le ka ndi njí ko dho ri. I lo nǎ ko si ko “nganga djó no” ká tsu ngbá lo ndi nǎ ndirigoti ngbaribbai ma ko ka ko d’ú ri nari nja. Ndirigoti ko si nga kʉ lazima ná no utso d’i ndirigoti ko si ngbaribbai ma ringani ko bu ri ko djó ro nari nja. Ko nganga djó no ko d’ú ndirigoti nga kʉ lazima ná no ko bu ko djó ro nari si ko tsotso ko ko d’á shinga dhi ngø kpø mwisho djo.

KO DHO RINGANI KO D’Ú NÁ NO

4. Yova dho ko bbʉngʉe ko ná fø tsodha ká kʉ li o ná no nga addudho? (Anja ji maddi.)

⁴ Yova dho ko bbʉngʉe ko ro ko njingʉe ná tsodha. Yova dho ko bbʉngʉe ko ná saa na, ko tsongʉeni ko bbʉ madha ke dho ndirigoti ko nji ke ji ná lo. Ringani ko b’o fø tsodha ronga b’o. Fø tsodha ró njí ko nji nari kʉ bbo pli kʉ ná daraka, ro ri i nga kʉ li o ná no ri dhonalo ko Yova nongʉe ko njí ndi ji ná lo. (Ufu. 4:11) Ke nongʉe ko na ná ù kʉ ko chu ndi ndirigoti ko bbʉ madha ndi dho ndirigoti ko ke nongʉe ndi ró ji ró. Føri adi rili ko ndrini chøchø ke ro ndirigoti ko ba hwè ke ji ná lo ko nji nari nǎ ro. (Zb. 40:8) Mungu ji ná lo ko nji ndirigoti ko di le Ddù dyø ró ko “adi klø ba.”​—Mt. 11:28-30.

5. Ni tsotso ká addu ka ndi kó ndiro ni njí Yova dho ni njingʉe ná tsodha ró njí d’e? (1 Yohana 5:3)

⁵ Ni ká ka ni d’ú ni djó no ngbaribbai? Ni tsotso ka ndi kó ná lo kʉ aro. Ya kwanza, ara anzi kpakpa ni nidhó jidha li Yova djo nari na. Føri ni ka ni njí b’lo ke njirie ni dho ná bblo lo ma, gosi ná saa na ke si bbʉ ni dho ná ledha ma na djo ni ngaddi bbo nari chulu. Nidhó jidha di dhi bbo Mungu djo ró, ri sie sʉsʉ ni rrnga ke dho. (Azø 1 Yohana 5:3.) Ya pili, adyø Yesu. Ke dho ri kangʉe ka ndi njí Mungu ji ná lo dhonalo ke nzingʉeri Yova kó ndi tsotso ndirigoti ke lingʉe ndi thí ndi njí ngʉe ná ledha djo. (Ebr. 5:7; 12:2) Yesu bbai, anziri Yova bbʉ kpakpanga ni dho ndirigoti adi ngaddi bbo ni kʉ na ná ngab’odha kʉ ni si choro nŭnŭ di ná shinga ba nari djo. Njati nidhó jidha dhidhi Mungu djo ndirigoti ni dyø le Ddù ró, ri si kaka ni dho ni njí ni bbʉngʉe ni ke dho ro ni njingʉe ná tsodha ró njí.

6. Kodhó familia dhó lo tso ká ringani ko gba addudho? (Anja ji maddi.)

⁶ Kodhó familia dhó lo tso ringani ko gba nari. Shinga badha dho ko d’a ná ngø kana ringani ko ji Yova ma, Yesu ma na bbo pli kodhó familia djolu. (Mt. 10:37) Ro, føri na mana nga kʉ ko ka ko bé kodhó familia nǎ ndrŭ dhó lo tso ko gba nari pá ri. Føri ró ro njonjo ndiro Mungu ma, Kristo ma na u ko tso d’e, ringani ko gba kodhó familia nǎ ndrŭ dhó lo tso. (1 Ti. 5:4, 8) Ko njiri fø ró ko sie hwè na. Føri djolu pli, Yova churi nari kʉ familia ka ndi é hwè na njati kpetsi ke ma, isɨle ma na di jidha ndirigoti heshima dhǒ ndima kana, gø dhi ndrŭ di jidha dhǒ ndirigoti formasio bbʉ ndima dhi nzø dho ndirigoti nzø di ngarr ndima dhi gø dhi ndrŭ dho ró.​—Efe. 5:33; 6:1, 4.

7. Ni ká ka ni njí familia nǎ bbʉni nidhó ná njí ngbaribbai?

⁷ Ni ká ka ni d’ú ni djó no ngbaribbai? Ni é dzaba ma, dzai ma, ngba ma ró ringani ni njinjí Biblia nǎ nyodyu dhi shauri na, nzɨ di ni nyǒ djó kʉ bblo ná lo dhé nji inga ni di ná ngana bí kʉ ná ndrŭ nji ná lo inga bbo chu lo ná kpa po ná lo nji. (Mez. 24:3, 4) Adi njínji bblo Biblia ró dyʉ ndi ná vichapo na. Ri nǎ le dho ngbaribbai ma le ka le njinjí Biblia nǎ kanuni na nari. Loroji na, ɨ djǒ ripo ná lo “Musaada kwa Familia” tsena kʉ ná lo kʉ bblo pli kʉ ná lo dza dhi ndrŭ ma, gø dhi ndrŭ ma, jadda kpa ma na hwini na njʉ ná lo djo ndi tilo ro.b Avʉri ni njinjí Biblia nǎ lo na, rie nzɨ ma nidhó familia nǎ nja ndrŭ njínji ri na ri ró. Njati ni njiri fø ró, nidhó familia si faida ba ndirigoti ni si Yova dhó ledha ba.​—1 Pe. 3:1, 2.

8. Ko vʉ nanga ná lo ká adi ko ronga lø ngbaribbai?

⁸ Lonanga ko vʉ nari. Yova bbʉrie ko dho ná kado kʉ ko vʉ lonanga ko dho ko koro, ndirigoti ke jiri ko ba faida bblo ko vʉ lonanga nari nǎ ro. Ro, ko vʉ lonanga che ró ke adi ribba ko ba matokeo ri nǎ ro. (Gal. 6:7, 8) Føri dho, ringani ko u ko vʉ lonanga bblo nzá nari bbʉ ná matokeo u, rie ko tso nǎ lo inga ko nji ná lo nǎ ro si ná matokeo ma ró. Ko di ngaddi b’lo ko nji ná lo djo ró, ri ka ndi liri kodhó zamiri di lod’i ko djo. Nì mai ri kʉ føro, ko vʉ lonanga d’idhé nari bbʉ ná matokeo tso nzá ko ka ko nyi ri nari ko chu nari ka ndi cho ko ronga ko leni le kodhó chenga nǎ ro, ko thɨ kodhó kosa thika ndirigoti nzɨ ko nji fø kosa ki. Fø ko njiri nari ka ndi kó ko tsotso ko d’á shinga dhi ngana le mba ná chu nǎ.

9. Ni ká ka ni njiri ngbǎ njati rie nzá ni vʉngʉe lonanga bblo ri ró? (Anja ji maddi.)

⁹ Ni ká ka ni d’ú ni djó no ngbaribbai? Njati rie d’idhé ni vʉngʉe lonanga ri ró, ni ká ka ni njiri ngbǎ? Achuri nari kʉ ni nzá ka ni ø b’lo da ná lo thika ro ri. Nzɨ bbari ni thí nzani nidhó akili ró ndirigoti nzɨ vi nidhó kpakpanga ni djó ni soni nari na inga chelo ni ti ni djo inga nja ndrŭ djo ni vʉ lonanga d’idhé nari dho. Fønga rɨngana, ad’i nidhó kosa utso ndirigoti anji ngbà ni ka ni njí kpadjo ná lo. Njati rie lo ni adi d’i ni djo b’lo ni njingʉe ná lo dho ri ró, nyenyenga na anzinga Yova tso, au nidhó kosa tso ndirigoti anziri ke njí ni zø. (Zb. 25:11; 51:3, 4) Anji chelo njie ni ró ná ndrŭ zø ndirigoti rie ngbà ri ka ró, ane ni tsotsokodha wazee dhó ro. (Yak. 5:14, 15) Aba somo nidhó kosa nǎ ro ndirigoti anji kpakpanga nzɨ ni nji ri ki. Njati ni njiri fø ró, ni ka ni uri u nari kʉ Yova si zølo dho ni dho ndirigoti ke si ni tsotso ko nidhó lo u nari bbai.​—Zb. 103:8-13.

RINGANI KO “BU KO DJÓ RO” NÁ NO

10. Nzá ka ndi njini ko dho ná ritsi ko b’o nari ká ka ndi é li o ná no ko dho addudho? (Wagalatia 6:4)

¹⁰ Nzá ka ndi njini ni dho ná ritsi ni b’o nari. Ko ka ko bbari lo gʉ di sisi ko djolu njati ko di ko ddi nja ndrŭ na ró. (Azø Wagalatia 6:4.) Njati ko di ko ddi bí ina nja ndrŭ na ró, ko ka ko é tamaa na ndirigoti ko ka ko di rine ko sisi nja ndrŭ djolu. (Gal. 5:26) Njati ko di kpakpanga nji ko njí nja ndrŭ nji ná nzá ka ndi njini ko dho ná lo ró, føri na ko ka ko vo ko ronga ko koro. Addinga i lo djo: Biblia ripo ko thí ka ndi bʉni bʉ njati ko di ddikpa ritsi b’o ró. (Mez. 13:12) Ro, ko thí ka ndi gʉ bʉni bbo pli njati ko di nzá ro ka ndi njini ko dho ná ritsi b’o ró! Njati ko njiri fø ró, ko ka ko njeni nje ndirigoti ko ka ko o li shinga dhi ngana le mba ná ngø ko d’a nari kana.​—Mez. 24:10.

11. Ni tsotso ká addu ka ndi kó ndiro nzɨ ni di rine ni njí ritsi nzá ka ndi ka ni dho ná ngatsi ró?

¹¹ Ni ká ka ni bu li o ná fø no ni djó ro ngbaribbai? Nzɨ di rine ni njí ritsi Yova rinzi ni tso ná nga djolu. Ke nzɨ adi rine ni bbʉ nga kʉ nidhó ná ritsi ri. (2 Ko. 8:12) Auri u nari kʉ Yova nzɨ adi ni nji ná ritsi ro ddi nja ndrŭ nji nari na ri. (Mt. 25:20-23) Ke adi ni thí nǎ ro krʉ ni nji ndi dho ná njí ma, chi ni tøni nari ma, ni ngatsove nari ma na nja mana na bbo. Kiasi na, auri nari kʉ nidhó cho ma, afya ma, ni kʉ nǎ ná hali ma na ka ndi liri ni ji ni njí ná lo é ndi dhi mupaka na. Barzillai bbai, anyi nja kʉ ná pendeleo nyi njati nidhó afya inga nidhó cho liri nzɨ ni njí nja kʉ ná njí ró. (2 Sa. 19:35, 36) Musa bbai, ane ni tsotsokodha ndirigoti abbʉ nja kʉ ná pendeleo nja ndrŭ dho rie ngbà ri ka ró. (Kut. 18:21, 22) Njati ni é nyenyenga na ró, ni nzá ka ni cho njí tso krʉ ni dhona ri, dhonalo føri ka ndi liri ni njeni nje shinga dhi ngana ni d’a ná ngø kana.

12. Nja ndrŭ vʉ lonanga d’idhé nari ká ka ndi é kodhó kosa? Aturinga.

¹² Nja ndrŭ vʉ lonanga bblo nzá nari dho ni ni nja kosa nji ri nari. Ko nzá ka ko vʉ lonanga ro nja ndrŭ dho ri; inga ko cho kpa vʉ lonanga bblo nzá nari nǎ ro si ná matokeo tso ro ri. Loroji na, ddikpa kpetsi ngba inga singba ngba ka ndi vʉri ndi bbá Yova dho ndi njínji nari tso bbá. Fø lonangavʉdha ka ndi bbʉ njedha bbo gø dhi ndrŭ dho. Nì mai ri kʉ føro, kosa nji ri di ndima nja ndima dhi ngba vʉ lonanga bblo nzá nari dho ná gø dhi ndrŭ li o ná no li ndima djo. Føri nga kʉ Yova ji kpa d’ú ná no ri.​—Ro. 14:12.

13. Gø dhi le ká ka ndi hwini ndidzá ngba vʉ lonanga bblo nzá nari na ngbaribbai?

¹³ Ni ká ka ni bu li o ná fø no ni djó ro ngbaribbai? Achuri nari kʉ Yova bbʉ lonangavʉdha dhi uhuru ko krʉ dho. Ke bbari nja le ddiro vʉ lonanga ndi dho ndi ndiro. Føri tsu ndi nǎ le ká ka le njinjí ke dho inga nzá ma nari. Yova churi ni nga kʉ kaka ná gø dhi le ri; ke jiri ni njí ngbà ka ni dho ná lo. Nidzá ngba vʉ nanga ná lo nǎ ro ngba nganga ka ndi ba matokeo, nga ni ri. (Mez. 20:11) Ndirigoti njaro ni kʉ gø dhi le nari dho ni ka ni di ngaddi ni njingʉe ná kosa djo. Føri dho abbari Yova chu ngbaribbai ma ni ni mbu nari ndirigoti anziri ke njí ni zø. Ke churi nari kʉ ni nzá ka ni thɨ b’lo da ná lo thika ndirigoti ni ø b’lo njini ná lo thika ro ri. Ndirigoti ni nzá ka ni cho nidzá ngba tso ro ngba vʉ nanga ná lo nǎ ro ngba si ba ná matokeo ró ri. Anonga nari kʉ nidzá ngba si rivʉ ndi ngʉ Yova ro ró, ke nanga si jini ji ndi kó ngba ki vi.​—Lu. 15:18-20.

14. Nga djolu le lod’i le djo ná føri ká kʉ bu ringani ko bu ko djó ro ná no addudho?

¹⁴ Nga djolu le lod’i le djo nari. Chenga ko njí ná saa na, ko ka ko d’i lo ko djo ngbà. Ro, Yova nzá jiri ko di lo gʉ d’i ko djo nga djolu ri. Føri kʉ, bu ringani ko bu ko djó ro ná no. Ko lod’i ko djo nga djolu nari ká ko ka ko chu ngbaribbai? Njati rie ngbà ko d’ra kodhó chenga, ko leni le ri nǎ ro ndirigoti ko kpakpanga nji nzɨ ko nji ri ki ró, ko ka ko uri u nari kʉ Yova nji ko zø b’lo. (Mdo. 3:19) B’lo ko njiri fø nari goti, Yova nzá jiri ko di lod’i ko djo ri. Ke churi nari kʉ lo ko d’i ko djo nga djolu nari ka ndi vó ko ronga vó. (Zb. 31:10) Njati ko bbari ko thí ba njedha gʉ bbo ró, ko ka ko njeni nje shinga dhi ngana ko d’a ná ngø kana.​—2 Ko. 2:7.

15. Ni tsotso ká addu ka ndi kó ndiro ni hwini nga djolu ni lod’i ni djo nari tso ró d’e? (1 Yohana 3:19, 20) (Anja ji maddi.)

¹⁵ Ni ká ka ni bu li o ná fø no ni djó ro ngbaribbai? Njati rie go ni adi lod’i ni djo ni njingʉe ná chenga dho ri ró, ali ni thí Mungu dho ni dho ná “bbʉbbʉ zølo” djo. (Zb. 130:4) Ke njí bbʉbbʉ leni ná ndrŭ zø ná saa na, ke adi tsoni: “Ma nzɨ no kpadhi chenga nga ki ro ri.” (Yer. 31:34) Føri na mana kʉ Yova nzɨ nga ki ro ddi nidhó b’lo zø ndi njingʉe ná chenga djo ri. Føri dho, nzɨ di riddi nari kʉ, ni njingʉe ná chenga bbʉ ná matokeo ridho ke nzá nji ni zø ri. Ndirigoti nzɨ bbari ni thí é njedha na bbo rie vi ma ni vi kutaniko nǎ ni e na ná madaraka ri ró. Yova nzɨ nga ki ro ddi ni njingʉe ná chenga djo ri ndirigoti ni dho ma nzá ddi ringani ni ddinga ri djo ri.​—Azø 1 Yohana 3:19, 20.

AKOD’A KO SISI NGØ DJOLU D’E

16. D’a ko d’a nari kana, ká ringani ko chu ngbá lo?

¹⁶ Shinga dhi ngana ko d’a ná ngø kana, ringani ko “d’á ngbà dho ko ka ko ba ri nari bbai.” (1 Ko. 9:24) Ko ka ko njiri fø njati ko chu njonjonga d’u ringani ko d’ú ná no ma kana bu ringani ko bu ná no na ró. I lo nǎ, ko tilo ro sese d’u ringani ko d’ú ná no ndirigoti bu ringani ko bu ko djó ro ná no djo. Ro, ko ka ko njí ná nja lo ro ma kʉ ddi. Yesu pongʉeri ko ka ko “d’ú li o ná no ko djo, bbo ko nganyo nari ma, bbo ko jødha dhi ritsi jø nari ma, maisha nǎ lo ko nanga d’o nari ma na chulu.” (Lu. 21:34) Fø maandiko ma, nja ri ma na ka ndi kó ni tsotso ni d’i ngbá lo kana ma ringani ni thɨ nidhó lo thika nari utso ndiro ni d’á shinga dhi ngana le mba ná ngø d’e.

17. Shinga dhi ngana ko d’a ná ngø djolu ko si kʉ sisi nari ká ko ka ko uu addudho?

¹⁷ Ko ka ko uri u nari kʉ, ko si kʉ sisi shinga dhi ngana ko d’a nari kana dhonalo Yova si kodhó lo u ná kpakpanga bbʉ ko dho nì. (Isa. 40:29-31) Føri dho nzɨ njeni! Adyø mutume Paulo, bbo ndi njingʉe kpakpanga ndiro ndi si ndi njí le lingʉe ná ndi kobe ba d’e ro. (Flp. 3:13, 14) Ddikpa le ma nzá ddi ka ndi d’á fø ngø ro ni dho ri, ro Yova ka ndi kó ni tsotso ko ni d’á kpø mwisho djo d’e. Yova ka ndi kó ni tsotso ko ni d’ú ni djó no ndirigoti ni bu nga kʉ lazima nari bu ni djó ro d’e. (Zb. 68:19) Yova dhó le tsotsokodha chulu, ni dho ri ka ndi kaka ni d’á ngø ngatsovedha kana ndirigoti ni si ri djolu si!