SOMO 26
Chelo ma, nzadha ma na ká adi ngaba addudho?
Chelo banga ná saa na, ri ka ndi ka ngbà le dhuri le tso: “Fø lo ká banga addudho? Ko adi hwè ba bbo Biblia ngʉ fø logoti pʉlʉpʉlʉ nari dho!
1. Shetani ká tsungʉe chelo dz’ djo ngbaribbai?
Shetani tsangʉe tsa Mungu ro. Ke jingʉeri ndi nyopi ndrŭ krʉ djo, føri dho ke chòngʉe ya kwanza le nongʉe ná ndrŭ, Adamu ma Eva ma na ndiro kpa ma tsatsa ddi ndi bbai d’e. Fø lo Shetani njingʉe Eva ndi shangʉe nari chulu. (Mwanzo 3:1-5) Ke jingʉeri Eva ddiri nari kʉ, Yova jʉ ndi tso bblo ritsi ró. Ke pongʉeri nari kʉ, ndrŭ ka ndima e hwè na bbo njati ndrŭ rrnga nzá Mungu dho ró. Shetani shangʉe kali ya kwanza Eva dho, ke pongʉeri le ro nzá ka ndi dhe ri ná saa na. Føri dho Biblia nzi Shetani “kali dhi ke ndirigoti kali dhi baba.”—Yohana 8:44.
2. Adamu ma, Eva ma na ká vʉngʉeri ndima njí addu?
Yova bbʉngʉe ritsi ji ndi nanga jini ro Adamu ma, Eva ma na dho. Ke pongʉeri kpa ka ndima nyó Edeni nǎ í na kʉ ná tsu djó tunda krʉ, ro ddikpa ri djó ri dhé nzɨ kpa nyo. (Mwanzo 2:15-17) Ro kpa vʉngʉeri ndima nyó gʉgʉni ná tsu djó tunda. Eva “klengʉe tsu djó tunda ndirigoti le nyongʉe ri nyo.” Luti, Adamu ma “nyongʉe ri ddi.” (Mwanzo 3:6) Kpa krʉ nzá rrngʉe nga Yova dho ri. Adamu ma, Eva ma na ngʉe kaka ná ndrŭ nari dho, ri ka ndi kae ka kpa njí chø kʉ ná lo. Ro Yova dho kpa rrngʉe nga nzá nari na, kpa njingʉe chenga ndirigoti kpa gʉngʉe kedzá bbonga gʉ. Fø lonangavʉdha bbʉngʉe nzadha bbo kpa dho.—Mwanzo 3:16-19.
3. Adamu ma, Eva ma na vʉngʉe ná lo ká lø ko ronga ngbaribbai?
Adamu ma, Eva ma na njingʉe chenga ná saa na, kpa ngʉngʉe nzá kaka ná ndrŭ, ndirigoti nzá le kaka ná føri løngʉe kpa nǎ gø krʉ ronga. Adamu djo Biblia ripo: “Ddikpa ke chulu chenga tsungʉe dz’ djo ndirigoti chenga chulu dhe tsungʉe, føri dho dhe nyangʉe ndi nanga ndrŭ krʉ djo.”—Waroma 5:12.
Ko adi nzani njonjo kʉ ná lo dho. Loroji na nja saa na, ko adi nzani ko vʉ lo nanga bblo nzá nari dho. Nja saa na, ko adi nzani nja ndrŭ vʉ lo nanga bblo nzá nari dho, inga ko adi nzani ko ra bani che kʉ ná ngana ndirigoti che kʉ ná wakati na nari dho.—Azø Muhubiri 9:11.
ANE LONANGA BBO
Aneri ni chu addudho ma ri nga kʉ Mungu i kʉ chelo ndirigoti nzadha adi bbʉ njʉ dz’ djo ná ke ri nari ndirigoti ngbaribbai ma ke adi ndi mbu nza ko nzani ná saa na nari.
4. Kodhó nzadha adi si dhó ro ná ke
Bí kʉ ná ndrŭ urie ri nari kʉ, ri kʉ Mungu i pinyo dz’ djo ri. Føri ká kʉ bbʉbbʉlo? Aninja VIDEO.
Azø Yakobo 1:13 ndirigoti 1 Yohana 5:19, ndirigoti anitilo i ngadhudha djo:
Nzadha ma, chelo ma na ká adi si Mungu dhó ro?
5. Akonja Shetani dhó pidhinga bbʉ ná lo
Azø Mwanzo 3:1-6, ndirigoti anitilo i ngadhudha djo:
Shetani ká shangʉe kali ngbaribbai?—Anja verse 4 ndirigoti 5.
Shetani ká dhongʉeri ngbaribbai nari kʉ Mungu jʉ ndrŭ tso bblo kʉ ná ritsi ró?
Shetani ká pongʉeri ngbà nja ndi dhori nari kʉ, ndrŭ ro nga kʉ Mungu dzá lazima na ndiro ndima e hwè na d’e ri?
Azø Muhubiri 8:9, ndirigoti anitilo i ngadhudha djo:
Mungu ro ndrŭ tsangʉe ná nga djó ro, ká ngbá lo adi ngaba dz’ djó?
Adamu ma, Eva ma na ngʉe kaka ná ndrŭ ndirigoti kpa ngʉ di paradiso nǎ. Ro kpa rrngʉe nga Shetani dho ndirigoti kpa tsangʉe tsa Yova ro
Tsa kpa tsangʉe nari goti dz’ djó nga lingʉe lɨ chelo ma, nzadha ma ndirigoti dhe le dhe nari na ma
Yova si chenga ma, nzadha ma, ndirigoti dhe le dhe nari ma na tso d’ød’ø. Godhé ndrŭ krʉ sie kaka ná le ndí na ndirigoti ndrŭ si di paradiso nǎ
6. Mungu adi ngaddi bbo ko nzani nari djo
Mungu ká adi ko nzani nari nja nzɨ? Akonja Pi Daudi ma, Petro ma na ndingʉe ná lo. Azø Zaburi 31:7 ndirigoti 1 Petro 5:7, ndirigoti anitilo i ngadhudha djo:
Ni ká adi ni mbu ngbaribbai ni churi, Yova adi ni nzani nari nja nì ná lo dho?
7. Mungu si nza ndrŭ nzani nari tso krʉ d’ød’ø
Azø Isaya 65:17 ndirigoti Ufunuo 21:3, 4, ndirigoti anitilo i ngadhudha djo:
Yova si ko adi bani na ná kpakpalo krʉ tso d’ød’ø. Føri ka ndi pɨ ko iso pɨ dhonalo ká kʉ addu?
Ni ká churi ngbà?
Ya kwanza Shetani shangʉe kali ná saa na, ke tingʉe chelo Mungu djo. Føri na ke lingʉeri ndrŭ dhó ngaddidha e che Mungu djo ndiro ndrŭ uri nari kʉ Mungu nga kʉ chølo na ndirigoti jidha na pinyo ná ke ri. Mungu si ndrŭ ró nzadha tso d’ø karrnga goti ná saa na, ke si rili ndi ró dho máni ma. Ko ka ko pori ɨ maddi, ke si ridho ndidhó Pidhinga kʉ bblo pli kʉ ná Pidhinga. Yova ró dho máni ná føri kʉ bbo na mana kʉ ná lo.—Matayo 6:9, 10.
NJA NDRŬ ADI RIPO: “Nzadha kʉ Mungu pɨ ko dho ná lo kana ddi lo ro.”
Nde ni ká ka ni poeri ngbǎ?
LO DZÁ DɄNGA
I dz’ djo tsungʉe chelo nari kʉ Shetani Diabolo ma, nzá rrngʉe nga Yova dho anziro ná aro kʉ ná ndrŭ ma na. Yova adi ngaddi bbo ko nzani nari djo ndirigoti karrnga goti ke si ri tso d’ød’ø.
Lo djolu le ngʉ nari
Shetani ká shangʉe Eva ngbaribbai?
Adamu ma, Eva ma na tsangʉe Yova ro nari ká lø ko krʉ ronga ngbaribbai?
Ko ká churi ngbaribbai nari kʉ Yova adi ngaddi ni ko nzani nari djo?
NI KA NI CHU NÁ NJA LO
Aneri ni chu Biblia tu chenga nanga nari.
Azø lo bbo Shetani Ibilisi ngangʉe tso Edeni dhi í na ná lo djo.
“Sababu Gani Mungu Anaacha Watu Wateseke?” (Munara wa Mulinzi, 1 Mwezi wa 1, 2014)
Aneri ni chu pɨ ka ndi pí le iso ná majibu kpakpa kʉ ná ngadhudha djo.
“Sababu Gani Wayahudi Wengi Waliuawa? Sababu Gani Mungu Hakuzuia Jambo Hilo?” (Jw.org djó kʉ ná lo)
Anja ddikpa ke jifunza ngʉe dzʼ djó nzadha ndi ngʉ nja nari djo ná lo.