Yesu dzá dhe ká ka ndi gø ko ngbaribbai?

Ko adi chenga ma nji, ko adi nzani nza ma ndirigoti ko adi dhedhe ma dhonalo ya kwanza dza dhi ndrŭ Adamu ma, Eva ma na nzá rrngʉe nga Mungu dho ri.a Ro ko nga kʉ ngadhi ngab’odha ro ri. Yova løngʉe ddikpa chu ndiro ndi gø ko chenga nǎ ro ndirigoti dhe nǎ ro ndidzá Ngba Yesu Kristo chulu d’e. Biblia riddi nari kʉ, Yesu bbʉngʉe le ødha dhi be ndidzá dhe chulu. Le ødha dhi be kʉ ddikpa le ødha dho lé bbʉ ná ritsi. Le ødha dhi be dho Yesu bbʉngʉe nari kʉ ndidzá kaka ná shinga. (Azø Matayo 20:28.) Yesu ungʉe ndi tso ndi dhedhe nari chulu, ke lingʉeri ko si Adamu ma, Eva ma na vingʉe ná ritsi ki ba vi. Yova ma, Yesu ma na dhǒ ngbaribbai ma ndima ji ko nari ko dho. I somo si ni tsotso ko ndiro ni nja Yesu dhengʉe nari mana na bbo d’e.

1. Yesu dzá dhe nǎ ro ká ko ka ko ba faida ngbaribbai njʉ?

Ko e chenga dhi ndrŭ nari dho, bí ina ko adi nzá ka ndi bbʉ hwè Yova dho ná lo nji. Ni mai ri kʉ fø ro, njati ko thí ba njedha ko nji ná lo dho ndirigoti ko nziri Yesu chulu Mungu njí ko zø ndirigoti ko njí kpakpanga ndiro nzɨ ko nji fø chelo ki ró, ko kana nga ka ndi ngʉ chøchø Yova na. (1 Yohana 2:1) Biblia ripo: “Kristo dhengʉe ddi ina chenga djotsina, chi kʉ ná ke nga kʉ chi ná ndrŭ dhi lo dho, ndiro ke mba ni Mungu dhi ngana d’e.”​—1 Petro 3:18.

2. Gosi ná saa na ká ko si faida ba ngbaribbai Yesu dzá dhe nǎ ro?

Yova chongʉe Yesu ndiro ke bbʉ ndidzá kaka ná shinga “ndiro ngbà u ke [Yesu] ná le nzɨ ba sadha, ro le ba choro nŭnŭ di ná shinga d’e.” (Yohana 3:16) Yesu dhengʉe ko djotsina nari dho, Yova si Adamu rrngʉe nga nzá nari nǎ ro ko ba ná kpakpalo tso d’ø krʉ. Føri na mana kʉ, njati ko e udha na Yesu bbʉngʉe ndi bbʉdha nari djo ró, ko si nŭnŭ di ná shinga hwè nji paradiso si ngʉ ná dz’ djó!​—Isaya 65:21-23.

ANE LONANGA BBO

3. Yesu dzá dhe klo ko chenga nǎ ro ndirigoti dhe nǎ ro

VIDEO: Yesu ká dhengʉe addudho?​—Sehemu ya 1 (2:01)

• Adamu ká vingʉe ngbá bblo ritsi Mungu dho ndi rrngʉe nga nzá ná saa na?

Azø Waroma 5:12, ndirigoti anitilo i ngadhudha djo:

• Adamu njingʉe ná chelo ká lø nidhó maisha ronga ngbaribbai?

Azø Yohana 3:16, ndirigoti anitilo i ngadhudha djo:

• Yova ká chongʉe ndidzá ngba i dz’ djo addudho?

1. Adamu ngʉe kaka ná ke, ro ke nzá rrngʉe nga Mungu dho ri ná føri na ke tsungʉe ndrŭ chenga na ndirigoti dhe na

2. Yesu ngʉe kaka ná ke, ke rrngʉe nga Mungu dho ná føri na ke klongʉe chutso ndiro ndrŭ ngʉ kaka ná ndrŭ ndirigoti ndrŭ ba nŭnŭ di ná shinga d’e

4. Yesu dzá dhe ka ndi bbʉ faida ndrŭ krʉ dho

VIDEO:Yesu ká dhengʉe addudho?​—Sehemu ya 2 (2:00)

• Ddikpa ke dhe nari ká ka ndi bbʉ faida ndrŭ krʉ dho ngbaribbai?

Azø 1 Timoteo 2:5, 6, ndirigoti anitilo i ngadhudha djo:

• Adamu ngʉe kaka ná ke, ro ke njingʉe chenga nari dho ndrŭ krʉ adi chenga nji ndirigoti ndrŭ adi cheni che. Yesu maddi ngʉe kaka ná ke. Nde ká addudho ko ka ko pori Yesu bbʉngʉe “ddiddi dhó valer kʉ ná le ødha dhi be”?

5. Le ødha dhi be kʉ Yova bbʉ ni dho ná kado

Yova dzá bbakau adi le ødha dhi be nja kado bbai. Loroji na, azø Wagalatia 2:20, ndirigoti anitilo i ngadhudha djo:

• Addui ká ridho nari kʉ, mutume Paulo njangʉe le ødha dhi be ndi nganga dho le bbʉ ná kado bbai?

Adamu njingʉe chenga ná saa na, ke ma, ke nǎ gø ma na krʉ dho ringangʉeni ndima cheni che. Ro Yova chongʉe ndidzá Ngba ndi dhedhe ndiro ni kasi shinga hwè nji cho ró nŭnŭ d’e.

Agʉro kʉ ná maandiko ni zø ná saa na, addinga ngbaribbai ma Yova ngʉ ndi mbu ndidzá Ngba ngʉ nzani ro nari djo. Azø Yohana 19:1-7, 16-18, ndirigoti anitilo i ngadhudha djo:

• Ni ká adi ni mbu ngbaribbai Yova ma, Yesu ma na njingʉe ni dho ná lo dho?

LO DZÁ DɄNGA

Yesu dhe nari liri Yova njí kodhi chenga zø ndirigoti ko si cho ró nŭnŭ di ná shinga hwè nji theinga dho.

Lo djolu le ngʉ nari

• Yesu ká dhengʉe addudho?

• Ká addudho Biblia ripo Yesu dhó kaka ná shinga kʉ ddiddi dhó valer kʉ ná le ødha dhi be?

• Yesu dzá dhe ká ka ndi bbʉ faida ni dho ngbaribbai?

NI KA NI CHU NÁ NJA LO

Aneri ni chu addudho ma le nzi Yesu bbʉngʉe ndidzá kaka ná shinga le ødha dhi be nari.

“Namna Gani Kifo ya Yesu Ni Zabihu ya Ukombozi kwa Ajili ya Watu Wengi?” (Jw. org djó kʉ ná lo)

Aneri ni chu kodho ringani ko njí ná lo ndiro ko ba gødha d’e.

“Yesu Anatuokoa Namna Gani?” (Jw.org djó kʉ ná lo)

Yova ká ka ndi njí bbo chenga zø maddi?

“Maulizo Juu ya Habari za Biblia Yanajibiwa” (Munara wa Mulinzi, 1 Mwezi wa 5, 2013)

Ddikpa ke ngʉ adi chelo njini nari ngano bí ina, anja ngbaribbai ma Yesu bbʉngʉe ndi bbʉdha nari kongʉe fø ke tsotso nari.

“Kukumbuka Upendo Wangu wa Kwanza kwa Mungu Kumenisaidia Nivumilie” (Munara wa Mulinzi, 15 Mwezi wa 5, 2015)