SOMO 47
Ni ká kʉ tayari nì batiso badha dho?
Ni chulo bbo b’lo Yova djo Biblia nǎ longa ni ne nari chulu. Føri dho ni le nidhó nja kʉ ná lo thika le ndiro ni njinjí ni chu ná lo na d’e. Ro, njaro ni ronga tso ka ndi cho ná lo ma ka ndi é ddi ndiro nzɨ ni bbʉ ni Yova dho ndirigoti nzɨ ni ba batiso ró. I somo nǎ ko si batiso ró ka ndi cho le ronga tso ná lo ro nja ndirigoti ngbaribbai ma le ka le si fø lo djolu nari nja.
1. Ri ká ngani ni chulo ngbá ngatsi ndiro ni ba batiso d’e?
Ndiro ni ba batiso d’e, ringani ni é “d’ʉ kʉ ná lochudha na bbʉbbʉlo djo.” (1 Timoteo 2:4) Føri na mana nga kʉ, ni chu Biblia nǎ lo krʉ batiso ni ba nari njí ri. B’lo ba batiso ná Wakristo ma adi ra anzi dhé Mungu djo ndima lochu nari na. (Wakolosai 1:9, 10) Ro nidho ringani ni famu Biblia nǎ bbobbo mafundisho. Kutaniko nǎ wazee ka ndima kó ni tsotso ndiro ndima chu ni ká chulo ngbabø ma nari d’e.
2. Batiso ni ba nari njí ká ringani ni njí ngbá lo?
Batiso ni ba nari njí, ringani ni “leni le . . .ndirigoti ni ngʉ Mungu ro.” (Azø Matendo 3:19.) Føri na mana kʉ ni thí ba njedha anziro ni njingʉe ná chenga dho ndirigoti ni nziri Yova njí ni zø. Godhé ni bbá ndro Mungu ndro ná lo njidha tso ndirigoti ni vʉri ni njí Mungu nyǒ tho ná lo nidhó maisha nǎ. Føri goti, ringani ni di si njudha dhi ngana ndirigoti ni di lod’ra kutaniko nǎ nja ndrŭ ma na.
3. Ká addudho ringani nzɨ ni nji do batiso badha dho?
Nja ndrŭ do adi nji dhonalo kpa adi riddi njaro nzɨ ri si ka ndima njí Yova dho ndima tsoni djo ná lo ri. Bbʉbbʉ dhé, nja saa na ni ka ni nji kosa maddi, ddiddi Biblia nǎ dhó loroji kʉ ná chi ngʉ tøni ná kpetsi kpa ma, isɨ nrŭ ma na ngʉ adi kosa nji ddi nari bbai. Ro Yova nzɨ adi ndidzá njí dhi kpa nja kaka nari bbai ri. (Azø Zaburi 103:13, 14.) Ke nanga adi jini ji njati ni di kpakpanga nji ndiro ni njí ndi ji ná lo ró! Ke si ni tsotso koko. Føri dzá lo dho, Yova rid’ra ko dho nari kʉ, ddikpa ritsi ma nzá ddi “ka ndi ndo ko kana nga ro [ndidzá] jidha ró ro ri.”—Azø Waroma 8:38, 39.
ANE LONANGA BBO
Anja ngbaribbai ma ni ka ni si batiso ró ni ronga tso cho ná lo djolu bblo ni Yova chu ndirigoti kedhó letsotsokodha ni u nari chulu nari.
4. Aneri ni chu Yova bblo
Nidho ká ringani ni chu Yova ngbá ngatsi batiso ni ba nari nji? Ringani ni chu ke bblo ndiro ni ji ke ndirigoti ni njí ke nyǒ tho ná lo d’e. Aninja VIDEO ndiro ni nja ngbaribbai ma Biblia jifunza dz’ djolu gble ná ndrŭ chue lo bbo Mungu djo nari d’e. Ndirigoti anitilo i ngadhudha djo.
Video nǎ ni njari nari bbai, addui ká kongʉe nja ndrŭ tsotso ndiro ndima é tayari batiso dho d’e?
Azø Waroma 12:2, ndirigoti anitilo i ngadhudha djo:
Ni nanga ká adi rɨni rɨ Biblia ddi ná lo djo inga Yova dzá Dimu adi ddi ná bbʉbbʉlo djo?
Njati rie fø ró, ni ká ka ni nji addu?
5. Ri ka ndi kaka le sisi batiso ró le ronga tso cho ná lo djolu
Ko bbʉ ko Yova dho ndirigoti ko ba batiso ná saa na, ko krʉ adi bani kpakpalo na. Ndiro ni nja ddikpa loroji d’e, aninja VIDEO, ndirigoti anitilo i ngadhudha djo.
Video nǎ ni njari nari bbai, Narangerel dho ká ringangʉeni ndi si ngbá kpakpalo djolu ndiro ndi njinjí Yova dho d’e?
Yova le ji nari ká koe le tsotso ngbaribbai ndiro ndi sisi kpakpalo djolu d’e?
Azø Mezali 29:25 ndirigoti 2 Timoteo 1:7, ndirigoti anitilo i ngadhudha djo:
Addui ká adi ko li kpakpa ndiro ko si kpakpalo djolu d’e?
6. Ali ni thí Yova dhó letsotsokodha djo
Yova ka ndi kó ni tsotso ndiro ni bbʉ hwè ndi dho d’e. Aninja VIDEO, ndirigoti anitilo i ngadhudha djo.
Video nǎ ni njari nari bbai, addui ká lieri Biblia jifunza ná ke nanga rɨni batiso ndi ba nari dho?
Ke tsotso ká ngbá lo koe ndiro ke li ndi thí bbo Yova djo d’e?
Azø Isaya 41:10, 13, ndirigoti anitilo i ngadhudha djo:
Ni tsoni ni bbʉ ni Yova dho batiso chulu. Fø tsodha ró njí ni ka ni nji ngbà nari ká ni ka ni uu addudho?
7. Adi mbai po bbo Yova dhó jidha dho
Ni di ngaddi bbo Yova ji ni nari djo ró, ni ka ni di mbai po bbo ke dho ndirigoti ni ka ni jiri ni njinjí ke dho theinga dho. Azø Zaburi 40:5, ndirigoti anitilo i ngadhudha djo:
Ni ká adi mbai po Yova nji ni dho ná ngbá bblo lo dho?
Nabi Yeremia jingʉe Yova ma, kedzá lo ma na bbo ndirigoti ke ngʉ adi mbai po bbo Yova ró dho ndi d’ra nari dho. Ke pongʉeri: “Nidzá lo liri ma nanga jini ji ndirigoti ma ba hwè, ndiro ma nzini ni ró dho na, Ee Yova madzá Mungu.” (Yeremia 15:16) Angʉ i ngadhudha goti:
Yova dzá Dimu le kʉ ná føri ká kʉ ddikpa bbo pendeleo addudho?
Ni ká jiri ni ba batiso ngbà ndiro ni ngʉ Yova dzá Dimu d’e?
Ni ronga tso cho batiso ró ná lo ma ká kʉ ddi?
Ni ká riddi ringani ni njí addu ndiro ni tso si kpø batiso djo d’e?
NJA NDRŬ ADI RIPO: “Ma do nji dhonalo ma ba batiso ró, njaro nzá ma ka ma njí ma tsoeni djo ná lo ri.”
Ni ma ká adi ni mbu fø ddi?
LO DZÁ DɄNGA
Yova dhó letsotsokodha chulu, ni ka ni si krʉ kʉ ná kpakpalo djolu ndiro ni ba batiso d’e.
Lo djolu le ngʉ nari
Nidho ká ringani ni chu Biblia nǎ lo ngbá ngatsi ndiro ni ba batiso d’e?
Nidho ká ringani ni lé ngbá lo thika batiso ni ba nari nji?
Ká addudho ringani nzɨ ni nji do batiso badha dho?
NI KA NI CHU NÁ NJA LO
Anja ni ronga ka ndi cho ná lo ndiro ni ba batiso d’e.
“Uko Tayari Kubatizwa?” (Munara wa Mulinzi, Mwezi wa 3, 2020)
Aneri ni chu ngbaribbai ma ni ka ni si ni ronga tso cho batiso ró ná kpakpalo djolu nari.
“Ni Kitu Gani Kinanizuia Nisibatizwe?” (Munara wa Mulinzi, Mwezi wa 3, 2019)
Anja ngbaribbai ma ddikpa ke singʉe ndi ngʉ adi bani na ná bbobbo kpakpalo djolu nari ndiro ndi ba batiso d’e.
Anziro, Ataa nanga ngʉ adi rɨni rɨ batiso ndi ka ndi ba nari dho. Anja addu ma kongʉe ke tsotso ndiro ke vʉ bbo na mana kʉ ná fø lo nanga d’e nari.