SOMO 38
Apo mbai shinga dhi kado dho
Ko kʉ shi nari dho, ko ka ko njí nari tsi ma, ko ka ko ba nǎ ro hwè ná ritsi ma na kʉ bí. Njati rie kpakpalo na ma ko hwini ri ró, hwè ko ba nǎ ro ná lo ro ka ndi é ni dhé maisha nǎ. Ko ká ka ko dhǒ ko nanga jini ngbà, Yova bbʉ ko dho ná shinga dhi kado dho nari ngbaribbai? Ndirigoti fø ko ka ko njiri dho ná bbo na mana kʉ nari ká kʉ ngbá lo?
1. Ká addudho ringani ko po mbai shinga dho?
Ringani ko po mbai shinga dho dhonalo ri kʉ kodhi ji dhi Baba Yova dhó ro si ná kado. Ke kʉ “shinga tø ná nga” dhonalo ke nongʉe krʉ shi di ná ritsi. (Zaburi 36:9) “Krʉ kʉ ná ndrŭ dho ke bbʉ shinga ma, he ma, krʉ kʉ ná ritsi ma na.” (Matendo 17:25, 28) Yova bbʉ kodhó loji ná ritsi krʉ ko dho nja ko di shi d’e. Ro føri djolu pli, ke liri ri kaka ko dho ko e hwè na maisha nǎ.—Azø Matendo 14:17.
2. Ko ká ka ko dhori Yova dho ngbaribbai nari kʉ ko po mbai ngbà shinga dhi kado dho?
Nidzá linga nidzá mama bangʉe ná ngadjo ró, Yova adi ngaddi nì ni djo. Mungu dhó roho takatifu chulu, Mungu dzá njí dhi kpa kana ddike Daudi pongʉeri: “Ni nyǒ njangʉe ma, go madzá linga tso ngangʉeni ro.” (Zaburi 139:16) Yova adi nidhó shinga nja mana na bbo. (Azø Matayo 10:29-31.) Njati ddikpa le hwi ndrŭ inga le hwi ndi ndindiro ndá ró, føri ka ndi bbʉ vodha bbo ke dho.a (Kutoka 20:13) Ndirigoti ke ka ndi ba vodha njati ko li kodhó shinga hatari na nga na mana kʉ ná lo djotsina ró, inga ko li nja ndrŭ dhó shinga hatari na ró. Njati ko b’o kodhó shinga ronga ndirigoti ko bbʉ heshima nja ndrŭ dhó shinga dho ró, føri na ko ridho ko po mbai ngbà shinga dhi kado dho.
ANE LONANGA BBO
Anja ni nanga jini ngba shinga dhi kado dho nari ni ka ni dho lu ná chu ro.
3. Ab’o nidhó afya ronga
Ko Wakristo, ko tsongʉeni ko nji Yova ji ná lo nari dho, ko adi kodhó maisha bbʉ lu nja ko njinjí ke dho d’e. Føri kʉ ddiddi ko bbʉ ko ndí bbʉdha Mungu dho nari bbai. Azø Waroma 12:1, 2, ndirigoti anitilo i ngadhudha djo:
Ni ronga ká addu ka ndi cho nja ni b’o nidhó afya ronga d’e?
Ni ká ka ni njiri fø ngbá chu ro nǎ?
4. Ab’o ni ronga vo ka ndi vo ni ronga inga hwi ka ndi hwi ni ná ritsi ró
Biblia ko li kpakpa ko pʉ hatari kʉ ná ritsi na ko njínji nari ko ró ro. Aninja VIDEO ndiro ni chu ngbaribbai ma ni ka ni b’o ni ronga nari d’e.
Azø Mezali 22:3, ndirigoti anitilo ngbaribbai ma ni ma, nja ndrŭ ma na ni ka ni b’o nidhó usalama ronga nari djo rie . . .
abba ma.
njí dhi ngana ma.
kpa ni kpa ná saa na ma.
moto djó ma, motokari nǎ ma, inga nja ritsi na ma ni d’a ri ró.
5. Abbʉ heshima nzá d’e gøni go ná ngba dhó shinga dho
Daudi pongʉeri Yova adi ngba dhó lo ká kʉ ngbaribbai ma nari nja krʉ go ngba kʉ ndidzá mama zz nǎ ná saa na. Azø Zaburi 139:13-17, ndirigoti anitilo i ngadhudha djo:
Yova nyǒ djó, ká ddikpa le dhó shinga tso adi ngani gø le gøni ná nga djó ro inga linga tso ngani ná nga djó ro?
Drrdrr Waizraeli bbá, Yova bbʉngʉe ná yadha ngʉ adi nzá d’e gøni ná nzø ma ronga b’o ndima dhi mama ma na. Azø Kutoka 21:22, 23, ndirigoti anitilo i ngadhudha djo:
Njati ddikpa le hwi nzá d’e gøni go ná ngba aksida chulu ró, fø le ká Yova ngʉ adi nja ngbaribbai?
Nde ddikpa le hwi nzá d’e gøni go ná ngba ndá ró, ká Yova ka ndi mbu ndi ngbaribbai?b
Ni ká riddi ngbǎ Mungu dhó fø nganjadha djo?
Nja saa na, ngbà nja shinga mana na ná le ma ka ndi tu linga ddi. Azø Isaya 41:10, ndirigoti anitilo i ngadhudha djo:
Njati ddikpa isɨle ndrŭ di cho kpakpanga na ndi tu linga ró, le ká ka ndi ne ndi tsotso kodha ie dhó ro? Ká addudho?
NJA NDRŬ ADI RIPO: “Isɨle ka ndi vʉ ndi ká linga sasa ma nari ndindiro, dhonalo ri kʉ le ndí.”
Addui ká rili ni uri u, Yova adi isɨle ma, ndidzá nzá d’e gøni ná ngba ma na krʉ dhó shinga nja mana na?
LO DZÁ DɄNGA
Biblia riddi ko dho shinga kʉ Yova dhó ro si ná kado, føri dho ringani ko ji ri ji, ko bbʉ heshima ri dho, ndirigoti ko b’o ri ronga b’o. Føri tsu ndi nǎ kodhó shinga ma, nja ndrŭ dhó shinga ma na krʉ.
Lo djolu le ngʉ nari
Yova ká adi ndrŭ dhó shinga nja mana na bbo addudho?
Yova ká adi ndi rr ngbaribbai njati ddikpa le hwi ndrŭ ndá ró?
Nde ni ká po mbai shinga dhi kado dho addudho?
NI KA NI CHU NÁ NJA LO
Shinga dhi kado dho ká ni ka ni po mbai Yova dho ngbaribbai?
Aneri ni ba i ngadhudha goti, Yova ká ka ndi nji linga tu ná le zø ddi?
“Biblia Inasema Nini Juu ya Kutosha Mimba?” (Jw.org djó kʉ ná lo)
Anja ngbaribbai ma Mungu dhó nganjadha kʉ shinga djo nari ka ndi kó ko tsotso ndiro ko vʉ ko kpa ná kpà nanga bblo d’e.
“Inafaa Kabisa Kucheza ‘Michezo Hatari?’” (Amuka!, 8 Mwezi wa 10, 2000)
Hwi ji ndi hwi ndi ná le tsotso ká Biblia ka ndi kó ngbaribbai?
“Ninapenda Kufa—Biblia Inaweza Kunisaidia Wakati Niko na Mawazo ya Kujiua?” (Jw.org djó kʉ ná lo)
a Yova adi ngaddi bbo bʉ thí bʉni ná ndrŭ djo. (Zaburi 34:18) Ke chu ddikpa le thí ba njedha bbo ró, le djǒ na ndi ka ndi hwí ndi hwí ná ngaddidha ka ndi si nari maddi, ndirigoti ke adi riji ndi kó fø le tsotso ko. Ndiro ni chu ngbaribbai ma Yova adi kpakpanga bbʉ hwi ji ndi rá ndi hwi ná le dho nari d’e, azø i djǒ ripo ná lo “Ninapenda Kufa—Biblia Inaweza Kunisaidia Wakati Niko na Mawazo ya Kujiua?” I somo nǎ Ni ka ni chu ná nja lo tsena.
b B’lo tungʉe linga ro ná ndrŭ dho nzá ringani ndima thí ba njedha gʉ bbo ri, dhonalo Yova ka ndi njí fø ndrŭ zø ngbà. Ndiro ni chulo bbo d’e, anja i djǒ ripo ná lo “Biblia Inasema Nini Juu ya Kutosha Mimba?” i somo nǎ Ni ka ni chu ná nja lo tsena.