SOMO 43
Wakristo dho ká ringani ndima é ngbá nganjadha na wa djo?
Dz’ djolu gble, ndrŭ kʉ njonjo kʉ ná nganjadha na wa djo. Nja saa na, nja ndrŭ adi rivʉ ndima jø wa ddinga ndima dhó bbakau ma na. Nja ndrŭ vʉrieri nzɨ ndima jø wa. Føri goti nja ndrŭ adi wa jø ndima ronga djolu. Nde Biblia ká ngbá lo ddi wa djo?
1. Wa le jø nari ká kʉ che?
Biblia nzá gʉ wa le jø nari ro ri. Biblia pori “divai adi rili ndrŭ thí ba hwè,” føri kʉ Mungu bbʉ ndrŭ dho ná kado kana ddi ri ro. (Zaburi 104:14, 15) Biblia tilo wa ngʉ adi jø ná kpetsi kpa ma, isɨ ndrŭ ma na djo chi ndima ngʉ adi tøni ro.—1 Timoteo 5:23.
2. Biblia ká bbʉ ngbá shauri wa jø ná ndrŭ dho?
Yova gʉ wa le jø nga djolu nari ndirigoti wa le rɨ nari gʉ. (Wagalatia 5:21) Kedzá lo pori: “Nzɨ ni ro bani bbo divai jø ná ndrŭ kana.” (Mezali 23:20) Njati rie ddiro ma ko wa jø inga bí ndrŭ kʉ ná ngana ma ri ró, ri nzá ngani ko jø wa ngbʉ ka ndi ngbʉ kodhó akili nanga ná ngatsi, inga d’idhé dho ko ka ko tilo ná ngatsi, inga sa ka ndi sa kodhó afya ná ngatsi ri. Njati rie nzá ko chu ngbabø ma ko ka ko jø wa nari ró, ringani ko bbá wa tso bbá.
3. Wa djo nja ndrŭ vʉ nanga ná lo djo ká kodhó nganjadha ka ndi é ngbaribbai?
Nja ke ka ndi vʉ ndi ká ka ndi jø wa jø ma, inga nzá ma nari nga ndindi ro. Ri nzá ngani ko d’ilo nzɨ wa jø nga djolu ná ke djo ri ndirigoti ri nzá ngani ko cho nja ke kpakpanga na wa jødha dho ri. (Waroma 14:10) Ko nzá ka ko jø wa ri njati rie bʉ ri nja ndrŭ thí bʉ ri ró. (Azø Waroma 14:21.) Ko “nzɨ ko nganga dhó faida ne ri, ro nja ndrŭ dhó faida ne.”—Azø 1 Wakorinto 10:23, 24.
ANE LONANGA BBO
Ane ni tsotso ka ndi kó ná kanuni Biblia nǎ ro ndiro ni chu ni ká ka ni jø wa jø ma, inga nzá ma nari d’e ndirigoti rie jø ni ri jø ri ró, avʉ ri ká ni ka ni jø ngbabø ma nari. Ndirigoti ane ni ka ni njí ná lo rie wa ni jø nari kpakpalo bbʉ ni dho ri ró.
4. Avʉ ni ká ka ni jø wa jø ma inga nzá ma nari nga
Yesu dhó nganjadha ká ngʉe ngbaribbai wa le jø nari djo? Ndiro ni ba fø logoti d’e, anja ya kwanza Yesu njingʉe ná ddù. Azø Yohana 2:1-11, ndirigoti anitilo i ngadhudha djo:
Yesu njingʉe ná fø ddù ká ridho, kedhó nganjadha ngʉe ngbaribbai wa djo ndirigoti ri jø ná ndrŭ djo?
Yesu nzá njangʉe wa che ri, nde Mukristo ká ka ndi nja wa jø ná le ngbaribbai?
Ni mai, Mukristo kʉ huru wa jødha dho ro, ri kʉ nyodyu dhi lo nzɨ ke di wa jø krʉ ddo ró. Azø Mezali 22:3, ndirigoti anja ni ká ka ni jø wa jø ma, inga nzá ma, iga njonjo kʉ ná ɨ hali kana nari:
Ni motokari dyá inga ni njínji mashini na.
Ni kʉ lɨnga na.
Munganga jari nzɨ ni jø wa.
Ni dho ri kʉ kpakpa ni chu ni ká wa jø ngbabø ma nari.
Wa jødha tso ro nzá sheria u ni dho ri.
Ni kʉ na ná le vʉrieri ndi nzɨ wa jø ri, wa njingʉe ndi ró ná lo djotsina.
Ni ká ka ni ndó wa ndó ndoa dhi ngana inga bí ndrŭ tso njuni ná ngana? Ndiro ni nja ni ka ni njí ná lo d’e, aninja VIDEO.
Azø Waroma 13:13 ndirigoti 1 Wakorinto 10:31, 32. B’lo ni zø fø andiko nari goti, anitilo i ngadhudha djo:
Fø kanuni ká ka ndi kó ni tsotso ngbaribbai nja ni nanga vʉ ná lo bbʉ hwè Yova thí dho d’e?
Kila Mukristo ka ndi vʉ ndi ká jø wa jø ma inga nzɨ ma nari nanga ndindi ro. Ngbà mai ke ka ndi jø wa nja saa na ro, nja saa na ke ka ndi vʉri nzɨ maddi ndi jø wa
5. Avʉ ni ká ka ni jø wa ngbabø ma nari
Njati ni vʉri ni jø wa ró, ano ɨ longa: Nzá mai Yova gʉ wa le jø nari ro, ke ndro nga djolu le wa jø nari ndro. Ká addudho? Azø Hosea 4:11, 18, ndirigoti anitilo i ngadhudha djo:
Ddikpa le jø wa nga djolu ró, ká ngbá lo ka ndi banga?
Addui ká ka ndi kó ko tsotso ndiro nzɨ ko jø wa nga djolu ró? Ringani ko é kiasi na inga ko chu kodhó kadiri chu. Azø Mezali 11:2, ndirigoti anitilo i ngadhudha djo:
Wa lé jø ná kadiri ro le líli nari ká kʉ ngbà thonga ná lo addudho?
6. Addui ká ka ndi kó le tsotso ndiro nzɨ le di wa jø bbo ró?
Anja addu ma kongʉe ddikpa kpetsi ke tsotso nari nja ndi bbá bbo ndi ngʉ wa jø nari tso d’e. Aninja VIDEO, ndirigoti anitilo i ngadhudha djo.
Video nǎ ni njari nari bbai, Dmitry dhó nyi ká wa sangʉe ngbaribbai?
Wa tso ke bbá nari ká ngʉe ke dho sʉsʉ nì?
Ke ká vengʉe bbo ndi e wa jø nari tso bba ngbaribbai?
Azø 1 Wakorinto 6:10, 11, ndirigoti anitilo i ngadhudha djo:
Bbo le wa jø nari ká ka ndi bbʉ ngbá kpakpalo?
Addui ká ridho, bbo wa jø ná le ka ndi ø ndidhó lo thika ngbà?
Azø Matayo 5:30, ndirigoti anitilo i ngadhudha djo:
Le ripo le krr le thó krr nari nǎ mana kʉ, le jʉ le tso jʉ nja ritsi ró ndiro le bbʉ hwè Yova dho d’e. Ni ká ka ni njí addu ndiro ni sisi bbo ni wa jø nari djolu d’e?a
Azø 1 Wakorinto 15:33, ndirigoti anitilo i ngadhudha djo:
Njati nidhó bbakau é bbo wa jø ná kpa ró, føri ká ka ndi lø ni ronga ngbaribbai?
NJA LE KA NDI DHURI: “Wa le jø nari ká kʉ che?”
Ni ká ka ni ngʉ fø logoti ngbaribbai?
LO DZÁ DɄNGA
Yova bbʉngʉe wa ndi bbʉ hwè ndrŭ thí dho, ro ke nzá jiri le di wa jø bbo inga le di wa rɨrɨ ri.
Lo djolu le ngʉ nari
Biblia dhó nganjadha ká kʉ ngbaribbai wa djo?
Wa le jø bbo nari ká ka ndi bbʉ ngbá kpakpalo le dho?
Ni ká ka ni bbʉ heshima ngbaribbai nja ndrŭ vʉ nanga wa djo ná lo dho?
NI KA NI CHU NÁ NJA LO
Jadda kpa ká ka ndima vʉ lonanga bblo wa djo ngbaribbai?
Aneri ni chu wa le jø bbo nari bbʉ ná kpakpalo djolu le ka le si ná chu.
“Acha Pombe Fasi Yake” (Munara wa Mulinzi, 1 Mwezi wa 1, 2010)
Wakristo ká ka ndima d’o chupa ronga d’o ndima kana wa ndima jø ná saa na?
“Maulizo ya Wasomaji Wetu” (Munara wa Mulinzi, 15 Mwezi wa 2, 2007)
Anja ngbaribbai ma ddikpa ke singʉe bbo ndi ngʉ wa jø nari djolu nari i djǒ ripo ná lo nǎ, “Nilikuwaka Nakunywa Sana.”
“Biblia Inabadilisha Maisha ya Watu” (Munara wa Mulinzi, 1 Mwezi wa 5, 2012)
a Wa dhi nokpa ngʉ ná ndrŭ dhó lo ka ndi uri ndima ne ndima tsotsokodha wanganga dhó ro. Bí kʉ ná wanganga pori nari kʉ, kpakpalo wa ngʉ bbʉ dho ná kpa nzɨ jø ri ki pa.