SOMO 35
Ngbaribbai ma ko ka ko vʉ lo nanga bblo nari
Ko krʉ adi lo nanga vʉ. Ro, fø lo nangavʉdha ka ndi e bblo inga che ko dho ndirigoti ri ka ndi lø ko kana kau ronga maddi Yova na. Loroji na, ko ka ko vʉ ko ka ko di ná nga ma, ngbaribbai ma ko ka ko ba mbø nari ma inga ko ká ka ko chí ndoa inga nzá nari ma na. Njati ko vʉ lo nanga bblo ró, ko ka ko e hwè na ndirigoti ko ka ko bbʉ hwè Yova thí dho.
1. Ni ká ka ni njinjí Biblia na ngbaribbai nja ri kó ni tsotso ni vʉ lo nanga bblo d’e?
Lo nanga ni vʉ nari nji, anziri Yova kó ni tsotso ndirigoti azø Biblia nja ni chu ngbaribbai ma ke fø lo nja nari d’e. (Azø Mezali 2:3-6.) Nja saa na, Yova dhó yadha e pʉlʉpʉlʉ lo djo. Njati ko rrnga ngba fø yadha dho ró, føri kʉ bblo pli ko vʉ lo nanga ri.
Rie nzá Biblia nǎ yadha dho ni ka ni njí ná lo pʉlʉpʉlʉ ri ró, ká ni ka ni njiri ngbǎ? Yova si chutso dda ni dho nja “ni bbí ni dho ringani ni bbí lu ná chulu d’e.” (Isaya 48:17) Ká ngbaribbai? Fø saa na, kanuni (nzɨ thika leni ná bbʉbbʉlo) ka ndi ddá chutso ni dho. Biblia nǎ kanuni kʉ bbʉbbʉlo tøni djó ná lo, nari Yova dhó ngaddidha ma, ke ndi mbu nari ma na dhǒ ko dho. Bí ina, ko adi ngbaribbai ma Yova ndi mbu ddikpa lo djo nari chu Biblia nǎ nja lo ro ko zø ná saa na. Ngbaribbai ma Yova ndi mbu nari ko chu ró, ko vʉ nanga ná lo ka ndi bbʉ hwè Yova dho.
2. Lo nanga ni vʉ nari njí ká ringani ni ddinga ngbá lo djo?
Biblia pori: “Krr di ná ke adi ndi kó ndi tø ná nga nja bblo.” (Mezali 14:15). Føri na mana kʉ lo nanga ko vʉ nari njí, ringani ko ba saa ndiro ko ddinga ko nanga vʉ ná lo djo d’e. Fø lo djo ni ngaddi ná saa na, adhuri ni tso: ‘Ma tsotso ká Biblia nǎ ngba kanuni ka ndi kó? Nde ma vʉ nanga ná lo ká ka ndi liri ma e ngoi na bbʉbbʉ? Ma vʉ nanga ná lo ká ka ndi lø nja ndrŭ ronga ngbaribbai? Føri djolu pli, ri ká ka ndi bbʉ hwè Yova dho ngbà?’—Kumbukumbu la Torati 32:29.
Yova kaka ndi d’ra bblo lo ma, chelo ma na ko dho. Njati ko chu Yova dhó yadha ma, kedhó kanuni ma ndirigoti ko njinjí ri na ró, føri ka ndi liri kodhó zamiri njinjí bblo. Zamiri kʉ ko nǎ ro adi ko tsotso kó nari ritsi ndiro ko chu bblo lo ma kana nga chelo na d’e. (Waroma 2:14, 15) Bblo vuni ná zamiri adi ko tsotso kó ko vʉ lo nanga bblo.
ANE LONANGA BBO
Anja ngbaribbai ma Biblia nǎ kanuni ma, kodhó zamiri ma na adi ko tsotso kó ko vʉ lo nanga bblo nari.
3. Abbari Biblia ddá chutso ni dho
Biblia nǎ kanuni ká ka ndi ddá chutso ko dho ngbaribbai lo nanga ko vʉ ná saa na? Aninja VIDEO, ndirigoti anitilo i ngadhudha djo.
Lé le ro le lo nanga vʉ nari ká kʉ addu?
Lé le ro le lo nanga vʉ nari ká Yova bbʉ ko dho addudho?
Ke ká bbʉ addu ko dho ndiri kó ko tsotso ko vʉ lo nanga bblo d’e?
Ndiro ni nja Biblia nǎ ddikpa kanuni d’e, azø Waefeso 5:15, 16. Ndirigoti anitilo ngbaribbai ma ni ka ni “njinjí bblo nidhó saa na” nari djo ndiro . . .
ni zø Biblia krʉ ddo ró.
ni ngʉ bblo kʉ ná dza ba inga bblo kʉ ná dza i, bblo kʉ ná gø dhi le, inga bblo kʉ ná ngba d’e.
ndirigoti ni di si njudha dhi ngana d’e.
4. Avu nidhó zamiri nja ni vʉ lo nanga bblo d’e
Biblia nǎ yadha e pʉlʉpʉlʉ ddikpa lo djo ná saa na, rie dhʉdhʉ le vʉ lo nanga bblo. Nde fø di ná yadha ro e nga ró ká ri ka ndi e ngbaribbai? Aninja VIDEO, ndirigoti anitilo i ngadhudha djo.
Video nǎ ni njari nari bbai, le-ve ká njie ngbá lo ndiro ndi vú ndidhó zamiri bblo ndirigoti ndidhó lo nanga vʉdha bbʉ hwè Yova dho d’e?
Ká addudho ringani nzɨ ko di ko nanga vʉ ná lo dhu nja ndrŭ tso? Azø Waebrania 5:14, ndirigoti anitilo i ngadhudha djo:
Njati ko jiri nja ndrŭ ma vʉ lo nanga ko dho ró, ko nganga dho ká ringani ko ndo ngbá lo nanga?
Addui ká ka ndi kó ni tsotso nja ni vú nidhó zamiri bblo ndirigoti ni vʉ lo nanga bblo d’e?
Karte adi le tsotso kó chu nǎ nari bbai, kodhó zamiri adi ko tsotso kó ndiro ko vʉ lo nanga bblo maisha nǎ d’e
5. Abbʉ heshima nja ndrŭ dhó zamiri dho
Ndrŭ adi lo nanga vʉ njonjo kʉ ná chulu. Ko ká ka ko bbʉ heshima nja ndrŭ dhó zamiri dho ngbaribbai? Anja aro (2) kʉ ná hali:
Ya kwanza kʉ ná hali: Bbo adi riji ndi thɨ ndi ronga ná le-ve tsɨ nzá jirie le ronga le thɨ bbo ná le-vei kʉ nǎ ná kutaniko na.
Azø Waroma 15:1 ndirigoti 1 Wakorinto 10:23, 24 ndirigoti anitilo i ngadhudha djo:
Aro kʉ ná i maandiko ridho nari bbai, fø le-ve ká ka ndi vʉe lo nanga ngbaribbai? Ni ká ka ni njiri ngbǎ njati nidhó zamiri u tso ná lo nja ke dhó zamiri u nzá ró?
Ya pili kʉ ná hali: Ddikpa le-djo churi chu Biblia nzá gʉ kiasi na le wa jø nari ro ri, ro ke vʉri ndi nzɨ jø wa ri. Ro ke le nzi le nyǒ djedha dhi ngana, ndirigoti fø ga ke njari le-djoi wa jø.
Azø Muhubiri 7:16 ndirigoti Waroma 14:1, 10, ndirigoti anitilo i ngadhudha djo:
Aro kʉ ná i maandiko ridho nari bbai, fø le-djo ká ka ndi vʉe lo nanga ngbaribbai? Ni ká ka ni nji addu njati ni njari nari kʉ ddikpa le nji nari kʉ nzá tso nidhó zamiri u ná lo ró?
Addui ká ka ndi kó ni tsotso nja ni vʉ lo nanga bblo d’e?
1. Anziri Yova kó ni tsotso nja ni chu ni ka ni vʉ ná lo d’e.—Yakobo 1:5.
2. Anji utafiti Biblia nǎ ro ndirigoti Biblia ró dyʉ ndi ná vichapo nǎ ro nja ni ba ni ka ni njinjí na ná kanuni d’e. Ni ka ni dhunga ro dhidhi kiroho nǎ ná Wakristo tso maddi.
3. Aneri ni chu nidhó lo nangavʉdha ká ka ndi lø nidhó zamiri ronga ndirigoti nja ndrŭ dhó zamiri ronga ngbaribbai ma nari.
NJA NDRŬ ADI RIPO: “Ni ka ni njí ni ji ná lo krʉ. Nzɨ ddi ndrŭ po ná lo.”
Ko dho ká ringani ko ddinga Mungu dhó ngaddidha ma, nja ndrŭ dhó ngaddidha ma na djo addudho?
LO DZÁ DɄNGA
Ko ka ko vʉ lo nanga bblo njati ko chu ngbaribbai ma Yova fø lo nja ndirigoti ngbaribbai ma kodhó nyí ka ndi lø nja ndrŭ ronga nari ró.
Lo djolu le ngʉ nari
Ni ká ka ni vʉ Yova nyǒ tho ná lo ngbaribbai?
Ni ká ka ni vú nidhó zamiri ngbaribbai?
Ni ká ka ni bbʉ heshima nja ndrŭ dhó zamiri dho ngbaribbai?
NI KA NI CHU NÁ NJA LO
Kpakpa ka ndi liri ni kana kau ngʉ Yova na ná lo nga ká ni ka ni vʉ ngbaribbai?
“Kamata Maamuzi Yenye Inamutukuza Yehova” (Munara wa Mulinzi, 15 Mwezi wa 4, 2011)
Aneri ni chu ngbaribbai ma Yova adi shauri bbʉ ko dho nari.
Anja ddikpa ke tsotso kongʉe ná lo nja ndi vʉ lɨ tso o ná lo nanga d’e.
Aneri ni chu ngbaribbai ma ni ka ni liri Yova ba hwè nari njati kedhó yadha njani pʉlʉpʉlʉ nzá ma ddikpa lo nǎ ró.
“Uko na Lazima ya Amri ya Biblia mu Kila Hali?” (Munara wa Mulinzi, 1 Mwezi wa 12, 2003)