SOMO 13
Ngbaribbai ma kali dhi dini adi kali sha Mungu djo nari
Mungu kʉ jidha. Ro bí kʉ ná dini nǎ ndrŭ adi ndima nzi Mungu dho madha bbʉ ri, ni mai ndima bí kʉ ná chelo kpari nji ro. Ká addudho? Dhonalo fø ndrŭ kʉ kali dhi dini nǎ; kpa kali sha Mungu djo. Nde kali dhi dini nǎ fø ndrŭ ká adi kali sha ke djo ngbaribbai? Føri dho ká ke adi ndi mbu ngbaribbai? Ndirigoti ke ká si fø dini nji ngbǎ?
1. Kali dhi dini ká adi kali sha Mungu djo ndima dhó mafundisho chulu ngbaribbai?
Kali dhi dini adi “Mungu dzá bbʉbbʉlo thíka le kali na.” (Waroma 1:25) Loroji na, bí kʉ ná dini nzɨ adi Mungu ró dho ddi ndima dhó dini nǎ ndrŭ dho ri. Ro Biblia ripo ringani le njinjí Mungu ró dho na. (Waroma 10:13, 14) Nja dini nǎ bbobbokpa adi ripo chelo banga ró, føri kʉ Mungu ji ná lo njini ri. Ro føri kʉ kali. Mungu dhó ro nzɨ che kʉ ná lo ro adi si ri. (Azø Yakobo 1:13.) Njedha dhi lo kʉ, dini sha ná kali adi ndrŭ tu da Mungu ró ro.
2. Kali dhi dini ká adi kali sha Mungu djo ndima nji ná lo chulu ngbaribbai?
Kali dhi dini nzɨ adi njini ndrŭ na Mungu adi njini ndrŭ na nari bbai ri. Biblia ripo kali dhi dini dhó “chenga tso njuni kpø ra nǎ.” (Ufunuo 18:5) Cho bí kana, dini adi ndima tso tsu politiki nǎ lo na ma, vita dhi lo na ma, ndirigoti dini chè ná ndrŭ nanga ro nzá ka ndi zøni ri. Nja dini nǎ bbobbokpa adi riji ndima di bblo maisha nǎ, fø lo dho kpa adi mbø kó ndima dhó Wakristo tso nja ndima dhó lo tso gbani d’e. Fø lo ridho kpa nzá chu Mungu ro ri, ndirigoti kpa nzá ka ndima ddi bbʉbbʉlo ro ke djo ri.—Azø 1 Yohana 4:8.
3. Kali dhi dini dzá lo dho ká Mungu adi ndi mbu ngbaribbai?
Njati rie kali dhi dini nji ná lo adi kani ka ni lu ri ró, ni ká riddi Yova adi ndi mbu ngbaribbai? Ke jirie ndrŭ ji, ro ke nanga adi kani ka dini djó bbobbonga kali sha ndi djo ndirigoti kpa njini ndima dhó dini nǎ ndrŭ na d’idhé nari dho. Ke tsoni ndi si kali dhi dini sasa ndirigoti “ri ki ro nga sie vi ri.” (Ufunuo 18:21) Karr nga goti, Mungu si kali dhi dini krʉ tso d’ød’ø.—Ufunuo 18:8.
ANE LONANGA BBO
Aneri ni chulo ngbaribbai ma Mungu adi ndi mbu kali dhi dini dzá lo dho nari djo. Aneri ni chulo dini adi nji ná lo djo ndirigoti addudho ma nzá ringani ni bbá Yova djo ni lochu nari tso ro ri nari.
4. Mungu nzá u krʉ dini tso ri
Bí kʉ ná ndrŭ uri nari kʉ, dini kpari kʉ njonjo chu bbai, ro ri krʉ le mba Mungu dhi ngana. Nde føri ká kʉ bbʉbbʉ? Azø Matayo 7:13, 14, ndirigoti anitilo i ngadhudha djo:
Biblia ká po ngbǎ lo shinga dhi ngana le mba ná chu djo?
Aninja VIDEO, ndirigoti anitilo i ngadhudha djo.
Biblia ká ripo Mungu nyǒ krʉ kʉ ná dini adi thotho?
5. Kali dhi dini nzɨ adi Mungu kʉ na ná jidha ro dhǒ ri
Kali dhi dini nji ná bí kʉ ná lo chulu nzɨ kpa adi madha ro bbʉ Mungu dho ri. Fø chu kana ddi chu kʉ kpa ndima tso gba vita dhi lo na nari. Ndiro ni nja fø loroji ro ddikpa d’e, aninja VIDEO. ndirigoti anitilo i ngadhudha djo.
Ya pili dangʉe dz’ djolu gble ná vita nǎ ká dini njingʉeri ngbǎ?
Ni ká mbu ni ngbaribbai kpa njingʉe ná fø lo dho?
Azø Yohana 13:34, 35 ndirigoti 17:16. Ndirigoti anitilo i ngadhudha djo:
Ni ká riddi Yova adi ndi mbu ngba dini ndi tsu vita dhi lo na nari dho?
Bí kʉ ná chelo adi si kali dhi dini nǎ ro. Ni ká njari kali dhi dini tso ri Mungu dhó jidha ndima ka ndima dhǒ nari gʉ ngbá chu nǎ?
Kali dhi dini nzɨ adi jidha ro dhǒ Mungu bbai ri
6. Mungu jiri ndi kló ndrŭ klo kali dhi dini nǎ ro
Azø Ufunuo 18:4,a ndirigoti anitilo i ngadhudha djo:
Mungu jiri ndi kó kali dhi dini sha ná ndrŭ tsotso ko. Føri ni chu nari dho ká ni mbu ni ngbaribbai?
7. Ara anzi bbʉbbʉ Mungu djo ni lochu nari na
Kali dhi dini ká ka ndi sa nidhó ngaddidha Mungu lai djo ddi? Addinga nzɨ ngarr ndidzá baba bbʉ ndi dho ná nyodyu dhi shauri dho ná ngba djo. Ngba ràra ndima bba ro ndirigoti ngba nga chelo njidha tso ndidhó maisha nǎ. Ngba dzá baba nzá u ngba nji ná fø lo tso ro ri. Ká addu dzá lo dho nzá le ka le ti chelo ngba dzá baba djo ngba tsatsa ná føri dho ri?
Addudho ká ri kʉ bblo, nzɨ ko di chelo ti Yova djo ndirigoti nzɨ ko bba ke djo ko lochu nari tso, kali dhi dini nǎ ndrŭ di chelo ma nji ró?
NJA NDRŬ ADI RIPO: “Ma nanga nzɨ adi jini Mungu dzá lodho ri dhonalo dini nǎ ndrŭ adi chelo nji bbo.”
Nde ni ma ká adi ni mbu fø ddi?
Ká addudho kali dhi dini nji ná lo dho nzá ringani ndi sa nidhó ngaddidha Yova djo ri?
LO DZÁ DɄNGA
Kali dhi dini adi chelo ti Mungu djo ndima dhó kali dhi mafundisho chulu ndirigoti ndima nji ná lo chulu. Mungu si kali dhi dini sasa.
Lo djolu le ngʉ nari
Ni ká adi ni mbu ngbaribbai kali dhi dini ddi ná mafundisho ndirigoti kpa nji ná chelo dho?
Kali dhi dini dzá lo dho ká Yova adi ndi mbu ngbaribbai?
Mungu ká si kali dhi dini nji ngbǎ?
NI KA NI CHU NÁ NJA LO
Aneri ni chu dini adi hwè bbʉ Mungu dho nzɨ ná chu ro aro.
“Dini Zote Ziko Sawa? Zote Zinapelekaka kwa Mungu?” (Jw.org djó kʉ ná lo)
Ká addudho Yova adi riji ko bbʉ madha ndi dho nja ndrŭ ma na?
“Ni Lazima Kabisa Kuwa mu Dini fulani?” (Jw.org djó kʉ ná lo)
Ddikpa Mupadri djǒ nanga ndidhó dini ngbʉngʉe ngbʉ. Ro føri nzá chongʉe ke ronga tso ro Mungu djo ndi lochu nari ró ri.
“Sababu Iliyofanya Padri Aache Kanisa Lake” (Amuka!, Mwezi wa 2, 2015)
Cho bí kana dini adi kali sha Mungu djo ndiro ndrŭ uri nari kʉ Mungu nzɨ ngaddi ko djo ri ndirigoti ke kʉ bbo tsɨ sani ná ke d’e. Aneri ni chu bbʉbbʉlo fø kali kana gbo kʉ nari djo.
a Ndiro ni chu Ufunuo dzá buku nǎ, Bbo Babiloni le nzi ná fø isɨle kʉ kali dhi dini nari d’e, anja Longatudha ya 1.