Ngazø ná Kpa Adi Dhu Nalo
Paulo pongʉeri: “Ma dhe yadha chulu, yadha dzá lodho” ná saa na ká ke ngʉ riji ndi pori ngba?—Gal. 2:19.
Paulo ndingʉeri: “Ma dhe yadha chulu, yadha dzá lodho, ndiro ma di shi Mungu dho d’e.”—Gal. 2:19.
Paulo ndingʉe nalo tso gbangʉeni Galatia nǎ kutaniko nǎ nrŭ dho ke pongʉe nalo na. Nja kʉ ná Wakristo ngʉ ribba kali dhi walimu sha ndima kali dhi mafundisho na. Fø walimu ngʉ ddi nrŭ dho nari kʉ nrŭ ka ndima gø njati kpa dyø Musa dhó yadha ró, lorojina føri ngʉe tohara djo. Ro Paulo chungʉeri nari kʉ Mungu dzá nrŭ dho nga sheria ro kʉ tohara djo ri. Føri dzá lodho ke ngʉ loti kpa na ni ndi ngaddi bbo ro. Ndirigoti ke ngʉ riji ndi dhori nari kʉ fø walimu kʉ kali dhi kpa ndirigoti ke ngʉ riji ndi li ndi djoi dhó udha kpakpa Yesu dzá le ødha dhi be djo.—Gal. 2:4; 5:2.
Biblia ripo ddikpa ke dhedhe ró, ke nzá ka ndi chu ddikpa lo ro maddi ri. (Muh. 9:5) Paulo pongʉeri: “Ma dhe yadha dzá lodho” ná saa na, ke ngʉ riji ndi pori nari kʉ ndi nga kʉ Musa dhó yadha tsena ri. Fønga ringana Paulo ungʉeri nari kʉ ndi kʉ udha na le ødha dhi be djo nari dho ndi ka ndi die “shi Mungu dho.”
“Sheria” lingʉeri Paulo le ndidhó lo thika le. Ká ngbaribbai? Ke pongʉeri “chí kʉ ná ke ro nzá le ka le chu yadha nă lo ndi nji nari chulu ri, ro udha na ndi kʉ Yesu Kristo djo nari chulu.” (Gal. 2:16) Yadha kongʉe nrŭ tsotso bbo. Paulo pongʉeri Galatia nǎ nrŭ dho i: “Ri le ndringʉe ndiro chenga njani pʉlʉ d’e, kpø tsó djo le tsongʉeni ná gø si ná nga djo.” (Gal. 3:19) Bbʉbbʉ dhé, yadha lingʉeri le nja nari kʉ nzá kaka ná nrŭ ro nzá ka ndima dyø yadha kaka ná ngatsi ri ndirigoti nrŭ dhó loji kaka ná bbʉdha. Yadha kongʉe nrŭ tsotso ndima churi nari kʉ Yesu kʉ tso djo Mungu dzá lo tsongʉeni ná “gø.” Ngba u Yesu ná ke Mungu ka ndi nja chø lo nji ná ke bbai. (Gal. 3:24) Paulo tingʉe lo fø lo djo dhonalo kʉ yadha chulu ke lingʉe ndidhó udha Yesu djo. Føri dzá lodho Paulo pori ma “dhe yadha dzá lodho” ndirigoti ma ngʉ “shi Mungu dho.” Mungu ngʉe bbonga na ke djo, ro nga yadha ri.
Roma nǎ Wakristo dho ke ndingʉe barua ná saa na, ke tingʉe lo fø di nalo djo. “Ma djoi, Kristo ndí chulu ni kʉ b’lo cheni yadha na ná nrŭ . . . Ko kloni klo yadha nǎ ro dhonalo ko kʉ checheni ná nrŭ prizo nă e ko ronga tso cho nalo na.” (Ro. 7:4, 6) Fø andiko nă ndirigoti Wagalatia 2:19 nǎ, Paulo nzɨ ngʉ ripo ko dhedhe yadha d’i lo ko djo nari dho ri. Fønga ringana ke ngʉ loti gødha ko ba nari djo. Sheria nga ngʉe bbonga na ke djo ndirigoti ke lai nja kʉ ná kpa djo ri. Kpa ngʉe udha na Kristo dzá le ødha dhi be djo nari dho kpa gøngʉe gø.