Ni ká churi ngba?

Waizraeli ká ngʉ adi mali bbʉ isɨle tso ro addudho?

BIBLIA le ngʉ ndi ná saa na, b’lo nrŭ rrni ndoa djo ró, kpetsike abba familia ngʉ adi bbʉ bbʉ isɨle abba familia dho. Bbʉ dho le ngʉ adi valer dhi ritsi ma, zǎ ma, inga mbø ma na bbʉ. Nja saa na, le ngʉ adi njínji bbʉ rɨngana, loroji na Yakobo njingʉe njí Rachel dzá baba dho cho 7 ndiro ke u Rachel tso ndima chi na ndoa d’e. (Mwa. 29:17, 18, 20) Fø bbʉ ká le ngʉ adi bbʉ addudho?

Biblia djo zønga ná ke Carol Meyers pori ɨ: “Bbʉ ngʉ adi rili singba ra nǎ ro ná familia vi singba e nji ná njí nga vi, njati singba dhó familia é nza bbɨ ná nrŭ ró.” Ndirigoti bbʉ ngʉ adi rili aro kʉ ná familia kana kau ngʉ kpakpa. Føri ka ndi lieri fø familia kó ndima tsotso ko ndima kana kpakpalo dhi saa na. Føri djolu pli bbʉ adi ridho singba køni kø ndirigoti ngba tuni tu ndidzá baba dhó bbonga tse nǎ ro, ro ngba ngʉ ndi bbá ke dhó bbonga tsena.

Isɨle tso ro le bbʉ ná bbʉ na mana nga kʉ le dzi le dzi inga le nanga le dzidzi ri. Buku Les institutions de l’Ancien Testament pori ɨ: “Ringangʉeni le bbʉ mbø inga mbø dhó valer na kʉ ná ritsi nja le bbʉ singba ndoa dho d’e, ná føri ngʉ njani dzi le dzi singba nari bbai Waizraeli bbá. Ro bbʉ le bbʉ ná føri ngʉ adi njani singba ra na ro ná nga tso le gba na ná ritsi bbai.”

Njʉ maddi nja ngø nǎ nrŭ adi fø desturi dyø. Føri dho Wakristo dho ringani bbʉ ndima kó ná saa na, ndima dho ndima kʉ “kiasi na nari nrŭ krʉ dho” nzá ndima ko bbʉ bbo ro. (Flp. 4:5; 1 Ko. 10:32, 33) Føri chulu kpa ridho ndima nga kʉ “bbo ji mbø ná nrŭ ri,” inga tamaa dhi nrŭ ri. (2 Ti. 3:2) Føri djolu pli, njati Wakristo kʉ ná gø dhi nrŭ e kiasi na ni ró, føri ka ndi liri nzɨ singba dhó fiasé ngʉ ndidhó ndoa dhi ddo aluti. Inga nzɨ ke bbá upania nja ndi rá ndi djó le d’i ná bbʉ ne kpø ndi ba ri ná nga djo d’e.

Nja ngø nǎ bbʉ bbobbonga d’irie b’lo. Ro njati rie fø ni di nǎ ná ngø na ri ró, Wakristo kʉ ná gø dhi nrŭ dho ringani ndima rrnga fø yadha dho. Ká addudho? Mungu dzá lo ripo Wakristo dho ringani ndima “djøni bbobbonga na kʉ ná kpa dho” ndirigoti ndima rrnga nzɨ ddani Mungu dhó yadha tso ró ná yadha dho.​—Ro. 13:1; Mdo. 5:29.