Jadda kpa​—Anira anzi maendeleo ni nji nari na batiso goti

1. Bí kʉ ná jadda kpa ká nji ngbá bblo kʉ ná lo b’lo?

KRɄ cho ró, maelfu kʉ ná jadda Wakristo adi batiso ba. Ni ma ká jiri ni njiri fø ddi? Njati rie ni ró, kutaniko nǎ le-djoi ma, le-vei ma na ka ndima ba hwè bbo ni dzá lo dho ndirigoti ni ka ni bbʉ hwè Yova dho maddi! (Mez. 27:11) Addinga b’lo ni nji ná bblo lo djo di. Loroji na, njaro ni zø Biblia li ni li ni dyʉ ro cho bí b’lo. Biblia ni zø nari liri ni uri nari kʉ, ri kʉ Mungu dzá Lo. Føri kina, ni chu ndirigoti ni ji takatifu kʉ ná fø buku si dhó ro ná ke. Nidhó jidha dhi Yova djo kpø ni bbʉ ni ke dho ndirigoti ni ba batiso. Ni vʉe bblo kʉ ná longa!

2. I lo nǎ ká ko si loti addu djo?

² Njaro batiso ni ba nari njí ni baeni kpakpalo na nari lieri rie kpakpa ni tøni chi Yova dho. Ro ni dhidhi nari bbai ni si bani ø mbudha na. Shetani si rimbu ndi liri ni bbá Yova ni ji nari ndirigoti ke dho ni njínji nari tso. (Efe. 4:14) Nidho nzá ringani ni bbá nga fø lo dho ri. Nde, addui ká ka ndi kó ni tsotso ni tøni chi Yova dho ndirigoti ni njí ni bbʉe nidhó maisha ke dho ro ni njie ná tsodha ró njí d’e? Nidho ringani ni njí kpakpanga ndiro ni ngʉ dhidhi kiroho nǎ ná Mukristo d’e. (Ebr. 6:1) Nde, føri ká ni ka ni njí ngbaribbai?

NI KÁ KA NI NJÍ ADDU NJA NI NJÍ MAENDELEO KIROHO NǍ D’E?

3. Batiso goti ká ringani Wakristo krʉ dho ndima njí addu?

³ Batiso goti, ko krʉ dho ringani ko njinjí mutume Paulo bbʉngʉe Waefeso nǎ Wakristo dho ná shauri na. Ke lingʉe kpa kpakpa kpa é “dhidhi” kiroho nǎ ná Wakristo d’e. (Efe. 4:13) Føri kʉ nja chu nǎ le ripo ‘Anira anzi maendeleo ni nji kiroho nǎ nari na’ ri. Paulo pongʉeri kiroho nǎ le maendeleo nji nari kʉ ddiddi kimwili nǎ ddikpa ngba dhi nari bbai. Kalʉ ngba dzá gø dhi ndrŭ adi ndima mbu li ndirigoti kpa jirie ndima dhi ngba ji. Ro ngba nzá ka ndi má kalʉ choro nŭnŭ ri. Ddikpa saa djo ngba si “nzø dha tso” bbabba. (1 Ko. 13:11) Wakristo maddi e fø. Batiso goti, ringani ko njí maendeleo kiroho nǎ. Akonja ko tsotso ka ndi kó nja ko njiri fø d’e ná lo ro di.

4. Ni tsotso ká ngbá sifa ka ndi kó nja ni njí maendeleo kiroho nǎ d’e? Aturinga (Wafilipi 1:9)

⁴ Aliri nidhó jidha dhidhi Yova djo. Ni kʉ b’lo ni ji Yova bbo ro. Ro nidhó jidha ki ka ndi dhidhi fø nga djolu maddi. Ká ngbaribbai? Ddikpa chu mutume Paulo d’rangʉe Wafilipi 1:9. (Azø.) nǎ. Ke nzingʉeri Filipi nǎ ndrŭ tso kpadhó jidha “dhidhi bbo pli.” Føri dzá lo dho kodhó jidha maddi ka ndi dhidhi Yova djo. Ko ká ka ko njiri fø ngbaribbai? Ko ka ko njiri fø “bbʉbbʉ kʉ ná lo ko chu ndirigoti ri nanga ko ne” nari chulu. Bbo ko di lo chu Yova djo ró, kodhó jidha maddi adi dhidhi ke djo ndirigoti kedhó sifa ma, ke lo nji ná chu ma na adi hwè bbʉ ko dho. Ko adi riji ko bbʉ hwè ke thí dho, ná føri adi ngʉ kpakpa ndirigoti ko nzɨ adi riji ko bbʉ njedha ro ke dho ri. Ko adi kpakpanga nji ko famu ke ji ná lo ndirigoti ngbaribbai ma ko ka ko njiri fø nari d’e.

5-6. Ko ká ka ko liri kodhó jidha dhidhi Yova djo ngbaribbai? Aturinga.

⁵ Yesu ngʉ adi Yova dhó sifa dyø kaka nari bbai. Føri dzá lo dho njati ko chu Yesu bblo ró, ko si Yova ji bbo. (Ebr. 1:3) Ko ka ko chu Yesu bblo, tho kʉ ná Enjili nǎ kʉ ná lo ko zø nari chulu. Njati rie nzá ni d’e krʉ ddo ró le Biblia zø ná ritso nga ri ró, ni ka ni ngá ritso njʉ nga djó ro. Yesu djo ni lo zø ná saa na, anja kedhó pekee kʉ ná sifa. Ndrŭ jingʉe ke na ndima loti ndirigoti ke na ndima di nari ji. Ke ngʉ adi rere nzø tso njú ndi kuso. (Mk. 10:13-16) Ke ngʉ adi rili ndidhó wanafunzi mbu ndima bblo; ndirigoti ngbaribbai ma ndima ndima mbu nari kpa d’ra ke dho nari do ro nzɨ kpa ngʉ adi njiri. (Mt. 16:22) Fø chu nǎ, Yesu ngʉ adi ndidzá ra nǎ Baba dyø. Yova na ko loti nari do ma nzá ddi ka ndi njí ko ro ri. Ko ka ko tilo ke na sala chulu. Sala ko nji ná saa djo, ko ka ko po ko ddi ndirigoti ngbaribbai ma ko ko mbu nari krʉ ke dho. Ko churi chu nari kʉ, ke nzɨ adi lo ro d’i ko djo ri. Dhonalo ke jirie ko ji ndirigoti ke nanga kodhi lo adi d’o ni.​—1 Pe. 5:7.

⁶ Yesu ngʉ adi zølo dhǒ ndrŭ dho. Mutume Matayo ndiri: “Ke njangʉe ndrŭ kpari ro, ke ndrŭ dhiri zø njingʉe dhonalo ndrŭ njengʉeni nje ndirigoti ndrŭ nanga plingʉeni nga bai kʉ ná chembø bbai.” (Mt. 9:36) Nde, Yova ká adi ndi mbu ngbaribbai? Yesu pongʉeri: “Madzá ra nǎ Baba nzá jiri fø rere nzø kana ddikpa le ma ba sadha ro ddi ri.” (Mt. 18:14) Fø lo adi hwè bbʉ ko dho dhonalo ri ridho nari kʉ, Yova jirie ko bbo. Njati ko chu Yesu bblo pli ró, kodhó jidha maddi ka ndi dhidhi Yova laidjo.

7. Dhidhi kiroho nǎ ná Wakristo na ni saa ba ni di nari ká ka ndi kó ni tsotso ngbaribbai?

⁷ Ni ki ka ni njí maendeleo kiroho nǎ njati ni di saa ba ndirigoti ni di jidha dhǒ bbo ndirigoti ni di rine ni chu kutaniko nǎ dhidhi kiroho nǎ ná le-djoi ma, le-vei ma na ró. Aneri ni chu ngbaribbai ma kpa e hwè na nari. Kpa nanga ro nzɨ ndima vʉngʉeri ndima njinjí Yova dho nari adi d’o ri. Apori kpa tilo ni dho Yova dhó njí kana ndima dangʉe lú ná lo djo. Njati rie bbo na mana kʉ ná longa ni ji ni vʉ ri ró, ako shauri kpa tso. Dhonalo “shauri bbʉ ná ndrŭ é bí ró, krʉ kʉ ná lo adi njini nji.”​—Mez. 11:14.

8. Biblia po ná lo djo ni nanga di rɨni rɨ ró, ká ni ka ni njí addu?

⁸ Asisi ni nanga rɨni nari djolu. Paragrafu ya 2 nǎ ko njaeri nari bbai, Shetani si riji nzɨ ni nji maendeleo kiroho nǎ. Føri ke si nji lú na ddi chu ro kʉ, ke si rili ni nanga di rɨni rɨ Biblia ddi ná nja lo djo. Loroji na, nja ndrŭ si rimbu ndima liri ni uri nari kʉ, Mungu nzá noe ko ro ri, ro ko sirie mageuzi nǎ ro. Go ni ngʉe sese ro, ni nzɨ ngʉ adi nga ro ddi fø lo djo ri, ro njaro kpadjo le riddi ni dho darasa nǎ. Njaro nidhó mwalimu ddi mageuzi djo ná lo ka ndi di njani bbʉbbʉlo bbai. Nì mai ri kʉ føro, kpa nzá d’erie ri ro mbu ndima ne Ngano ná ke kʉ nì nari dhǒ ná lo ro ri. Ano Mezali 18:17 nǎ kʉ ná kanuni nga: “Ya kwanza si ndidhó lo na ná kedhó lo adi njani bbʉbbʉ kʉ nari bbai, kpø ke tso ró ke si ná saa na, ke si lo dzá bbʉbbʉnga dhǒ ná lo dhu ke tso ná nga djo.” Darasa nǎ le ddi ná lo ni úe krʉ nari rɨngana, aneri ni chu Mungu dzá Lo ká addu ma po ri djo nari. Anji utafiti kodhó vichapo nǎ ro. Atilo drdr ngʉ adi mageuzi ú ná le-djoi ma, le-vei ma na na. Adhuri kpa tsó ri ká kʉ addui lingʉeri kpa uri nari kʉ, Ngano ná jiji ko ná ke kʉ nì. Fø di ná lo ka ndi kó ko tsotso ko uri nari kʉ, Ngano ná ke kʉ nì.

9. Melissa da lú ná lo nǎ ro ká ni ba ngbá somo?

⁹ Melissa ró dho kʉ ná le-ve bangʉe faida nononi ná ritsi djo ndi nji utafiti nari nǎ ro.b Le pori: “Darasa nǎ, walimu ngʉ adi mageuzi dhi longa tú nari ngʉ adi rili ndrŭ uri nari kʉ, ri kʉ bbʉbbʉlo. Utafiti ma njí ri djo anziro nari do ngʉ ma njinji dhonalo ma ngʉ riddi nari kʉ, ma si ba ná lo si ridho nari kʉ mageuzi kʉ bbʉbbʉlo. Ro ma ddingʉe nga djo nari kʉ, Yova adi riji ko dhǒ ko u ná lo dhǒ. Føri dzá lo dho ma ngangʉe utafiti ma nji nari tso. Ma zøngʉe ɨ djǒ ripo ná buku, Je, Kuna Muumba Anayekujali? Ndirigoti ɨ djǒ ripo ná broshua Uhai​—Ulitokana na Muumba? ndirigoti Vitu Vyenye Uzima Vilianza Namna Gani?​—Maulizo 5 ya Kujiuliza na. Føri ngʉe madhó lo ungʉe ná lo nganga. Madhó lo ungʉeri ma njí fø lo anziro dhé.”

10-11. Addui ká ka ndi kó ni tsotso ndiro ni é tsetse ná nyí na d’e? (1 Watesalonike 4:3, 4)

¹⁰ Abba che kʉ ná nyí tso. Go ni kʉ jadda ro ngono dyu ka ndi é ni nǎ bbo ndirigoti nja ndrŭ ka ndima cho ni, ni njí uasherati. Føri i kʉ, Shetani adi ji ni njí ná lo nganga. Nde, addui ká ka ndi kó ni tsotso nja ni tøni chi fø di ná mbudha tso ró d’e? (Azø 1 Watesalonike 4:3, 4.) Ddiro ni nji ná sala nǎ, ad’ra ngbaribbai ma ni ni mbu nari Yova dho. Ad’ra ngbaribbai ma ni ni mbu nari nganga ndirigoti anziri ke tso ke bbʉ kpakpanga ni dho. (Mt. 6:13) Anonga nari kʉ, Yova adi riji ndi kó ni tsotso ko ro, nga ndi bbʉ malipizi ni dho ri. (Zb. 103:13, 14) Mungu dzá Lo maddi ka ndi kó ni tsotso ko. Anziro djo ko tielo ná Melissa ngʉ hwini nga kʉ bblo ná ngaddidha tso ró. Le pori: “Biblia ma zø krʉ ddo ró nari ngʉ adi rili ma hwini che kʉ ná ngaddidha tso ró. Ri ngʉ adi rili ma nonga nari kʉ, ma bbʉrie ma Yova dho ndirigoti ma jirieri ji ma njinjí ke dho madhó maisha nǎ.”​—Zb. 119:9.

¹¹ Nzɨ di rine ni si nidhó kpakpalo ni ddi ro. Ad’ra ni hwini na ná lo nidzá gø dhi ndrŭ dho. Fø di ná lo le d’ra ndrŭ dho nari ngae sʉsʉ ri ro bbbbʉ dhé, fø ni rinji nari kʉ bbo na mana kʉ ná lo. Melissa pori: “Ma nzingʉe nga nja ma ba kpakpanga d’e, ndirigoti ma d’rangʉe ma hwini na ná kpakpalo madzá baba dho. Føri goti, ma mbungʉe ma bblo dhonalo ma chungʉeri ma hwè bbʉ Yova dho.”

12. Bblo kʉ ná longa ká ni ka ni vʉ ngbaribbai?

¹² Abba Biblia nǎ kanuni ddá chutso ni dho. Ni dhi nari bbai, nidzá gø dhi ndrŭ di ribba ni vʉ nidhó bí kʉ ná longa ni ni ro. Ro bí kʉ ná nja lo ro nzá ni d’e churi. Ni kana kʉ Yova na ná kau ka ndi sa ná lo ni nji nari tso ká ni ka ni nyí ngbaribbai? (Mez. 22:3 Kari ró dho kʉ ná le-ve ndi tsotso ká addu kongʉe ndi vʉ bblo pli kʉ ná lo nanga d’e nari nga tu. Le rangʉe ri famu nari kʉ, dhidhi kiroho nǎ ná Mukristo nzá ka ndi ne sheria krʉ kʉ ná lo djo ri. Le pori: “Ma famungʉeri nari kʉ, ma dho ringangʉeni ma chu Biblia nǎ kanuni, sheria dhé ma dyø nari rɨngana.” Biblia ni zø ná saa na, adhuri ni tsó: ‘Ma zø ná i lo ká ddi addu nga ma dho Yova dhó ngaddidha djo? Ri nǎ ká kʉ ma tsotso ka ndi kó nja ma njí bblo lo d’e ná kanuni ro ddi? Njati rie ni ró, ri na ma njínji nari nǎ ro ká ma si faida ba ngbaribbai?’ (Zb. 19:7; Isa. 48:17, 18) Biblia ni zø ndirigoti ni di ngaddi ri nǎ ro ni ba ná kanuni djo ró, ri ka ndi é sʉsʉ ni dho ni vʉ hwè ka ndi bbʉ Yova dho ná lo nanga. Ni di maendeleo nji kiroho nǎ ró, ni si ri famu nari kʉ, nidhó lo nzá u sheria krʉ kʉ ná lo kana ri dhonalo ni si Yova dhó ngaddinga famu bí kʉ ná lo djo.

13. Bblo kʉ ná bbakau ká ka ndima é ngbá matokeo na ni djo? (Mezali 13:20)

¹³ Avʉ ngbà ji Yova ná bbakau. B’lo ko njaeri nari bbai, ni vʉ bblo kʉ ná bbakau ró, kpa ka ndima liri ni ngʉ dhidhi kiroho nǎ ná Mukristo. (Azø Mezali 13:20.) Sara ró dho kʉ ná le-ve vingʉe ndidhó hwè vi. Ro ddikpa saa djo njingʉeni ná lo kongʉe le tsotso bbo ndiro le ø ndidhó nganjadha thika d’e. Sara pori: “Ma bangʉe bblo kʉ ná bbakau ndirigoti bblo kʉ ná saa na. Ddikpa jadda le-ve ma na ko ngʉ adi Dzamu dhi Munara nǎ longa ne ddinga krʉ yenga ddo ró. Ddikpa kau kongʉe ma tsotso nja ma di komatere bbʉ njudha dhi nanga d’e. Madhó bbakau kongʉe ma tsotso nari dho ma ngangʉe ddiro ma Biblia zø nari ma, sala ma nji nari ma na tso li ma li ma dyu ro. Ko kana kau ki ngʉngʉe kpakpa Yova na ndirigoti ma bangʉe hwè ki vi.”

14. Julien ká bangʉe bblo kʉ ná bbakau ngbaribbai?

¹⁴ Bblo kʉ ná matokeo na ka ndi é ni djo ná ndrŭ na ká ni ka ni njí kau ngbaribbai? Julien, muzee ndi kʉ kpadjo ro pori ɨ: “Go ma ngʉe jadda ro, ma bangʉe bblo kʉ ná bbakau lo ko ngʉ adi d’ra le-djoi ma, le-vei ma na ná saa na. Føri ngʉe kpakpanga na ngʉ adi lod’ra ná bbakau ndirigoti kpa kongʉe ma tsotso ndiro ma ba hwè lod’radha dhi njí nǎ ro d’e. Madhó muradi ngʉe ma di lod’ra krʉ saa ró. Ma rangʉe ri famu nari kʉ, ma nga ngʉe bblo kʉ ná bbakau na bí ri dhonalo ma ngʉ bbakau ne ddiddi na madhó cho kʉ ná jadda kpa kalu dhé. Luti ma bangʉe bblo kʉ ná bbakau Beteli nǎ. Kpadhó loroji kongʉe ma tsotso ma di bblo kʉ ná le nyǒ djedha dhi ritsi vʉ ndirigoti føri lingʉeri ko kana kau é Yova na chøchø.”

15. Bbakau djo ká Paulo bbʉngʉe ngbá shauri Timoteo dho? (2 Timoteo 2:20-22)

¹⁵ Njati ni rá riba nidhó kutaniko nǎ ddikpa ke nga kʉ bblo kʉ ná kau ni dho ri ró, ká ringani ni njiri ngbǎ? Paulo chungʉeri nari kʉ, kutaniko nǎ nja ndrŭ nzɨ ngʉ njini Wakristo ka ndima njini nari bbai ri, føri dzá lodho ke pongʉeri Timoteo dho ke di da fø di ná ndrŭ ró ro. (Azø 2 Timoteo 2:20-22.) Ko kana kau Yova na kʉ bbo na mana kʉ ná lo. Ko nji kpakpanga bbo nja ko kana kau é Yova na d’e, føri dho ko nzá ka ko gba ko tso ro sa ka ndi sa ko kana kau kodhi ra nǎ Baba na ná kau na ri.​—Zb. 26:4.

KIROHO NǍ MURADI KÁ KA NDI KÓ NI TSOTSO NGBARIBBAI NJA NI NJÍ MAENDELEO KIROHO NǍ D’E?

16. Ni ká ka ni li ngbà di ná muradi ro mai ni nji?

¹⁶ Ali faidi dhi muradi ni nji. Avʉ kpakpa ka ndi li nidhó udha ndirigoti ni tsotso ka ndi kó ni dhidhi kiroho nǎ ná muradi. (Efe. 3:16) Loroji na, ni ka ni vʉri ni di Biblia zø ndirigoti ni di ri nǎ longa ne krʉ ddo ró. (Zb. 1:2, 3) Føri kina ni ka ni vʉri ni di sala nji krʉ saa ró ndirigoti ni thí nǎ ro. Njaro ringani ni vʉ ni adi ni nyǒ dje na ná ritsi bblo inga ngbaribbai ma ni njínji nidhó saa na nari. (Efe. 5:15, 16) Ni kpakpanga nji ni njí maendeleo kiroho nǎ nari Yova nja ná saa djo, ke thí adi hwè ba bbo.

17. Nja ndrŭ tsotso ni kó nari ká ka ndi bbʉ ngbá bblonga ni dho?

¹⁷ Ni ka ni ngʉ dhidhi kiroho nǎ ná Mukristo njati ni di nja ndrŭ tsotso kó ró. Yesu pongʉeri: “Ritsi le bbʉ nari adi hwè bbʉ bbo ritsi le bǎ nari djolu.” (Mdo. 20:35) Ni di njínji nidhó saa na ndirigoti nidhó klø na ni kó na nja ndrŭ tsotso ró, ni si hwè ba bbo. Loroji na, ni ka ni li muradi ro ni di ngó ndrŭ ma, tsútsu ná ndrŭ ma na tsotso kó nidhó kutaniko nǎ. Njaro ni ka ni rá nga ro mai dzi kpa dho inga ni kó kpa tsotso kpa chú njínjidha eletronike dhi ritsi na mai. Njati ni é le-djo ró, ali muradi ro ni nji ni ngʉ mutumishi wa huduma, fø chulu ni ka ni kó ni djoi ma, ni vei ma na tsotso bbo. (Flp. 2:4) Nga kʉ kutaniko nǎ ná ndrŭ dho maddi ni ka ni dhǒ jidha Pidhinga dzá hwè lo-i ni d’ra kpa dho nari chulu. (Mt. 9:36, 37) Rie ngbà ri ka ró, ali muradi ni nji ni njínji Yova dho krʉ saa ró.

18. Lod’radha dhi njí ni nji krʉ saa ró, nari ká ka ndi kó ni tsotso ni dhi kiroho nǎ ngbaribbai?

¹⁸ Krʉ saa ró ni lod’radha dhi njínji nari ka ndi liri ni kana nga é chøchø Yova na. Upainia dhi njí ka ndi kló chutso ni dho Masomo ya Waeneza Enjili dho. Ndirigoti ri ka ndi kaka ni njinjí Beteli nǎ inga ujenzi dhi njí. Painia kʉ ná le-ve Kaitlyn pori ɨ: “Ma ngʉ saa ba ma d’ralo dhidhi kiroho nǎ ná le-djoi ma, le-vei ma na nari kongʉe ma tsotso ma dhidhi kiroho nǎ batiso ma ba nari goti. Kpadhó loroji chongʉe ma ronga ma zø Biblia bbo ndirigoti ma thɨ madhó ufundi thika longaddidha dhi njí kana.”

19. Kiroho nǎ ni maendeleo nji nari nǎ ro ká ni si ngbá ledha ba?

¹⁹ Ni di maendeleo nji kiroho nǎ ró, ni si ledha ba bbo. Ni nzá ka ni vi nidhó kpakpanga nga na mana kʉ ná ritsi ni dyø nari na ri. (1 Yo. 2:17) Ni ka ni pʉ che kʉ ná longavʉdha nǎ ro adi si ná kpakpalo pʉ ni ró ro. Føri rɨngana ni ka ni ba bbʉbbʉ kʉ ná hwè. (Mez. 16:3) Nidhó bblo kʉ ná loroji si ngó inga jadda kʉ ná ni lai Wakristo li kpakpa. (1 Ti. 4:12) Ndirigoti bbo pli na mana kʉ nari kʉ, ni si hwè ba ndirigoti ngoi ba, ni Yova nyǒ tho ná lo nji ndirigoti ni kana nga kʉ chøchø ke na nari dho.​—Mez. 23:15, 16.