Ni tsotso ka ndi kó ná lo ndiro ni di ngazø krʉ ddo ró d’e
FUNZO la pekee ni nji krʉ ddo ró nari ká e kpakpa ni dho? Ko krʉ dho ri e kpakpa nja saa na. Ro, addinga krʉ ddo ró ko adi nji ná ritsi djo, loroji na dda ʉdha. Dda ʉdha adi saa ma, kpakpanga ma na u, ro ko adi ko mbu bblo ri ko nji nari goti! Føri bbai, Biblia ko zø nari maddi ka ndi liri ko mbu ko bblo. (Efe. 5:26) Anja ni tsotso ka ndi kó ná lo ro:
Akpe programu. Ko churi nari kʉ Biblia nǎ lonanga ko ne ná føri kʉ ringani ko njí ná ddikpa “bbo nǎ mana kʉ ná lo.” (Flp. 1:10) Ndiro nzɨ ni vi funzo ni si nji ná saa nga ró, ri kʉ bblo ni ndi nidhó programu ddikpa papie djo ndirigoti ni liri tse ni ka ni nja ri ná ngana. Inga ni ka ni li alarme nidhó telefone na ndiro ri di ni djǒ ngano Biblia ni zø nari njí d’e.
Avʉ bblo ka ndi e ni dho funzo dho ná lo. Ri ká e sʉsʉ ni li ni dyu lo ro saa bí kana inga sese saa dho? Ni chu nidhó lo bblo. Føri dho, akpe nidhó funzo dhi programu nidhó lo ró ro. Njati ni di ni mbu nzá nji é funzo nari bbai ri dho ni kpee ná saa na ró, amburi ni njí funzo miniti 10 kana dhé. Miniti 10 kana ni nji funzo nari kʉ bblo pli nzá ni njie ri nari djolu. Ndirigoti njaro miniti 10 kana ni nji funzo nari ka ndi liri ni é ù na bbo ngazødha dho ndirigoti ni ra anzi ri na.—Flp. 2:13.
Avʉ ni si nanga ne ná lo nzina. Njati ni ddinga ni si zø ná lo djo ri ni si zø ná saa na dhé ró, ni nzá ka ni “njínji bblo nidhó saa na” ri. (Efe. 5:16) Andi ni ka ni si ji ni zø ná lo dhi liste. Nga ni zø ná saa na, njati ni famu ddikpa lo ro bblo nzá ró, andiri nidhó liste djo. Ndirigoti funzo sini ná saa na, nidhó liste djo ni ka ni ndrɨ luti ni ka ni ji ni ne nanga ná lo.
Adi nidhó lo thika øø. Bbo na mana kʉ ná lo kʉ ni di nidhó funzo nji krʉ ddo ró. Ndiro fø lo njini d’e, ngbà ri ka ró akpe ni ka ni njí funzo ná ddo ma, ri ni ka ni njí ná saa ma, ngbá ngatsi ni ri nji nari ma inga ngbá lo ma ni zø nari ma na.
Njati ko di funzo nji krʉ ddo ró ró, ko adi faida ba bbo. Ko kana kau adi ngʉ chøchø Yova na, ko adi lo nanga vʉ bblo kodhó maisha nǎ ndirigoti ko adi ko mbu bblo.—Yos. 1:8.