Kodhó lo zø ná kpa adi dhu ná lo
Hwè dhi lo-i d’radha tso ká si d’ø ngbá saa na?
Yesu pongʉeri ɨ: “I Pidhinga dzá hwè lo-i si d’rani dz’ djolu gble ndiro ndrŭ tsɨ krʉ chu lo ri djo d’e, ná føri goti i mwisho si kʉ si.” (Mt. 24:14) Matayo 24:14 ndirigoti verse 6 ma, 13 ma na nǎ Yesu tilo “mwisho” djo, ná fø lo na le tafsiri Kigiriki nǎ le ripo teʹlos ná lo nanga. Fø lo adi Shetani dhó i dz’ si kʉ si ndidzá mwisho na Armagedoni na nari dhǒ. (Ufu. 16:14, 16) Føri dho, kpø Armagedoni sisi ná nga nji, ko ra anzi dhé hwè dhi lo-i ko d’ra nari na. Fø lo wø anziro ko chue ná lo thika.
Anziro ko famueri nari kʉ, hwè dhi lo-i d’radha tso ka ndi sie d’ø bbò mbudha tso si ngani ná saa na, ná føri kʉ bbò Babiloni si sadha ba ná saa. (Ufu. 17:3, 5, 15, 16) Godhé, ko ungʉeri ki nari kʉ, bbò mbudha tso si ngani ná saa na, Yova nzɨ si ribba ndrŭ u hwè dhi lo-i ki ro ri. (Isa. 61:2) Føri kina, ko ngʉ riddi nari kʉ, bbò mbudha lu ka ndima si da nari sie, fø nga njí njingʉe njí Yova dho chi ndima tøni ro ná ndrŭ dhé. Ko ngʉ kpa ddí cho 607 na Y.G.G Yerusalemu bangʉe sadha ná saa na gøngʉe ná Wayaudi na. Fø ndrŭ ro le lingʉe alama b’lo anziro dhonalo kpa ngʉ adi madha bbʉ Yova dho ndirigoti kpa ndrongʉe che kʉ ná lo njidha. (Eze. 5:11; 9:4) Nì mai ri kʉ fø ro, fø ngaddidha nzá gbani Matayo 24:14 nǎ Yesu pongʉe ná lo na ri. Fø andiko nǎ kʉ ná lo ridho nari kʉ, kpø mwisho inga Armagedoni si nari njí, ndrŭ ka ndima ba chu ngbà dhé ndiro ndima u hwè dhi lo-i d’e.
Ko wøe ngbaribbai ma ko ngʉ Matayo 24:14 nǎ kʉ ná lo famu nari thika nari dho, kodhó lo ue ko wø ngbaribbai ma ko adi Ufunuo 16:21 nǎ lo famu nari thika maddi. Fø andiko tilo bbobbo thokpa djo. Bbo ko ne lo nanga nari goti ko ra riba nari kʉ, aro kʉ ná fø maandiko nǎ kʉ ná lo ronga njunju. Ká ngbaribbai? Fø logoti bani ngbaribbai ma ndrŭ adi Pidhinga dzá imba u njʉ nari nǎ. “Gødha ba ná ndrŭ” dho mutume Paulo ndingʉe ná lo kʉ bblo kʉ ná imba, føri i kʉ “shinga dzǐ.” Ro, Mungu dhó mbubai dho ke ndingʉe ná lo kʉ che kʉ ná imba, føri i kʉ “dhe dzǐ.” (2 Ko. 2:15, 16) Fø ndrŭ ndorie Pidhinga dzá imba dhonalo ri adi ji kpa ji ná i dz’ kʉ che nari ma, ri djo pinyo nari kʉ Shetani nari ma, ri si sadha ba karnga goti nari ma na dhǒ.—Yoh. 7:7; 1 Yo. 2:17; 5:19.
Føri kina, achu i lo maddi: Ufunuo 16:21 tilo djo ná loroji dhi bbobbo thokpa sie “bbo pli nì rie nari djolu.” Føri na mana kʉ, bbò mbudha dhi saa na lod’radha dhi njí ka ndi si ngʉ kpakpa bbo, ná føri si rili Yova ró dho chuni anzironga djolu. (Eze. 39:7) Nde, fø saa na, b’lo bbò Babiloni ba sadha nari goti ká nja ndrŭ nanga ro si jini nzɨ Pidhinga dzá imba dho ddiddi kpa nanga adi jini djŭ ngø ná ritsi dho nari bbai? Føri ko ka ko u nzá ko nanga rɨni ro. Njaro kpa si ngbaribbai ma cho bí kana Yova dzá Dimu ngʉ kali dhi dini si sani nari d’ra ndrŭ dho nari ngano.
Ndiro ko nja ngbaribbai ma fø lo ma ronga nju nari d’e, akotilo mapigo 10 Misri nǎ ndrŭ bangʉe nari goti njingʉeni ná lo djo di. B’lo Yova “d’ilo Misri nǎ miungu krʉ djo” nari goti, nzɨ ngʉ adi madha bbʉ ke dho ná “bí kʉ ná ndrŭ” gbangʉe ndima tso Waisraeli na. (Kut. 12:12, 37, 38) Njaro fø ndrŭ ngʉngʉe Yova ro kpa njangʉe Musa ngʉ bbʉ mapigo 10 djo ná lojadha njingʉeni nji nari dho.
B’lo bbò Babiloni ba sadha nari goti si kʉ ngʉ Yova ro ná ndrŭ krʉ si pendeleo ba ndiro ndima njí bblolo go sie fø saa na dz’ djó ná Kristo djoi dho. (Mt. 25:34-36, 40) Bbʉbbʉ dhé, ndrŭ djo le lod’i chembø bbai ná fø pendeleo tso si d’yani Armagedoni njí karnø, dz’ djó mae ná ché na le d’ri ná kpa si dji ra na ná saa na.
Ngbaribbai ma ko ngʉ fø lo famu anziro nari thika ko wø nari Yova dhó bbò jidha ma, zølo ma na dhǒ. Bbʉbbʉ dhé, ke “nzá jiri ddikpa le ma ba sadha ro ddi ri, ro ke jiri krʉ kʉ ná ndrŭ leni le.”—2 Pe. 3:9.