Ciiyo 8

Ino Balwani Bakwe Lesa Mbaani?

Mubiibi Sataana ngo mulwani munene wakwe Lesa. Ncilengwa ca mushimu cakafutatila Yehova. Sataana ulatolelesha kupikisha Lesa alimwi ngo ulengesha bantu ayi banopenga maningi. Sataana ngu mubiibi, ngu mubeshi alimwi ngu mucayi.—Joni 8:44.

Ashimwi shilengwa sha mushimu shakaba ku lubasu lwakwe Sataana mukutanyumfwila Lesa. Baibolo ileeta sheeshi shilengwa ayi mishimu ibiibi. Mbuli Sataana, mishimu ibiibi njilwani ku bantu. Ilisuni kupensha bantu. (Mateyo 9:32, 33; 12:22) Yehova ulaakunyonyoola Sataana a mishimu yakwe ibiibi kwa muyayaya. Bacalabo a ciindi ciniini cakupensha bantu.—Ciyubululo 12:12.

Na mulisuni ayi mube bashicibusa bakwe Lesa, tamweelete kucita shintu Sataana nshasuni ayi munocita. Sataana a mishimu ibiibi balipatite Yehova. Mbalwani bakwe Lesa, alimwi balisuni ayi mwebo mube balwani bakwe Lesa. Mulyeelete kusala ngomusuni kusangalasha—Sataana nabi Yehova. Na mulisuni kukala buumi butamaani, mulyeelete kusala kucita kuyanda kwakwe Lesa. Sataana ulacenjeeka bantu kusebensesha nshila shiinji. Bantu baanji balabecekwa anguwe.—Ciyubululo 12:9.