Caankamiko Cakacitika Palweenge Lusalala

Falawo ndyaakanyumfwabo ayi bene Isilaeli baya, wakacinja maano akulwiita masoja akwe ayi: ‘Amubwese shikoci sha nkondo  tubakonkele! Nakwiinga tatukwe kubaleka ayi baye.’ Aboobo Falawo amasoja akwe bakatalika kutandaanya bene Isilaeli.

Yehova wakalinga kutanjilila bantu bakwe kwiinda mulikumbi malumwi acitondesho ca mulilo mashiku. Ndyebakashika pa Lweenge Lusalala, wakabalwiita ayi bayake twaanda twa matente.

Lyalo bene Isilaeli bakabona Falawo amasoja akwe kabesa cibakonkela. Bakalicana pakati ka lweenge a masoja abene Ijipiti. Bakalilila Mose ayi: ‘Tutoofwa! Nakwiinga wakatulekabo mu Ijipiti.’ Sombi Mose wakaamba ayi: ‘Mutaloondi. Amulindilebo mubone Yehova mbweshi atupulushe.’ Ncakutatoonsha Mose wakalinga kucite lushomo luyumu muli Yehova, sa tabushi?

Yehova wakalwiita bene Isilaeli kuswa pamusena mpobakalinga. Lyalo mashiku, Yehova wakasenya likumbi kuswa kunembo lyabo akusa mukuba pakati kabo abene Ijipiti. Kulubasu kwakalinga bene Ijipiti kwakalinga munshinshe. Sombi kunembo lya bene Isilaeli kwakalinga mumuni.

Yehova wakalwiita Mose kutandabika lyaansa lyakwe pa lweenge. Lyalo Yehova wakalengesha muuwo kupuupa mashiku oonse. Maanshi amulweenge akapansaana, lyalo pakati pakaba pa kwiinda. Bene Isilaeli boonse bakeenda payumu nta maanshi ndyakapansaana akwiimikana anga ndubumbu uku akooku.

Falawo amasoja akwe bakakonkela bene Isilaeli mu lweenge. Lyalo Yehova wakapilinganya masoja abene Ijipiti. Mawilo akushikoci shabo akatalika kusokoka. Lyalo bakoolobesha ayi: ‘Atusweemo muno! Yehova utoolwaninako bene Isilaeli.’

Yehova wakalwiita Mose ayi: ‘Tandabika lyaansa lyako palweenge.’ Lyalo peenka apo maanshi akakumana akufwekelesha masoja a bene Ijipiti. Falawo amasoja akwe oonse bakafwa. Taakuwo muntu nabi womwi wakapuluka.

Bene Isilaeli bakalumbaisha Lesa mulwiimbo ayi: ‘Ntokwiimbila Yehova mukwiinga wakoma cabulemu. Wawaala maaki alimwi abalinga kutantiteewo mulweenge.’ Bantu ndyebakalinga kwiimba, banakashi bakatalika kulisha twakulisha akushana. Muntu uli woonse wakakondwa kwaamba ayi baangululwa ano.