Jeoiyada Mbwakatondesha Kutaloonda

Jesebelo wakalinga kucite mwaana mwanakashi waliina lya Ataliya, uyo wakalinga kucita shibiibi bweenka mbuli banyina. Ataliya wakalinga kweebetwe ku mwaami wa bene Juda. Beebaye ndyebakafwa, mwanaakwe musankwa ngowakatalika kweendelesha. Ano mwanaakwe musankwa ndyaakafwa, Ataliya wakalibika pa bwaami akutalika kweendelesha bene Juda. Lyalo wakalinga kusuni kucaya boonse bakalinga kweelete kupyana bwaami, kwiilikaawo abeshikulu bakwe kwaamba ayi atolelele kweendelesha mbuli mwaami. Bantu boonse bakalinga kumuloonda.

Mupailishi Munene Jeoiyada amukaakwe, Jeosheba, bakalinga kucishi ayi Ataliya nshaakalinga kucita nshibiibi abuumbi. Bakabika buumi bwabo mumapensho kwiinda mukushitilisha mwishikulu wakwe Ataliya, waliina lya Joashi kaacilibo kateta. Joashi wakakulila ku tempele nkobakalinga bamusisa.

Joashi ndyaakakwanisha myaaka 7, Jeoiyada wakeeta bamatanjilili abene Lefi akubalwiita ayi: ‘Mulame milyango ya tempele, alimwi kutasuminisha muntu uli woonse kunjila.’ Lyalo Jeoiyada wakabika Joashi kuba mwaami wa bene Juda akumufwalika cisoti ca bwaami. Bene Juda bakoolobesha ayi: ‘Mwaami kaabukila buumi!’

Mwaami mwanakashi Ataliya wakanyumfwa kuyobeka kwa bantu ku tempele akucicilaako. Ndyaakabona mwaami mupya, wakoolobesha ayi: “Bambukila! Bambukila!” Bamatanjilili bakamucata akumutola pansengwe akumucaya. Ano sa bantu bakatolelela kucita shibiibi?

Jeoiyada wakacafwa bantu boonse kushomesha kuli Yehova ayi balaakunopaila nguwe eenkabo. Jeoiyada wakabalwiita kumwaya tempele yakwe Baali a shibumbwabumbwa. Wakasala bapailishi abene Lefi bakusebensela pa tempele kwaamba ayi bantu batalike alimwi kupailila kuŋanda yakwe Lesa. Wakabika beshikulindilila milyango ya tempele kwaamba ayi kutabi muntu utasalalite weenga wanjila. Lyalo Jeoiyada abamatanjilili bamwi bakabwesa Joashi akumubika pacuuna ca bwaami. Bantu mu Juda bakasangalala abuumbi. Mukwiinga Ataliya mwanakashi mubiibi wakafwa, bantu bakalinga kucikonsha kusebensela Yehova cakwaanguluka kwakubula kupilinganishikwa akulambila kwakwe Baali. Sa waboona kutaloonda kwakwe Jeoiyada mbokwakacafwa bantu baanji?