Basankwa Bacanike Bali 4 Bakanyumfwila Yehova

Nebukadinesa ndyaakatola banaabaami ba bene Juda ku Babiloni, wakalwiita Ashipenasi musebenshi wa mwaami kwaamba ayi anoobalama. Wakamulwiita kusalawo basankwa bacanike bacenjete alimwi bayumu. Basankwa bacanike aba bakalinga kusa mukwiishikwa kwa myaaka yotatwe. Bakalinga kusa mukubaiisha shintu shakalinga kweelete kubacafwa kusebensa ncito shiyandika abuumbi mu Babiloni. Bakalinga kweelete kwiishikwa kubelenga, kulemba, akwaamba mushobo wa bene Babiloni. Alimwi bakalinga kulangilwa kulya shakulya sheenka shilya mwaami abasebenshi bamuŋanda yakwe. Basankwa bali 4 pa baaba bakalinga Danyelo, Ananiya, Mishaelo a Asaliya. Ashipenasi wakabatumba meena apya aku Babiloni ayi: Beloteshasa, Shadileki, Mishaki, a Abedinego. Sa kwiishikwa uku kwakalinga kusa mukubalengesha kucileka kusebensela Yehova?

Basankwa bali 4 aaba bakalinga kushinishite kunyumfwila Yehova. Bakalinga kucishi ayi tabakalinga kweelete kusumina kulya shakulya sha mwaami mukwiinga tashakalinga kusalalite kweelana a Mulawo wakwe Yehova. Aboobo bakalwiita Ashipenasi ayi: ‘Twasenga mutanootupa shakulya sha mwaami.’ Ashipenasi wakabalwiita ayi: ‘Na tamutoolya lyalo mwaami akamuboone ayi mwakoka, alaakuncaya!’

Danyelo wakalinga kucite muyeeyo umwi. Wakalwiita shikubalama ayi: ‘Twasenga munootupabo bucisa amaanshi akunwa kwanshiku 10. Lyalo mukatweelanye mibili abasankwa bacanike beshi banoolya shakulya sha muŋanda ya mwaami.’ Shikubalama wakasumina.

Pesule lyakulya bucisa kwanshiku 10, Danyelo ababye botatwe bakalinga kuboneka kabotu abuumbi kwiinda bacanike bamwi. Yehova wakakondwa kwaamba ayi bakamunyumfwila. Wakapa Danyelo busongo bwakusansulula shiloto a shili anga nshiloto.

Pesule lya kwiishikwa, Ashipenasi wakatola basankwa bacanike kuli Nebukadinesa. Mwaami wakabandikaabo akubona kwaamba ayi Danyelo, Ananiya, Mishaelo a Asaliya bakalinga kucenjete kwiinda bacanike bamwi. Wakabasala kwaamba ayi banoosebensela muŋanda yakwe. Alimwi Mwaami mbaakalinga kwiipusha na kuli shimwi shiyandika nshaasuni kusalawo. Yehova wakabalengesha kuba abusongo kwiinda basongo abeshimajiki boonse ba mwaami.

Nabi kwaamba ayi, Danyelo, Ananiya, Mishaelo a Asaliya bakalinga ku cishi citeshi cinemishaabo, tabakwe kulubaako kwaamba ayi bakalinga basebenshi bakwe Yehova. Sa awebo lyoonse ulaakunookwiibaluka Yehova, nabi koolibo weenka kutaaku bashali?