Maswi Akalembwa Palubumbu

Mukuya kwaciindi, Beloshasa ngowakaba mwaami wa bene Babiloni. Bushiku bumwi mashiku, wakeeta bantu baanji balemekwa abuumbi kukusekelela. Wakalwiita basebenshi bakwe kuleta makaapu a golodi Nebukadinesa ngakabwesa ku tempele yakwe Yehova. Beloshasa abaabo mbakeeta bakasebensesha makaapu aya uku kabalumbaisha balesa babo. Lyalo peenkaapo, bakabonabo lyaansa lya cisankwa kalilemba palubumbu lwa ŋanda mobakalinga kulita.

Beloshasa wakaloonda abuumbi. Wakeeta bantu bakwe beshimajiki akubashomesha ayi: ‘Uyo weshi acikoonshe kusansulula maswi aya ncaamba, ndaakumubika kuba watatu pabantu bacite nkusu abuumbi mu Babiloni.’ Bakeelesha, sombi taakuwo nabi womwi wakacikonsha kusansulula maswi ayo. Lyalo mwaami mwanakashi wakesa akwaamba ayi: ‘Kuli musankwa waliina lya Danyelo wakalinga kusansulwita Nebukadinesa. Inga wacikonsha kusansulula maswi aya.’

Danyelo wakesa ku mwaami. Lyalo Beloshasa wakamwaambila ayi: ‘Na inga wacikonsha kubelenga akusansulula maswi aya, ntookupa kakufwala mushingo ka golodi akukubika kuba watatu pabantu bacite nkusu abuumbi mu Babiloni.’ Danyelo wakaamba ayi: ‘Shipo shanu nshishisuniiwo, sombi ntoomulwiita busansulushi bwa maswi aya. Beeshiwanu ba Nebukadinesa bakalinga kulisumpula, lyalo Yehova wakabaceesha. Mulishi shoonse shakabacitikila, sombi mwebo tamukwe kutondesha bulemu kuli Yehova kwiinda mukunwita waini mumakaapu a golodi akaswa mu tempele yakwe Yehova. Aboobo Lesa walemba maswi ayi: Mene, Mene, Tekeli, a Pasini. Maswi aya alasansulula ayi bene Mediya abene Pesha balaakukoma Babiloni, alimwi teshi mukabeewo mwaami.’

Cakalinga kuboneka anga taakuwo weenga wakoma Babiloni. Yakalinga kushitilishitwe alubumbu lunene abuumbi amulonga ulaamfu. Sombi mashiku eenka alya, bene Mediya abene Pesha bakakoma Babiloni. Sailasi Mwaami wa bene Pesha wakapatula mulonga kwaamba ayi masoja akwe acikoonshe kunjila kabotu mu Babiloni. Ndyebakashika bakacana milyaango kaicalukite! Masoja bakenjila akwiikoma akucaya mwaami. Lyalo Sailasi wakaba mwaami wa bene Babiloni.

Kapatana kwiinda amwaaka, Sailasi wakoolobesha ayi: ‘Yehova wandwita kuyaka cipya tempele yakwe mu Jelusalemu. Musebenshi wakwe Yehova uli woonse weenga wasuna kucafwilisha inga waya.’ Aboobo bweenka Yehova mbwaakashomesha, baJuda baanji bakaboolela ku Jelusalemu pesule lya myaaka 70 kuswa ciindi Jelusalemu ndyeyakanyonyoolwa. Sailasi wakaboosha golodi, makaapu asilifa, a shisebensesho Nebukadinesa nshaakalinga wabwesa kuswa mu tempele. Sa wabona Yehova mbwaakasebensesha Sailasi kucafwa bantu Bakwe?