Yesu Mbwaakashilika Muntu Pabushiku bwa Sabata

Ba Falisi bakalinga kumupatite Yesu, aboobo bakalinga kusuni pakumupeta mulandu kwaamba ayi bamucaate. Bakaamba ayi taakalinga kweelete kunooshilika bantu pabushiku bwa Sabata. Bushiku bumwi pa Sabata, Yesu wakacana musankwa umwi utalashi kasengelela munshila. Wakalwiita bashikwiiya bakwe ayi: ‘Amubone nkusu shakwe Lesa mbweshi shicafwe musankwa uyu.’ Yesu wakasenkanya mate akwe abulongo, akunanika musankwa uyo mumeenso. Yesu wakalwiita musankwa uyo ayi: “Koya ukasambe kumeenso mulishiba lya Sailomu.” Musankwa uyo wakacita bweenka ubo, aboobo kwaciindi cakutaanguna mubuumi bwakwe wakatalika kulasha.

Bantu bakakankamana. Bakaamba ayi: ‘Te uyu muntu ngooulya wakalinga kwikala panshi kaasengelela, na mpashi bakoshanyabo?’ Musankwa ulya wakaamba ayi: ‘Ee, ndime ndakashalwa kaandi moofu!’ Bantu abo bakamwiipusha ayi: ‘Ino watalika buyani kubona?’ Ndyaakabalwiita shakacitika bakamutola ku Bafalisi.

Musankwa ulya wakalwiita Bafalisi ayi: ‘Yesu wananika bulongo mumeenso akundwiita ayi kooya ukasambe. Ubo mbondacita, aboobo ndatalika kulasha.’ Bafalisi bakaamba ayi: ‘Na Yesu alashilika bantu pabushiku bwa Sabata, ingayi nkusu shakwe tashiswi kuli Lesa.’ Sombi bamwi bakaamba ayi: ‘Na nkusu shakwe tashiswi kuli Lesa, nkokwaamba ayi inga taacikonshi kushilika.’

Bafalisi bakeeta bashali ba musankwa uyo akubeepusha ayi: ‘Ino mwanaanu watalika buyani kulasha?’ Bashali bakwe bakalinga kuloonda, mukwiinga Bafalisi bakalinga baamba ayi uyo woonse ushoma muli Yesu, balaakumutanda mu Sunagogi. Aboobo bakaamba ayi: ‘Tatucishiwo. Amumwiipushe mwiine.’ Bafalisi bakeepusha musankwa uyo miipusho iinji kushikila waamba ayi: ‘Ndamulwiita kale nshoonshi. Ino ncomusunini kwaamba ayi mboosheewo alimwi nciinshi?’ Bafalisi bakakalala, akumutanda.

Yesu wakaya mukulangoola musankwa ulya, akumwiipusha ayi: ‘Sa ulashoma Mesiya?’ Musankwa ulya wakakumbula ayi: ‘Inga ndamushoma na ndamushiba.’ Yesu wakaamba ayi: ‘Ndime Mesiya.’ Yesu wakatondesha nkuumbu abuumbi kumusankwa uyu! Taakwe kweelabo pakumushilika sombi wakamucafwa kuba alushomo.