‘Abwise Bwaami Bwanu’

Yehova wakashomesha ayi: ‘Teshi kukabeewo kulila, kunyumfwa kucisa, kuciswa nabi lufu. Ndaakukunkumuna minsonshi yoonse kumeenso abo. Shintu shoonse shibiibi shilaakulubwa.’

Yehova wakalenga Adamu a Efa akubabika mumuunda wa Edeni, kwaamba ayi banookala muluumuno alimwi kabasangalete. Bakalinga kweelete kunoolambila Ishiwabo wakwiculu akususha cishi abana babo. Adamu a Efa tabakwe kunyumfwila Yehova, sombi Lesa nshaakalinga kusuni kucitila bantu tashina kwaaluka. Mulibuku ili, twabona ayi shoonse Lesa nshaashomesha alashikumanisha. Bwaami bwakwe bulaakuleta shoolwe shibotu abuumbi pacishi capanshi, bweenka mbwaakashomesha Abulaamu.

Conoonobo Satana, shibanda shakwe abantu boonse bacita shibiibi balaakunyonyoolwa. Boonse beshibakanooli boomi balaakunoolambila Yehova. Teshi tukanoociswaawo nabi kufwa. Sombi lyoonse tulaakunoobuka katucite nkusu alimwi katusangalete ceebo cakuba boomi. Cishi coonse cilaakuba paladaiso. Boonse balaakunoocite shakulya shibotu amaanda abotu. Bantu balaakunoocitilana shibotu alimwi teshi bakanoolwana na kucitilana shibiibi. Shinyama sha muluundu teshi shikanootuloonda, andiswe teshi tukanooshiloonda.

Tulaakusangalala abuumbi Yehova ndyeshi akanoobusha bantu bakafwa. Tulaakutambula bantu bakafwa kale kale mbuli Abelo, Nowa, Abulaamu, Saala, Mose, Lute, Esita, a Defedi. Tulaakunoosebensela pomwi ambabo pakwaalula cishi kuba paladaiso. Lyoonse tulaakunoosebensa ncito shisangalasha.

Yehova alisuni ayi mukabeeko. Mulaakumushiba kabotu Yehova kwiinda ambomwalinga kuyeeyela. Aboobo atutolele kuyumya bushicibusa bwesu a Yehova pacecino ciindi akwamuyayaya!