Nkalata Kuswa ku Likoto Litanjilila

Nomusunikwi Bamakwesu a Benankashi:

Mukwiinga tulisuni Lesa abantu ‘tulaya mukwiisha bantu bamishobo yoonse kuba bashikwiiya, akubabombeka.’ (Mate. 28:​19, 20; Maako 12:​28-31) Lusuno lwa mushobo uyu inga lwayuminisha baabo bacite moyo ulibambite kutambula buumi butamaani.—Milimo 13:48.

Kale kale, twakalinga kubikila maano kwaabila mabuku akulabilila nsheenga twaamba. Ano pacecino ciindi tulyeelete kusebensela pakushiba kabotu bwakubandika abantu. Tulisuni kutondesha ayi tulisuni bantu kwiinda mukubandika pamakani abakuma bunene. Aboobo tulyeelete kuba balibambite kwaalula mubandi akubikila maano kumakani atookuma muntu womwi awomwi alimwi ngeenga wasuna kwiiya. Ino buloshuwa iyi ilaakutucafwa buyani kucita boobo?

Buloshuwa iyi ilicite shiiyo 12 shitotwiisha mibo yeenga yatucafwa kutondesha lusuno akucafwa bantu kuba bashikwiiya. Ciiyo comwi acomwi citooswa mu makani amu Baibo atokwaamba Yesu na shikushimikila wamuciindi ca batumwi mbwaakatondesha mubo uyo muncito yakushimikila. Luyaando lwa shiiyo ishi teshi kulabilila nsheenga twaamba, sombi nkutucafwa kulangoola nshila mbweenga twatondesha ayi tulisuni bantu. Nabi kwaamba ayi mibo yoonse ilayandika muncito yakushimikila, tutobandika mibo imwi iyandika, bunene bunene ndyetutotalika mibandi, kuboolelaako, na kutanjilila shiiyo sha Baibo.

Ndyemutokwiinduluka muciiyo comwi acomwi, amuyeeye cakubikila maano mbweenga mwakonkela mubo uyo ndyemutobandika abantu bakumusena nkomukala. Amweeleshe kuyumya lusuno lwanu pali Yehova abantu. Lusuno ulu lulaakumucafwa kukumanisha luyaando lwanu lwa kwiisha bantu kwaamba ayi babe bashikwiiya.

Tulalumba pacoolwe cinene cakusebensela pomwi andimwe. (Sefa. 3:9) Yehova amwaabile shoolwe ndyemutotolelela kusuna bantu akubacafwa kuba bashikwiiya!