Mbweenga Twashika Pamoyo Aabo Mbotwiisha
1. Ino kwiisha kwakwe Yesu kwakacafwa buyani abo bakalinga kumukutika?
1 Yesu Klistu wakabashika pa myoyo bantu bakalinga kumukutika. Ciindi cimwi, ndyaakalinga abashikwiiya bakwe wakabapandulwita malembo cakwaamba ayi akabashika pa myoyo. (Luka 24:32) Mukwiinga kunyumfwila Lesa kulyeelete kuswa panshi lya moyo, ino inga twayuminisha buyani abo mbotwiisha kwaamba ayi baalule buumi bwabo akutalika kukonkela shalushinisho nshebatokwiiya?—Loma. 6:17.
2. Ino nciinshi ceenga camucafwa kushika muntu pamoyo ndyemutokwiisha?
2 Amulibambile Nsheshi Mwaambe: Bantu baanji kubaambilabo ayi ici ncibiibi alimwi ici ncibotu inga tacibacaafwi kucitawo comwi. Alimwi kubabelengela malembo aanji atondesha ayi nshobashoma tashili kabotu tashicaafwiwo, sombi inga shalengeshabo ayi bakake nshemutobaiisha. Kwaamba ayi tucafwe muntu kucitawo comwi pasheesho nshatokwiiya, citaanshi tulyeelete kushiba nshashoma alimwi amulandu ngwacitila boobo. Miipusho ya maano alimwi ibambitwe kabotu inga yalengesha ayi aambe shili kumoyo wakwe. (Tus. 20:5) Lyalo ndyeenga twasala makani kuswa mu Baibo eenga amushika pamoyo. Aboobo tulyeelete kukalika moyo akumutondesha ayi tulamubikila maano. (Tus. 25:15) Ncotweelete kushiba ncakwaamba ayi bantu balatola ciindi cipusene-pusene kukula lwakumushimu. Cilatola ciindi kwaamba ayi mushimu usalashi wakwe Yehova ucafwe miyeeyo alimwi amicito ya muntu.—Maako 4:26-29.
3. Ino inga twabacafwa buyani abo mbotwiisha kuba amibo ibotu?
3 Amubacafwe Kuba Amibo Ibotu: Malembo amu Baibo atondesha bubotu alimwi alusuno lwakwe Yehova inga shacafwa baabo mbotwiisha kuba amibo ibotu. Inga twasebensesha malembo mbuli Kulumbaisha 139:1-4 na Luka 12:6, 7 kubatondesha Yehova mbwabikila maano kumuntu umwi aumwi. Na muntu waba amoyo wakulumba kwancinencine, inga camucafwa kuba alusuno alimwi akukomena lwakumushimu. (Loma 5:6-8; 1 Joni 4:19) Alimwi na bashiba kwaamba ayi micito yabo ilakuma Yehova, inga cabacafwa kucita shintu sheenga shasangalasha alimwi akulemeka Yehova.—Kulu. 78:40, 41; Tus. 23:15.
4. Ino inga twatondesha buyani ayi muntu ulyeelete kulisalalila mwiine shakucita ndyetutokwiisha?
4 Yehova takakatishiwo muntu uli woonse kukonkela milawo yakwe. Sombi ulasenga muntu umwi aumwi kwiinda mukutondesha bubotu bwakukonkela milawo yakwe. (Isa. 48:17, 18) Na katwiisha bantu munshila ibacafwa kusala nshakucita bene nkokwaamba ayi tulakonkela Yehova. Cilacafwa abuumbi na muntu waalula buumi bwakwe pamulandu wakwaamba ayi washiba mwiine ayi ici cilayandika. (Loma. 12:2) Alimwi cilacafwa kusena pafwaafwi a Yehova ‘shikweelesha moyo wa muntu’.—Tus. 17:3.