Miipusho Kuswa Kubeshikubelenga

Ino bakapokola bakalinga kusebensela pa tempele bakalinga baani? Alimwi ino nincito nshi njebakalinga kusebensa?

Bene Lefi bamwi batakalinga bapailishi bakalinga kusebensa ncito shimwi mbuli bukapokola. Bakalinga kutanjililwa a munene wabakapokola wapa tempele. Philo shikulemba makani mwine Juda wakaamba pancito bakapokola aba njebakalinga kusebensa, wakaamba ayi: “Bene Lefi bamwi bakalinga beshikulindilila pamilyaango yakwinjila mulubaansa lwa tempele. Bamwi bakalinga beshikulindilila musena usalalite kwaamba ayi kutabi muntu nabi womwi weenga wanjila kwakubula kusuminishikwa, nabi cakuteshiba. Alimwi bamwi bakalinga kusebensa malumwi bamwi mashiku kuya bushinguluka lubaansa kwaamba ayi bashitilishe tempele.”

Ba mukooti ya Sanihedilini bakalinga kusenga bakapokola aba kwaamba ayi babacafweeko kusebensa ncito shimwi. Ili ndyelyakalingabo likoto lyakasuminishikwa a mfulumeende ya Bene Loma kweenda a shilwanisho.

Shikwiiya makani amu Baibo Joachim Jeremias wakasansulula ayi bakapokola ndyebakacata Yesu, wakabeepusha ncebatakwe kumucatila ndyaakalinga kwiisha pa Tempele. (Mate. 26.55) Wakatolelela akwaamba ayi nakwiinga bakapokola balya tabakalinga ba pa Tempele, Yesu nakwiinga taakwe kwiipusha mwiipusho uyu. Shikwiiya makani amu Baibo uyu wakalinga kuyeeya ayi bakapokola balya bakalinga kusuni kucata Yesu pakutaanguna, abalo bakalinga ba tempele. (Joni 7:32, 45, 46) Ndyepakeenda ciindi kuswawaawo, ba mukooti ya Sanihedilini bakatuma munene wa bakapokola alimwi a bakapokola bamwi kwaamba ayi baye bacate batumwi. Alimwi citoboneka kwaamba ayi bakapokola bapa tempele Lesa mbobakacata Paulo akumutola pa nsengwe lya tempele.—Milimo 4:1-3; 5:17-27; 21:27-30.