Miipusho Kuswa Kubeshikubelenga

Sa “shisepo sha mushimu” nshilya sheenkabo shaambwa palilembo lya Bene Galatiya 5:22, 23?

Mavesi aya alatutondesha mibo ya Bwineklistu ili 9: “Shisepo sha mushimu usalashi ndusuno, kusangalala, luumuno, kukalika moyo, inkumbu, kubota moyo, kushomeka, kulibombya alimwi akulitibuka.” Ano teshi kwaamba ayi iyi njemibo ibotu yeenkabo njeenga mushimu wakwe Lesa watucafwa kubaayo.

Ino tulishi buyani? Tulishi mukwiinga mutumwi Paulo kaatana kulemba sha shisepo sha mushimu usalashi, wakataanguna kulemba mibo yabuntu. Wakaamba ayi: ‘Milimo ya buntu ilibwenekete patuba, njeeyi: Bufuule, kutanoosalalite, kutalitibuka, kucita shintu shitaluleme, kulambila shibumbwabumbwa, kupaila mishimu, kutanyumfwana, kupikishanya, munyono, bukali, kuliyanda, kupansaana alimwi akulipatula, lunkumbwa, bucakolwa alimwi ashimwi sha mushobo wooyu.” (Gala. 5:19-21) Mukweelaako Paulo wakaamba ayi “ashimwi sha mushobo wooyu,” nkokwaamba ayi taakwe kwaamba shintu shoonse nsheenga twasansulula ayi “milimo ya buntu,” mbuli sheesho shaambwa pa Bene Kolose 3:5. Ubu mbwaakacita andyaakalinga kwaamba pamibo ibotu ili 9, wakaamba ayi: “Taaku mulawo ukasha shintu mbuli sheeshi.” Aboobo Paulo taakwe kulemba mibo ibotu yoonse njeenga twabaayo kwiinda mukucafwikwa amushimu usalashi.

Tulanyumfwishisha kabotu makani aya, na tweelanisha shisepo sha mushimu kushisepo sha mumuni Paulo nshaakaambawo ndyaakalembela libungano lyaku Efeso ayi: “Shisepo sha mumuni njimishobo yoonse ya bubotu, bululami alimwi acancine.” (Efe. 5:8, 9) Ncakwiila, “bubotu,” bululami alimwi acancine, ndubasu lwa “shisepo sha mumuni,” alimwi alubasu lwa “shisepo sha mushimu.”

Cimwi ceenga catucafwa kunyumfwishisha kabotu makani aya, nkweelanisha shisepo sha mushimu shili 6 Paulo nshaakayuminisha Timoti. Wakaamba ayi: “Koelesha kuba abuumi bululeme, bwakulemeka Lesa, bwa lushomo, bwalusuno, bwa kutaboola pesule abwa kulibombya.” (1 Timo. 6:11) Mibo yotatwebo payeeyi (lushomo, lusuno, alimwi akulibombya) njoicanika apamulongo walubasu lwa “shisepo sha mushimu.” Nacibi boobo, Timoti wakalinga kuyandika lucafwo lwa mushimu usalashi kwaamba ayi abe amibo imwi mbuli: bululami, kusebensela Lesa cakulyaaba, alimwi akuliyumya.—Amweelanye a Bene Kolose 3:12; 2 Pita 1:5-7.

Aboobo teshi kwaamba ayi mibo njetucana pa Bene Galatiya 5:22, 23 njemibo yeenkabo Mwineklistu njaeelete kubaayo. Nabi kwaamba ayi mushimu wakwe Lesa inga watucafwa kuba a “shisepo sha mushimu” shili 9, kuli mibo imwi iinji njotweelete kubaayo kwaamba ayi tube Beneklistu bashimpite, alimwi ‘bafwete buntu bupya bwakalengwa kweelana akuyanda kwakwe Lesa, mubululami bwancinencine akushomeka.’—Efe. 4:24.