MUTWI WAKWIIYA 20

Shaamba Libuku lya Ciyubululo Pamakani Abalwani Bakwe Lesa

‘Bakababunganya pomwi kumusena wiitwa ayi Amagedoni muciEbulu.’—CIYU. 16:16.

LWIIMBO 150 Amulangoole Lesa Kwaamba ayi Mukapuluke

NSHESHI TWIIYEa

1. Ino libuku lya Ciyubululo lilaamba nshi pabantu bakwe Lesa?

LIBUKU lya Ciyubululo lilaamba ayi Bwaami bwakwe Lesa bwakatalika kulela kwiculu, alimwi Satana wakawaalwa pacishi capanshi. (Ciyu. 12:1-9) Ici cilaamba ayi kwiculu kwakakacaala luumuno, lyalo pacishi capanshi pakaba mapensho. Ino nceebonshi? Nceebo cakwaamba ayi Satana alikalalite alimwi alalwana baabo basebensela Yehova cakushomeka pacishi capanshi.—Ciyu. 12:12, 15, 17.

2. Ino nciinshi ceshi cikatucaafwe kutolelela kushomeka?

² Ino inga twacita buyani kwaamba ayi tutolelele kushomeka nabi Satana ndyaatootulwana? (Ciyu. 13:10) Cintu comwi ceenga catucafwa nkushiba sheshi shikacitike kunembo. Kucakubonenaako, mulibuku lya Ciyubululo mutumwi Joni wakaamba shoolwe nsheshi tukacane conoono. Coolwe comwi pasheesho nkunyonyoolwa kwa balwani bakwe Lesa. Amuleke twiiye libuku lya Ciyubululo mbolisansulula balwani aba alimwi asheshi shikabacitikile.

KUSANSULULA BALWANI BAKWE LESA KUSEBENSESHA “SHITONDESHO”

Caati itotondesha shinshimwe upa nkusu ku banyama baambwa mulibuku lya Danyelo alya Ciyubululo. Banyama banene bone baambwa mu Danyelo capita 7 balaswa mulweenge lwa bantu lyalo mu banyama aba mwakaswa munyama ucite mitwi ili 7, alakwe wakaswa mulweenge lwa bantu. Mutwi wa namba 7 wa munyama ucite mitwi ili 7, mwakaswa munyama ucite meeca obilo, lyalo mu munyama ucite meeca obilo mwakaswa munyama usalalabo pyu apo patantite mufuule. Shinshimwe, munyama ucite meeca obilo, alimwi amunyama usalalabo pyu boonse balaakuwaalwa mulweenge lwa mulilo. Shikope shatondeshekwa alimwi mupalagilafu 4, 6, 9, 10, a 19.

3. Ino nshitondesho nshi shaambwa mulibuku lya Ciyubululo?

³ Kutalikabo avesi yakutaanguna, libuku lya Ciyubululo lilatulwiita ayi makani ngeshi tubelenge mulibuku ili alasansululwa munshila ya “shitondesho.” (Ciyu. 1:1) Mulibuku ili muli makani aamba pashinyama sha muluundu shipusenepusene shiimikaninaako balwani bakwe Lesa. Kucakubonenaako, lilaamba pa ‘munyama utooswa mumaanshi.’ Ulicite “meeca likumi alimwi amitwi yosanwe ayobilo.” (Ciyu. 13:1) Lyalo “munyama aumwi wakaswa mucishi capanshi.” Munyama uyo wakalinga kwaamba anga ngu shinshimwe alimwi “wakalengesha ayi mulilo uswe kwiculu.” (Ciyu. 13:11-13) Lyalo kwakabonekela umwi upuseneeko, ‘munyama usalalabo pyu,’ patantite mwanakashi mufuule. Shinyama sha muluundu shotatwe ishi shileemikaninaako balwani balwana Yehova Lesa a Bwaami bwakwe kuswabo kale kale. Aboobo tulyeelete kubashiba na mbaani.—Ciyu. 17:1, 3.

Banyama banene bone baambwa mu Danyelo capita 7 balaswa mulweenge lwa bantu. Munyama wakutaanguna alaboneka anga ninkalamu alimwi alicite mapapaminwa ali anga nga mumbankwashi. Wabili alaboneka anga ngu beya alimwi alicite amapiinga kumulomo. Watatu alaboneka anga ngu shiluwe alimwi alicite mapapaminwa one amitwi yone. Wane alicite nkusu abuumbi alimwi alicite meeno aceela ameeca ali 10. — **BANYAMA BANENE BONE**

“Bakaswa mulweenge.” (Danye. 7:1-8, 15-17) Baleemikaninako mfulumeende shakeendeleshawo kale akulwana bantu bakwe Lesa kutalika muciindi cakwe Danyelo. (Amubone mapalagilafu 4 a 7)

4-5. Ino shaambwa palilembo lyakwe Danyelo 7:15-17 shilatucafwa buyani kunyumfwisha shitondesho ishi ncoshiimikaninaako?

⁴ Katutana kushiba balwani aba, tulyeelete kutaanguna kushiba shinyama sha muluundu alimwi amwanakashi mufuule ncoshiimikaninaako. Nshila ibotu yeenga yatucafwa kunyumfwishisha makani aya nkusebensesha Baibo. Shitondesho shiinji shaambwa mulibuku lya Ciyubululo shakasansululwawo kale mu mabuku amwi amu Baibo. Kucakubonenaako, mushinshimi Danyelo wakalota “banyama banene bone bapusenepusene bakaswa mulweenge.” (Danye. 7:1-3) Danyelo wakasansulula shinyama ishi ncoshiimikaninaako. Shinyama ishi shone shileemikaninako “bamaami,” na mfulumeende. (Amubelenge Danyelo 7:15-17.) Busansulushi ubu bunyumfwika kabotu bulatucafwa kunyumfwisha kwaamba ayi shinyama shaambwa mulibuku lya Ciyubululo shilyeelete ashalo shitokwiimikaninako mfulumeende.

⁵ Amuleke twiiye shitondesho shimwi shaambwa mulibuku lya Ciyubululo. Ndyetutoocita boobo tutoobona Baibo mbweenga yatucafwa kushiba shitondesho ishi ncoshiimikaninaako. Citaanshi tutotaanguna kunyumfwisha shinyama shipusenepusene ncoshiimikaninaako. Lyalo tutokwiiya asheshi shikacitike kushinyama ishi. Mukweelaako, tutokwiiya nsheenga tweeya ku shakucitika ishi.

KUYUBULULA BALWANI BAKWE LESA

Munyama ucite mitwi ili 7 waambwa mulibuku lya Ciyubululo, atooswa mulweenge lwa bantu. Alicite meeca ali 10 amishini ili 10 kumitwi alimwi alaboneka anga ngu shiluwe, shimpanta anga nsha beya, alimwi amulomo anga ngwa nkalamu. — **MUNYAMA UCITE MITWI 7**

‘Wakaswa mulweenge’ alimwi alicite mitwi 7, meeca 10, amishini ili 10. (Ciyu. 13:1-4) Aleemikaninako mfulumeende sha bantu shoonse shili pacishi capanshi kuswabo kale kale. Mitwi ili 7 ileemikaninako mfulumeende shinene shili 7 shapacishi capanshi shakalinga kulwana bantu bakwe Lesa. (Amubone mapalagilafu 6-8)

6. Ino munyama ucite mitwi 7 waambwa pa Ciyubululo 13:1-4 aleemikaninako nshi?

⁶ Ino munyama ucite mitwi ili 7 aleemikaninako nshi? (Amubelenge Ciyubululo 13:1-4.) Nabi kwaamba ayi munyama uyu alaboneka anga ngu shiluwe, alicite myeendo anga ngu beya, mulomo anga ni nkalamu, lyalo alicite ameeca 10. Banyama bali 4 baambwa mulibuku lyakwe Danyelo capita 7 abalo baliciteko mbonekelo ishi. Nacibi boobo, mulibuku lya Ciyubululo, munyama womwi ngoocite mbonekelo ya banyama bali 4 baambwa mulibuku lyakwe Danyelo. Munyama uyu teemikanini mfulumeende yomwi, na buleelo bwa pacishi coonse. Joni wakaamba ayi munyama uyo “wakapekwa ankusu shakweendelesha mikowa yoonse, mishobo yoonse, milaka yoonse alimwi abantu bacite shikanda shipusenepusene.” Munyama uyu aleemikaninako cimwi ciindite pa mfulumeende ya cishi comwibo. (Ciyu. 13:7) Aboobo alyeelete aleemikaninako mfulumeende sha bantu shoonse shili pacishi capanshi kuswabo kale kale.b—Shiku. 8:9.

7. Ino mutwi womwi awomwi pa mitwi 7 uleemikaninako nshi?

⁷ Ino mutwi womwi awomwi pa mitwi 7 uleemikaninako nshi? Makani ngotucana mu Ciyubululo capita 17 inga atucafwa kucana cikumbulo, mukwiinga ilasansulula cibumbwabumbwa ca munyama waambwa mu Ciyubululo capita 13. Ciyubululo 17:10 ilaamba ayi: “Kuli bamaami bali 7: Bali 5 bakafwa kale, womwi ngooceendelesha, ono wakweelaako taana kuboneka. Sombi na akese, ulaakweendeleshabo nshiku shiniini.” Pa mfulumeende shoonse Satana nshakasebenseshawo, shili 7 shakakoshanishikwa ku “mitwi” ceebo cakwaamba ayi shakalinga kucite nkusu abuumbi. Ishi nshemfulumeende shinene pacishi capanshi shakalinga kulwana bantu bakwe Lesa. Mutumwi Joni ndyaakalinga muumi buleelo bwa mfulumeende 5 kabuli bwakamana kale. Mfulumeende ishi shakalinga Ijipiti, Asilya, Babiloni, Medo-Pesha, alimwi a Gilisi. Loma nje mfulumeende ya namba 6 yakalinga kucite nkusu abuumbi pacishi coonse, yakalinga kweendelesha Joni ndyaakatondeshekwa shili mulibuku lya Ciyubululo. Ino ni mfulumeende ili icite nkusu pacishi coonse yakweelaako, iyo yakalinga kusa mukuba mutwi wa namba 7?

8. Ino mutwi wa namba 7 wa munyama uleemikaninako nshi?

⁸ Kweelana ambweshi tubone, bushinshimi mbotucana mulibuku lyakwe Danyelo bulatucafwa kushiba mutwi wakweelaako wa namba 7 wa munyama ncowiimikaninaako. Ino mbuleelo buli bucite nkusu abuumbi butokweendelesha munshiku shamamanino, na “bushiku bwa Mwaami”? (Ciyu. 1:10) Mbuleelo bwiitwa ayi Anglo-America na shishi shobilo shicite nkusu abuumbi shicatene pomwi, cishi ca America alimwi a Britain. Aboobo ubu mbo buleelo mbweenga twaamba ayi mbobutokwiimikaninako mutwi wa namba 7 wa munyama waambwa pa Ciyubululo 13:1-4.

Munyama ucite meeca obilo ali anga nga mbelele waambwa mulibuku lya Ciyubululo. Wakaswa kumutwi wa namba 7 wa munyama ucite mitwi ili 7 alimwi alaakuwaalwa mulweenge lwa mulilo. — **MUNYAMA UCITE MEECA OBILO ALI ANGA NGA MBELELE**

Wakaswa “mucishi capanshi” alimwi alaamba anga ngu “shinshimwe.” Alalengesha ayi “mulilo uswe kwiculu” alimwi alacita shitondesho anga ngu “mulaluki mubeshi.” (Ciyu. 13:11-15; 16:13; 19:20) Buleelo bwa *Anglo-America* buleemikaninwaako amunyama ucite meeca obilo uyo wiitwa ayi mulaluki mubeshi ceebo cakwaamba ayi bulacenjeeka bantu akubalwiita ayi bapange “cibumbwabumbwa” ca “munyama” ucite mitwi ili 7 ameeca ali 10. (Amubone palagilafu 9)

9. Ino munyama “ucite meeca obilo ali anga nga mbelele” aleemikaninako nshi?

⁹ Ciyubululo capita 13 ilatulwiita ayi mutwi wa namba 7 uyu na buleelo bucite nkusu abuumbi nsengwe yoonse bwa Anglo-America, abwalo bulacita bweenka mbuli munyama ‘ucite meeca obilo ali anga nga mbelele alimwi wakalinga kwaamba anga ngu shinshimwe.’ Munyama uyu “wakacita shaankamiko shinene abuumbi, wakalengesha ayi mulilo uswe kwiculu akulokela pacishi capanshi bantu boonse kabeebela.” (Ciyu. 13:11-15) Ciyubululo capita 16 a 19 ilaamba ayi munyama uyu ngu “mulaluki mubeshi.” (Ciyu. 16:13; 19:20) Alakwe Danyelo wakaamba ayi buleelo bucite nkusu abuumbi nsengwe yoonse bwa Anglo-America ‘bulaakulengesha kunyonyooka kuyoosha.’ (Danye. 8:19, 23, 24) Ishi nsheshakacitika paciindi ca Nkondo Yapacishi Coonse Yabili. Mabomu obilo anyonyoola abuumbi ayo akapa kwaamba ayi inkondo iyi imane akapangwa abeshisayansi baku Britain aku America. Munshila imwi inga twaamba ayi buleelo bucite nkusu abuumbi nsengwe yoonse bwa Anglo-America ‘bwakalengesha ayi mulilo uswe kwiculu akulokela pacishi capanshi.’

Mufuule alitantite pa munyama usalalabo pyu uyo ucite mitwi ili 7 ameeca ali 10. Munyama alaakuwaalwa mulweenge lwa mulilo. — **MUNYAMA USALALABO PYU**

Pa munyama uyu palitantite mufuule wiitwa ayi Babiloni Munene. Munyama uyu alasansululwa ayi ngu mwaami wa namba 8. (Ciyu. 17:3-6, 8, 11) Pakutaanguna, mufuule ngotokweendelesha munyama, sombi mukuya kwaciindi balaakumunyonyoola ku munyama. Mufuule aleemikaninako bupailishi boonse bwakubeca. Pacecino ciindi, munyama uyu aleemikaninako libunga lya *United Nations*, lyeendeleshekwa aluyaando lwa mfulumeende sha pacishi coonse. (Amubone mapalagilafu 10, 14-17)

10. Ino “cibumbwabumbwa ca munyama” cileemikaninako nshi? (Ciyubululo 13:14, 15; 17:3, 8, 11)

¹⁰ Amuleke tubandike pa munyama aumwi. Alakwe aliciteko mbonekelo ikoshenyeeko a munyama wa mitwi 7, sombi lakwe ngumusalala. Aleetwa ayi “cibumbwabumbwa ca munyama” alimwi alasansululwa ayi ‘mwaami wa namba 8.’c (Amubelenge Ciyubululo 13:14, 15; 17:3, 8, 11.) Joni wakesa mukwiiya ayi “mwaami” uyu wakabonekela, akushimingana, lyalo akusa mukubonekela alimwi. Ishi nsheshakacitika kulibunga lya United Nations, ilyo lyeendeleshekwa aluyaando lwa mfulumeende sha pacishi coonse! Pakutaanguna, libunga ili lyakalinga kwiitwa ayi League of Nations. Lyalo paciindi ca Nkondo Yapacishi Coonse Yabili lyakashimingana. Mukuya kwaciindi lyakabonekela alimwi muliina lya United Nations.

11. Ino mfulumeende shilayuminisha nshi, alimwi ino nceebonshi tatweelete kuloonda?

¹¹ Mfulumeende shilayuminisha bantu kupikisha Yehova abantu bakwe. Joni wakaamba ayi cilibo anga mfulumeende ishi shitoobunganya “bamaami boonse ba mucishi capanshi” ku nkondo ya Amagedoni, iyo iitwa ayi ‘bushiku bunene bwakwe Lesa Shinkusu shoonse.’ (Ciyu. 16:13, 14, 16) Nacibi boobo, teshi tukaloondewo. Mukwiinga Lesa wesu wiinditewo Yehova, alaakucitawo comwi cakufwambaana, akupulusha baabo boonse bali kulubasu lwa buleelo bwakwe.—Esek. 38:21-23.

12. Ino nciinshi ceshi cikacitike ku shinyama shoonse?

¹² Ino nciinshi ceshi cikacitike ku shinyama shoonse? Ciyubululo 19:20 ilaamba ayi: “Munyama uyo wakacatwa pantu pomwi amulaluki mubeshi uyo wakalinga kucita shaankamiko ceebo ca nguwe. Kwiinda mushaankamiko nshemunya ishi, wakacenjeeka bantu abo bakalinga kucite keshibilo ka munyama alimwi abaabo balambila cibumbwabumbwa cakwe. Mpeeke munyama uyo alimwi amulaluki mubeshi, bakawaalwa mulweenge lwa mulilo uyo unyaka asalufa, kabalasha.” Aboobo mfulumeende ishi shibete lubasu lwa balwani bakwe Lesa, shilaakunyonyoolwa kwamuyayaya kashiceendelesha.

13. Ino mfulumeende shimwi shilakakatisha Beneklistu boonse kucita nshi?

¹³ Ino makani aya alatukuma buyani? Mukwiinga tuli Beneklistu, tulyeelete kushomeka kuli Lesa aku Bwaami bwakwe. (Joni 18:36) Kwaamba ayi tucite boobo, tatweelete kwaabanamo lubasu mushamapolitiki. Ici inga caba ciyumu abuumbi mukwiinga mfulumeende shilisuni ayi tube kulubasu lwa nshisho kwiinda mushintu nshetwaamba akucita. Abo baabanamo lubasu mushacishi balatambula keshibilo ka munyama. (Ciyu. 13:16, 17) Muntu uli woonse utambula keshibilo ako, alakalasha Yehova alimwi teshi akatambulewo buumi butamaani. (Ciyu. 14:9, 10; 20:4) Aboobo soonse tulyeelete kutolelela kutaabanamo lubasu mushacishi, nabi mfulumeende shitukakatishe buyani!

KUNYONYOOLWA KULENSHA NSONI KWA MUFUULE MUNENE

14. Kweelana a Ciyubululo 17:3-5, ino nciinshi cikankamika Joni ncaakabona?

¹⁴ Mutumwi Joni wakaamba ayi ‘wakakankamana abuumbi’ ndyaakabona cintu cimwi. Ino nciinshi ncaakabona? Wakabona mwanakashi wakalinga kutantite pamunyama womwi pabanyama aba baloondesha. (Ciyu. 17:1, 2, 6) Ngu “mufuule munene” alimwi aleetwa ayi “Babiloni Munene.” Alacita “bufuule” a “bamaami bamucishi capanshi.”—Amubelenge Ciyubululo 17:3-5.

15-16. Ino “Babiloni Munene” ngani, alimwi ino tulishi buyani?

¹⁵ Ino “Babiloni Munene” ngani? Mwanakashi uyu inga taiimikaniniko beshimapolitiki mukwiinga libuku lya Ciyubululo lilaamba ayi wakacita bufuule abamaami bamucishi. (Ciyu. 18:9) Alimwi mukwiinga alitantite pa munyama uyu, nkokwaamba ayi aleelesha kweendelesha beendeleshi aba. Kwiilikaawo, inga taiimikaniniko beshimakwebo balyabi bamucishi cakwe Satana. Mukwiinga balo mulibuku lya Ciyubululo balaambwa ayi “beshimakwebo boonse ba mucishi capanshi.”—Ciyu. 18:11, 15, 16.

¹⁶ Kweelana a Malembo, liswi lyakwaamba ayi “mufuule” inga lyasansulula baabo baamba ayi balapaila Lesa sombi kabapaila ashibumbwabumbwa na kwaabanamo lubasu mushintu shakucishi. (1 Maka. 5:25; Jemu. 4:4) Ano mubupusano, abo balambila Lesa cakushomeka ‘balisalalite’ alimwi Baibo ilaamba ayi bali “anga ngumooye utana kukumanawo kale amusankwa.” (2 Koli. 11:2; Ciyu. 14:4) Ndabala ya Babiloni yakale kale yakalinga kuswite abupailishi bwakubeca. Aboobo, Babiloni Munene alyeelete kwiimikaninako bupailishi boonse bwakubeca. Ncakwiila mbupailishi bwakubeca mbotucana nsengwe yoonse.—Ciyu. 17:5, 18; amubone makani acanika pa jw.org pamutwi utokwaamba ayi “Ino Babiloni Munene Ngani?”

17. Ino nciinshi ceshi cikacitikile Babiloni Munene?

¹⁷ Ino nciinshi ceshi cikacitikile Babiloni Munene? Ciyubululo 17:16, 17 ilaamba ayi: ‘Meeca ali likumi ngowalinga wabona alimwi amunyama uyo balaakupata mwanakashi mufuule uyo. Balaakubwesa shoonse nshaacite akumufuula akacaalebo matakosha alimwi balaakulyako mubili wakwe akumutenta mumulilo. Mukwiinga Lesa ulaakucibika mumyoyo yabo kwaamba ayi bakumanishe muyeeyo wakwe.’ Ncakwiila, Yehova alaakupa kwaamba ayi mfulumeende shisebenseshe munyama musalala, na United Nations, kulwana bupailishi bwakubeca nsengwe yoonse akubunyonyoola cakumaninina.—Ciyu. 18:21-24.

18. Ino nshiinshi nshotweelete kucita kwaamba ayi tuleye kuba kulubasu lwa Babiloni Munene munshila ili yoonse?

¹⁸ Ino makani aya alatukuma buyani? Tulyeelete kutolelela kuyuminisha ‘kulambila kusalalite kutacite kampenda pameenso akwe Lesa Ishiwesu.’ (Jemu. 1:27) Tatweelete kuyungwa anjiisho shakubeca, shakusekelela sha bantu batapaili, mibo itabete kabotu, alimwi asha mishimu Babiloni Munene nshayuminisha! Alimwi tulatolelela kucenjesha bamwi kwaamba ayi ‘basweemo muli nguwe,’ kwaamba ayi Lesa atakabapi mulandu pomwi anguwe ceebo ca shibiibi shakwe.—Ciyu. 18:4.

MULWANI MUNENE WAKWE LESA MBWESHI AKOOMBOLOSHEKWE

Shinshimwe musalala pyu ucite mitwi ili 7, meeca ali 10, alimwi amishini ili 7 utoopa nkusu ku banyama baambwa mulibuku lya Danyelo alya Ciyubululo. Shinshimwe alaakuwaalwa mulweenge lwa mulilo. — **SHINSHIMWE MUSALALA PYU**

Satana ngoopa nkusu ku munyama. (Ciyu. 12:3, 9, 13; 13:4; 20:2, 10) Satana ngo mulwani munene wakwe Yehova alimwi alaakuwaalwa mucilindi citeeli kwamyaaka 1,000. Kuswawaawo, Satana alaakuwaalwa “mulweenge lwa mulilo alimwi asalufa.” (Amubone mapalagilafu 19-20)

19. Ino “shinshimwe musalala pyu” ngani?

¹⁹ Libuku lya Ciyubululo lilaamba asha “shinshimwe musalala pyu.” (Ciyu. 12:3) Shinshimwe uyu alalwana Yesu alimwi abaanjelo bakwe. (Ciyu. 12:7-9) Alalwana bantu bakwe Lesa alimwi akupa nkusu mfulumeende sha bantu. (Ciyu. 12:17; 13:4) Ino shinshimwe uyu ngani? Ni ‘nsoka ikulukulu ilya, iitwa ayi Mubiibi nabi Satana.’ (Ciyu. 12:9; 20:2) Ngotokweendelesha balwani bakwe Yehova bamwi boonse.

20. Ino nciinshi ceshi cikacitikile shinshimwe?

²⁰ Ino nciinshi ceshi cikacitikile shinshimwe? Ciyubululo 20:1-3 ilaamba ayi munjelo alaakuwaala Satana mucilindi citeeli, ico ciimikaninako bukaalo bwakuba anga ali mujeele. Paciindi ici Satana teshi ‘akacenjeekewo lyobilo mishobo ya bantu kushikila myaaka iyo ili 1,000 ikamaane.’ Mukweelaako, Satana ashibanda shakwe balaakuwaalwa “mulweenge lwa mulilo alimwi asalufa.” Nkokwaamba ayi balaakunyonyoolwa cakumaninina alimwi kwamuyayaya. (Ciyu. 20:10) Ano amuyeeyebo buumi mbweshi bukabe kwakubula Satana ashibanda shakwe. Cilaakuba ciindi cisangalasha abuumbi!

21. Ino nceebonshi nshotweeya mulibuku lya Ciyubululo inga shatupa kusangalala?

²¹ Cilayuminisha abuumbi kunyumfwishisha shitondesho shaambwa mulibuku lya Ciyubululo ncoshiimikaninaako! Mutwi uyu watucafwa kushiba balwani bakwe Yehova alimwi asheshi shikabacitikile. Ncakwiila, ‘ulicite coolwe uyo ubelenga libuku ili alimwi abaabo banyumfwa makani aya a bulaluki ubu’! (Ciyu. 1:3) Ano ino bantu bashomeka balaakucana shoolwe nshi, balwani bakwe Lesa baakunyonyoolwa? Tulaakwiiya cikumbulo mumutwi wakweelaako pamakani aya.

LWIIMBO 23 Yehova Watalika Kulela

a Libuku lya Ciyubululo lilasansulula balwani bakwe Lesa kwiinda mukusebensesha maswi acitondesho. Libuku lyakwe Danyelo lilatucafwa kushiba shitondesho ishi ncoshiimikaninaako. Mumutwi uyu tutoobona bushinshimi bwa mulibuku lyakwe Danyelo mbobukoshenye abushinshimi bwa mulibuku lya Ciyubululo. Kucita boobo kutootucafwa kushiba balwani bakwe Lesa. Lyalo tutokwiiya sheshi shikabacitikile.

b Cimwi citondesha kwaamba ayi munyama ucite mitwi 7 aleemikaninako mfulumeende sha bantu shoonse, nceebo cakwaamba ayi alicite “meeca ali 10.” Namba 10 mu Baibo ileemikaninako cintu cikwene.

c Kupusanaako amunyama wakutaanguna, cibumbwabumbwa ici tacicite mishini ya bwaami ku meeca. (Ciyu. 13:1) Cili boobo mukwiinga munyama uyo “wakaswa” ku bamaami bamwi bali 7 alimwi mbobakamupa nkusu.—Amubone makani acanika pa jw.org pamutwi utokwaamba ayi “Ino Munyama Usalala Waambwa mu Ciyubululo Capita 17 Aleemikaninako Nshi?”