Bantu Balaakukala Mu Luumuno Mu Cishi Cipya

Ndi mwalangilisha bukaalo mbobubete pa kapepala aka, mwalinyumfwa buyani? Inga tamuyandishi kukala mu luumuno, kusangalala, a kukala kabotu kweelana ansho mwabona? Ncakwiila mulisuni. Ino inga caba ngu muloto kushoma ayi bukaalo bwa mushobo uyu bulaakubaawo pa cishi kunembo?

Bantu baanji anga mbobayeeya. Shino nshiku tulabona nkondo, kutanyumfwa, nsala, malwashi, a kucembela—kwaamboobo shiniini. Nacibi boobo kuli mulandu wa kushomena. Na twayeeya sha kunembo, Baibolo ilaamba ayi “swebo tutoolindila liculu lipya alimwi acishi ca panshi cipya, kweelana aLesa mbwaakashomesha, umo mweshi mukanoolibo bululami.”—2 Pita 3:13; Isaya 65:17.

Ili “liculu lipya acishi cipya,” kweelana a Baibolo, teshi cishi a liculu shenka ishi nshotubona. Cishi a liculu shakaleengwa shimaninite, alimwi Baibolo ilaamba ayi shilakunooliikobo muyayaya. (Kulumbaisha 89:36, 37; 104:5) “Cishi cipya” cilaakuba mbantu baluleme beshi bakekale pa cishi, “liculu lipya” lyalo lilaakuba mbwaami bumaninite bwa kwiculu, nabi bweendeleshi bwa bantu beshi bakekale pa cishi. Ino inga kwaba nkuyeeya kabotu kushoma ayi “cishi cipya,” nabi cishi cibotu abuumbi cilakubaako?

Ono amwanuke ceebo cakwaamba ayi Lesa pakutanguna wakalinga kuyanda ayi bukaalo pa cishi bukabe kabotu. Lesa wakabika musankwa wakutanguna a mwanakashi mu Paladaiso pa cishi mu Edeni akubapa ncito shiinji shibotu, akubaambila ayi: “Amushalane mufule, akususha cishi ca panshi.” (Matalikilo 1:28) Ncakwiila, Lesa wakalinga kuyanda ayi bashale baana alimwi mukwiinda kwa ciindi, cishi coonse niinga caba Paladaiso. Nacibi ayi ndipakeenda ciindi tabakwe kukala muyayaya mukwinga tabakwe kunyumfwila Lesa, kuyanda kwakwe Lesa kwa kutanguna kwalo takuna kusanduka. Aboobo kulyeelete kukacitike mu cishi cipya!—Isaya 55:11.

Aboobo, na mutopaila mupailo wa Beeshiwesu, kusenga ayi Bweene bwakwe Lesa buse, ninshi mutosenga ayi bweene bwakwe Lesa bwa kwiculu bukushewo bubiibi boonse pa cishi alimwi ayi bweendeleshe cishi cipya. (Mateyo 6:9, 10) Tulicite lushomo lwa kwaamba ayi Lesa ulakukumbula mupailo uyo, nkaambo Maswi akwe alashomesha ayi: “Baluleme balaakubwesa cishi ayi ncabo. Balaakunookalaamo kwamuyayaya.”—Kulumbaisha 37:29.

Bantu Mbweshi Bakakaale mu Cishi Cipya Cakwe Lesa

Bweene bwakwe Lesa bulaakuleta shoolwe shiindawo kubota. Bulaakucita shoonse shibotu Lesa nshaakalinga kuyanda pakutanguna ayi shikanoosangalasha bantu pa cishi. Kupatana akusalulula shilakumana, alimwi mukwiinda kwa ciindi boonse beshi bakanookala pa cishi balaakuba bashicibusa. Mu Baibolo Lesa ulashomesha ayi, ‘ulakumana nkondo mu cishi ca panshi coonse.’ “Taaku mushobo weshi ukapililike mipeeni kuya mukulwana umwi, nabi weshi ukanooya mukwiiya shankondo.”—Kulumbaisha 46:9; Isaya 2:4.

Cishi coonse mukwiinda kwa ciindi cilaakuba paladaiso, musena ubootu abuumbi. Baibolo ilaamba ayi: ‘Luyanga lulaakusangalala alyalo liwesa lilaakusangalala akusapula maluba. Maanshi alaakukunka muliwesa. Ee, tulonga tulaakukunka muluyanga. Museese ulungula ulaakwaluka mashiba amaanshi. Cishi cifwite nyotwa ya maanshi cilaakuba tuntupu tubila maanshi.’—Isaya 35:1, 6, 7.

Kulaakuba sheshi shikaleengeshe kusangalala pa cishi mu Paladaiso. Bantu teshi bakabe tubili a nsala. Baibolo ilaamba ayi ‘Cishi cilaakupa butebushi bubotu.’ (Kulumbaisha 67:6; 72:16) Boonsebo balaakusangalala nkaambo balaakulya nsheshi bakaliime. Muleengi wesu ulashomesha ayi: ‘Balaakushanga shisamu sha minyansa akulyaako minyansa beene. Cilaakumana cakwaamba ayi balo bashanga, sombi besa mukulya mbambi.’—Isaya 65:21, 22.

Mu cishi cipya cakwe Lesa bantu baanji teshi bakanookala pantu pomwi mu caanda comwi nabi mu maanda anyoonyokete, nkaambo Lesa ulaamba ayi: ‘Bantu bangu balaakuyaka maanda akwikalaamo beene. Cilaakumana cakwaamba ayi bayaka ŋanda, sombi besa mukukalamo mbambi.’ Baibolo alimwi ilashomesha ayi: “Teshi bakanoosebenselawo citacite mpindu.” (Isaya 65:21-23) Aboobo bantu balakunosangalala na baseebensa mukwiinga incito shilakunooli ampindu. Bukaalo teshi bukabe bwa butolo.

Mukwiinda kwa ciindi, Bweene bwakwe Lesa bulakuboosha kunyumfwana a luumuno lwakalinga mu muunda wa Edeni pa shinyama shiine shenka abantu ashinyama. Baibolo ilaamba ayi: “Baumpe balaakwikala pantu pomwi abana ba mbelele, abalo bashiluwe balaakunoosekana ampongo. Boombe balaakunoolita pantu pomwi abana ba nkalamu. Shoonse ishi shilaakunookweembelwabo kukanike.”—Isaya 11:6-9; Osiya 2:18.

Amuciyeeye, mu cishi ca Paladaiso malwashi a mapenshi onse alaakuma! Maswi akwe Lesa alashinisha ayi: “Teshi mukanyumfwikewo mulwashi.” (Isaya 33:24) “[Lesa] ulaakubakunkumuna minsonshi yoonse. Lufu teshi lukabeeko alimwi. Teshi kukabe buumba, kulila nabi kunyumfwa kucisa, mukwiinga shintu shikulukulu shoonse shashimingana.”—Ciyubulululo 21:4.

Mulyeete Kucita Nshi Kwaamba ayi Mukakalemo?

Ncakwiila mulyeelete mwakunyumfwa kabotu kushomesha kwakwe Lesa pa bukaalo bweshi bukabe mu cishi cipya ciluleme. Ono bamwi inga babona anga uku kushomesha kwabotesha aboobo teshi kukabeeko, ono kulaakubako ceebo kulaakuswa ku lyansa lya Mulengi wesu walusuno.—Kulumbaisha 145:16; Mika 4:4.

Ono, kuli nsho tweelete kucita kwaamba ayi tukekaale buumi butamaani mu cishi ca Paladaiso citoosa. Yesu wakatulwiita cakutanguninawo, ndyakapaila kuli Lesa ayi: ‘Buumi butamaani ubu nkwishiba ndimwe nobaLesa bancinencine nweenkabo akwishiba Yesu Klistu uyo ngomwakatuma.’—Joni 17:3.

Paceebo ceeco, na tulisuni kukala mu cishi cipya cakwe Lesa, cakutanguna nco tweelete kucita nkwiiya kuyanda kwakwe Lesa akucita nshotwiiya. Nkaambo ncalushinisho ayi: Ici “cishi alimwi ashintu shoonse shiliimo isho bantu nshebakumbwa shitooya bumana, sombi uyo ucita kuyanda kwakwe Lesa, ulaba abuumi butamaani,” akuba ashoolwe nsheshi shikaswe ku Mulengi wesu walusuno kwa muyayaya.—1 Joni 2:17.