Ino Ngani Cancinencine Weendelesha Cishi?
Bantu baanji inga bakumbula mwiipusho uli peculu muliswi lyomwibo ayi ngu Lesa. Ono tulyeelete kushiba ayi, Baibolo tayaambiwo ayi Yesu Klistu nabi Baishi mbobeendelesha cishi. Ono Yesu wakaamba ayi: ‘Sataana mweendeleshi wa panshi pano ulaakukomwa.’ Alimwi wakaamba ayi: “Mwaami wa mucishi ca panshi utoosa. Taacite nkusu pali ndime.”—Joni 12:31; 14:30; 16:11.
Aboobo mweendeleshi wa cishi cino ulapikisha Yesu. Ino ngani uyo?
Mibo ya Cishi Ilatondesha Weendelesha
Nacibi ayi bantu bamwi balasebensa maningi kwaamba ayi shintu shibe kabotu, kuswa kalekale akushika cecino ciindi mu cishi muli mapeenshi. Mapeenshi alalengesha bantu kunoyeeya bwakayeeya mulembeshi wa lyashi lya kalekale David Lawrence wakaamba ayi: ‘Bantu banji pa cishi balisuni luumuno. Bantu banji balayanda kucita shibotu ku bantu bamwi. Ono ninshi ilengesha kunokwalilwa?’ Ino bantu balatalikila nshi nkondo nacibi ayi balisuni luumuno?
Cilaboneka ayi shicitika ashiyanda bantu shilipusene, teshi mbweeke? Bantu balisuni ayi banokala mu lumuuno kweelana ambobakaleengwa, ono balaba amyoyo ibiibi—balapatana alimwi balacayana. Amuyeeye pa shintu shibiibi shitondesha kubica kwa myoyo. Bantu balasebensesha muuwo ubiibi, misena yakupenseshamo bantu, mfuti sha mulilo, mabomu, ashimwi nshobasebensesha pa kupensha akucaya bantu bamwi kwakubula nkumbu.
Sa inga caba cancine ayi bantu basuni maningi lumuuno akusangalala, paciindi comwi inga kabacita shibiibi ku bantu bamwi? Ino nciinshi cilengesha ayi bantu banoocita shintu shibiibi? Sa mwakayeeyawo ayi mpashi kuli mushimu ubiibi utaboneki ulengesha bantu kunoocita shibiibi?
Kushiba Beendelesha Cishi
Takuuwo acakutonsha pa mulandu uyu, mukwiinga Baibolo ilaamba pasalalite ayi muntu ucenjeete utaboneki ngo weendelesha bantu a mishibo yonse. Ilaamba ayi: ‘Bantu boonse batokweendeleshekwa a Mubiibi.’ Alimwi Baibolo ilamuyubulula ndi yaamba ayi: ‘Uleetwa ayi Mubiibi nabi Sataana, ucenjeeka bantu boonse mu cishi ca panshi.’—1 Joni 5:19; Ciyubululo 12:9.
Pa ciindi Yesu ndi ‘akasunkwa ku Mubiibi’ Yesu taakwe kupikisha ayi Mubiibi ulicite nkusu sha kweendelesha cishi. Baibolo ilatulwiita shakacitika ayi: “Mubiibi uyo wakatola Yesu kukalundu kalaamfu abuumbi, wakamubonesha malelo oonse a mucishi ca panshi abubotu bwa ngawo, akumwaambila ayi, ‘Inga ndakupa malelo oonse aya na wafukama akunambila.’ Lyalo Yesu wakamwaambila ayi, ‘Swaawo apa Sataana!’”—Mateyo 4:1, 8-10.
Amuciyeeye ici. Mubiibi wakasunka Yesu ndyakamupa “malelo oonse a mucishi ca panshi.” Ono kusunka kwa Mubiibi kwa kupa Yesu malelo oonse niinga kwaba kwa ncinencine na teshi ngo weendelesha cishi? Taawu, niinga takubiiwo. Alimwi amwibaluke ayi, Yesu taakwe kukaka ayi malelo oonse a mucishi ngakwe Sataana, niinga wakakaka na Sataana takalyucitewo nkusu pali ngawo. Anu, Sataana Mubiibi ncakwiila ngo mweendeleshi wa cishi utaboneki! Baibolo, ilamwiita ayi “ngulesa pacishi ca panshi.” (2 Bene Kolinto 4:4) Ono, uyu muntu mubiibi wakaba buyani a nkusu sha kuno kweendelesha cishi?
Uyu wakaba Sataana wakalinga mungelo wakaleengwa a Lesa, ono wakatalika kukumbwa musena wakwe Lesa. Wakatonsha nkusu shakwe Lesa sha kweendelesha. Lyalo, wakasebensesha nsoka kucenjeeka mwanakashi wakutanguna Efa, aboobo, mwanakashi a Adamu, ibaye, bakamunyumfwila tabakwe kunyumfwila Lesa. (Matalikilo 3:1-6; 2 Bene Kolinto 11:3) Alimwi wakalinga kubona ayi ulakusandula bantu boonse beshi bakashalwe kuli Adamu a Efa mukutanyumfwila Lesa. Aboobo Lesa wakapa Sataana ciindi kwaamba ayi ashinishe kuyeeya kwakwe kwakwamba ayi inga weendelesha, ono Sataana wakaalilwa.—Jobo 1:6-12; 2:1-10.
Kweelana a shintu mboshibete, Sataana taendeleshi cishi enka. Wakakoonsha kucenjeeka baangelo bamwi kuba kulubasu lwakwe mukutanyumfwila Lesa. Aba baangelo bakaba mishimu ibiibi, bakumucafwako. Baibolo ilaamba pa mishimu ibiibi ndiituyuminisha ayi: ‘Mukacikoonshe kulwana maano abucenjeshi bwakwe Sataana. Mukwiinga tatutoolwana abantu, sombi mishimu iyo yeendelesha bantu munshiku shino shili anga ngumunshishe.”—Bene Efeso 6:11, 12.
Amukake Mishimu Ibiibi
Iyi mishimu ibiibi itaboneki ilayanda kucenjeeka bantu boonse, kubasandula akubakusha mu kupaila Lesa. Mishimu ibiibi ilasebensesha nshila ya kutola pa nembo kuyeeya ayi muntu na wafwa kuli cimwi cipuluka, nacibi ayi Maswi akwe Lesa alatoondesha pasalala ayi bafwite taaku ncobeshi. (Matalikilo 2:17; 3:19; Esekelo 18:4; Kulumbaisha 146:3, 4; Shikushimikila 9:5, 10) Aboobo, mushimu ubiibi, ulaamba abamakwabo nabi babye ba mufu kwiinda mu “liswi” linyumfwika anga ndyamufu ono lilya liswi lilaswa ku mushimu utaboneki. Ilyo “liswi” lilanyumfwika anga ngweenka ulya wakafwa, anu ngu mushimu!
Paceebo ceco, na mwanyumfwa “liswi” litonyumfwika anga ngu mufu, mutabecekwi. Amukake shoonse nshengalyaamba, alimwi munokwaamba maswi akaamba Yesu ayi: “Swaawo apa Sataana!” (Mateyo 4:10; Jemusi 4:7) Mutakeleshi kuyanda maningi kushiba sha bukaalo bwa mishimu kwaamba ayi kukamushishe mukunyumfwana a mishimu. Kunyumfwana uko kuleetwaa ayi buloshi, alimwi Lesa ulacenjeesha bapaila nguwe ayi tabeleete kucita shoonse sha buloshi. Baibolo ilakasha ‘muntu uba muŋanga, shikusonda, muloshi, nabi uyo waamba a mishimu munshila ili yoonse.’—Dutolonomi 18:10-12; Galatiya 5:19-21; Ciyubululo 21:8.
Munokaka shoonse shicitwa a mishimu ibiibi nabi na shitoboneka sha kusangalasha, mukwiinga na mutonyumfwana a mishimu ibiibi inga yamucenjeeka akunomutangilila. Inga mwanyumfwana a mishimu na mutosonda, mutosamba shibanda, mutoshilikila maanda a myuunda, a kusalaasha bafwitwa. Mishimu ibiibi ilapaanga coongo akucita shakubonabona mu misena moicanika.
Alimwi, mishimu ibiibi ilasebensesha mibo ya bantu ya kubisha kwiinda mu mabuku, mafilimu, ashimwi shiboneka pa TV shibonesha bufuule bwa mishobo yoonse. Mishimu ibiibi ilishi ayi na twaba akuyeeya kubiibi inga twatalika kunocita shibiibi shenka shilya shicita mishimu ibiibi.—Matalikilo 6:1, 2; 1 Bene Tesalonika 4:3-8; Judi 6.
Ncakwiila, bantu banji inga batonsha ayi cishi cino cilendeleshekwa a mishimu ibiibi. Ono tatukwe tukankamanewo na batonsha, mukwiinga Baibolo ilaamba ayi: ‘Sataana ulalisandula kuboneka anga ngu mungelo wa mumuni.’ (2 Bene Kolinto 11:14) Sataana ulacenjeeka cankusu bantu ndyababeca ayi lakwe a mishimu ibiibi ncalushinisho tabako. Ono mutabecekwi! Mubiibi nkwaali a mishimu yakwe, alimwi mulyeelete kutolelela kunobakaka.—1 Pita 5:8, 9.
Cakusangalasha ncakwaamba ayi, ciindi cili pafwaafwi ceshi Sataana a mishimu yakwe teshi bakanoliiko! “Cishi [kubikaako a mishimu yeendelesha] shitooya bumana,” Baibolo ilatuyuminisha ayi, “sombi uyo ucita kuyanda kwakwe Lesa, ulaba abuumi butamaani. (1 Joni 2:17) Maama mbweshi kukabe kusangalala na bakamukushewo ulengesha bubiibi! Pacebo ceeco, atube pantu pomwi abaabo bacita kuyanda kwakwe Lesa kwaamba ayi tukakale buumi butamaani mu cishi cipya, ciluleme cakwe Lesa.—Kulumbaisha 37:9-11, 29; 2 Pita 3:13; Ciyubululo 21:3, 4.
[Picture on page 4]
Ino Sataana niinga wapa Yesu malelo oonse amucishi na teyakalinga ngaakwe.