Ino Mulaakucana Nshi Kumabungano Esu?

Bantu baanji bakacileka kuya mukupaila mukwiinga taaku lucafwo lwakumushimu ndobacana. Ono ino ngumulandunshi ngomweelete kucanika kumabungano aBwineklistu a Bakamboni Bakwe Yehova? Ino Mulaakucana nshi?

Lusangalalo lwakuba abantu bacite lusuno alimwi babikila maano bamwi. Beneklistu bakutaanguna bakalinga kubungana pantu pomwi kulambila Yehova, kwiiya Malembo alimwi akuyuminishanya. (Bene Ebulu 10:24, 25) Bakalinga kubona Beneklistunyinaabo kuba babyaabo bancinencine, alimwi bakalinga kuboneka ayi balisunene. (2 Bene Tesalonika 1:3; 3 Joni 14) Aswebo tulacita bweenka ubo munshiku shino.

Mulakushiba mbweenga mwakonkela njiisho shamu Baibo. Bweenka mbuli muciindi camu Baibo, basankwa, banakashi, alimwi abaana boonse bakalinga kubungana pantu pomwi. Bamanene bashikiteewo balasebensesha Baibo kutwiisha kushiba mbweenga twasebensesha njiisho shamu Baibo mubuumi bwesu. (Dutolonomi 31:12; Neyemiya 8:8) Boonse inga babanaamo mulubasu lwa kubandikishanya alikoto alimwi akwiimba, ici cilatupa coolwe cakutondesha bulindilishi bwesu bwa Bwineklistu.—Bene Ebulu 10:23.

Coolwe cakuyumya lushomo lwanu muli Lesa. Mutumwi Paulo wakalwiita bamulibungano limwi ayi: “Ndisunishi ayi tukabonane, . . . kwaamba ayi tukayuminishanye kwiinda mulushomo lwangu anebo kwiinda mulushomo lwanu.” (Bene Loma 1:11, 12) Kuba pomwi abamakwesu alimwi abenankashi lyoonse, kulayumya lushomo lwesu akutucafwa kwiindilisha kukonkela nshetwiiya muBaibo.

Inga cabota abuumbi na mwesa kukubungana kutoosa akubona nobeene mbociba. Mulaakutambulwa camaansa obilo. Taakuwo kulipila—nabi kwiinshamo mbale yakusenga maali.

• Ino mabungano esu alacitwa buyani?

• Ino kucanika kumabungano inga kwatucafwa buyani?