Ino Nceebonshi Tulafwala Kabotu Ndyetutooya Kumabungano Esu?

Sa mwababona mushikope shili mubuloshuwa iyi Bakamboni Bakwe Yehova mbobafwete kabotu ndyebatooya kumabungano? Ino ngumulandunshi tulabikila maano nshetufwala alimwi ambotuboneka?

Tulatondesha bulemu kuli Lesa. Ncakwiila kwaamba ayi Lesa tabikilibo maano mbotuboneka pansengwe. (1 Samwelo 16:7) Nacibi boobo, ciindi ndyetubungana kumulambila, tulisuni kutondesha bulemu kuli Lesa alimwi abaabo mbotubungana abo. Na twapekwa coolwe cakwiimikana kunembo lya shikoombolosha munkuta, tulyeelete kufwala kabotu kwaamba ayi tutondeshe bulemu. Bweenka ubo mbocibete ambotuboneka ndyetutooya kumabungano, kufwala kabotu kulatondesha bulemu mbotucite “kuMoomboloshi wa cishi coonse,” Yehova Lesa, alimwi amusena nkotupailila.—Matalikilo 18:25.

Tulatondesha njiisho nshotushoma. Baibo ilayuminisha Beneklistu ayi balyeelete kufwala “kabotu cabulemu alimwi akulibombya.” (1 Timoti 2:9, 10) Kufwala “cabulemu” cilaamba kutafwala shakufwala kwaamba ayi bamwi batuboone, shakufwala sheenga shaleta miyeeyo yakoonana, na shibonesha shamukati shiteelete kuboneka. ‘Kulibombya’ kulatucafwa kusala shakufwala shili kabotu alimwi kutaciindilisha mumfwalilo yesu. Njiisho ishi shilatondesha ayi inga twafwala shakufwala shipusene-pusene shitusangalasha na nshetusuni. Kwakubula kwaamba maswi ali woonse, mbonekelo yesu inga “yalemeka maswi akwe Lesa Mupulushi wesu.” (Taitasi 2:10; 1 Pita 2:12) Na katufwala kabotu ndyetutooya kumabungano, cilaakucafwa bamwi kupa bulemu kulambila kwakwe Yehova.

Mutaalilwi kuya kuŊanda ya Bwaami pamulandu washakufwala. Teshi kwaamba ayi mulyeelete kuula shakufwala sha muulo unene na shibotu kwiindaawo ndyemutoosa kumabungano, ciyandikabo, nkufwala shakufwala sheelete, shitacite matombe, alimwi shiboneka kabotu.

• Ino ngumulandunshi tulyeelete kufwala kabotu ndyetutooya mukupaila?

• Ino Baibo ilatucafwa buyani kusala shakufwala sheelete?