CIIYO 19
Ino Musebenshi Ushomeka Alimwi Ucite Maano Ngaani?
Soonse tulacafwikwa acakulya cesu cakumushimu
Ndyekwakacala ciindi ciniini kwaamba ayi afwe, Yesu wakaamba abashikwiiya bakwe bone palubasu—Pita, Jemusi, Joni alimwi a Andulu. Ndyaakalinga kubalwiita shintu nsheshi bakashibileeko kubaawo kwakwe munshiku shamamanino, wakeepusha mwiipusho uyandika abuumbi wakwaamba ayi: ‘Ino musebenshi ushomeka ucite maano ngaani, uyo mwaami wakwe ngwakapa mulimo wakubona babye, akunoobapa cakulya paciindi ceelete?’ (Mateyo 24:3, 45; Maako 13:3, 4) Yesu wakalinga kushomesha bashikwiiya bakwe ayi mukwiinga ngu ‘mwaami’ ulaakusala wooyo weshi anoopa cakulya cakumushimu lyoonse kubashikwiiya bakwe munshiku shino shamamanino. Ino musebenshi uyu wakesa mukuba aani?
Ndikoto liniini lya bashikwiiya bakwe Yesu bananikitwe. “Musebenshi” uyu ndikoto lyabamakwesu bananikitwe abo bali mulikoto Litanjilila lya Bakamboni Bakwe Yehova. Ulaabila cakulya cakumushimu paciindi ceelete kubashominyina mbwapailabo. Tulashoma musebenshi ushomeka uyu kunootupa “cakulya cikwene paciindi ceelete.”—Luka 12:42.
Baleendelesha bamuŋanda yakwe Lesa. (1 Timoti 3:15) Yesu wakapa musebenshi ncito inene ya kweendelesha lubasu lwa ncito ya libunga lyakwe Yehova pacishi—kulama buboni bwa libunga, incito yakushimikila alimwi akutwiisha kwiinda mumabungano esu. Aboobo, kwaamba ayi atupe nshetuyandika paciindi ceelete, musebenshi ushomeka alimwi ucite maano ulaabila cakulya cakumushimu kwiinda mumabuku ngotusebensesha muncito yesu yakushimikila, alimwi amumakani apekwa kulibungano akumabungano anene.
Musebenshi ulashomeka kucancine camu Baibo akuncito yakushimikila makani abotu njaakapekwa, alimwi ulicite maano mukwiinga uleendelesha kabotu shintu shakwe Klistu shapacishi. (Milimo ya Batumwi 10:42) Yehova utoopa coolwe ncito yamusebenshi kwiinda mukwiita bantu baanji kuba Bakamboni alimwi akumucafwa kwaabila cakulya ciinji cakumushimu.—Isaya 60:22; 65:13.
Ino ngaani wakasalwa aYesu kwaamba ayi anoopa bashikwiiya bakwe shintu shibacafwa lwakumushimu?
Ino musebenshi watondesha buyani ayi ulashomeka alimwi ayi ulicite maano?