Ino Maali Acafwilisha Ncito Yesu Cishi Coonse Alaswa Kuli?

Bakamboni Bakwe Yehova balapulinta maBaibo alimwi amabuku aanji abuumbi mwaaka uli woonse akupa bantu cakutabalipilisha. Tulayaka akubambulula Maanda aBwaami amaofesi amusampi. Tulacafwa shuulu ashuulu sha baabo basebensela paBetelo, bamishonali, alimwi tulacafwilisha abaabo beshikucanika mumapensho mbuli shipuupu na shitentanshi na mapensho amwi anene alicitikila. Aboobo, inga mwalipusha ayi, ‘Ino maali asebenseshekwa muncito yoonse iyi alaswa kuli?’

Tatulipilishi maali, tatubwesi calikumi, na kwiinsha mbale kusenga maali. Nacibi kwaamba ayi kucafwilisha ncito yesu yakushimikila kulisuniki maali aanji, tatusengiwo maali sobwe. Ishi nsheshakaambwa mu Ngazi Yamulindizi yabili kuswa myaaka 100 yainda. Yakaamba ayi, tulashoma ayi Yehova ngotucafwilisha alimwi akwaamba ayi “teshi tukasengewo na kukombelela ayi bantu batupeko maali,” ncakwiila tatunakusengawo kale maali!—Mateyo 10:8.

Nciito Yesu ilacafwilishikwa amaali apekwa mukuliyandila. Bantu baanji balalumba ncito yesu yakwiisha Baibo, aboobo mukuliyandila balapa shipo kucafwilisha ncito iyi. Bakamboni beene abalo balasangalala kusebensesha ciindi, nkusu, maali, alimwi ashintu shabo shimwi kucita kuyanda kwakwe Lesa pacishi coonse. (1 Makani 29:9) KuŊanda ya Bwaami alimwi akumabungano esu anene, kuli tubokosi twakabikwa kwaamba ayi abo basuni inga babikamo maali. Bweenka mbuli mukalubinje ngwakaamba Yesu ayi wakacita kabotu abuumbi kwiinda mukubikamo tumaali twamukuba tobilo mucakubikaamo shipo, mumisena iinji munshiku shino maali apekwa alaswa kubantu bateshi babile sobwe. (Luka 21:1-4) Aboobo uli woonse inga ‘wapatula cimwi cintu pambali’ kwaamba ayi akape kweelana “[a]mbwaasala mumoyo wakwe.”—1 Bene Kolinto 16:2; 2 Bene Kolinto 9:7, NWT.

Tulishinishite kwaamba ayi Yehova ulaakwiindilisha kuyuminisha baabo basuni ‘kumulemeka abuboni bwabo’ kucafwilisha ncito ya Bwaami, kwaamba ayi kuyanda kwakwe kukumanishikwe.—Tushimpi 3:9.

• Ino Bakamboni Bakwe Yehova balipusene buyani amaceeci amwi?

• Ino maali apekwa mukuliyandila alasebenseshekwa buyani?