Mbweenga Twalama Kabotu Ŋanda ya Bwaami

Ŋanda ya Bwaami ya Bakamboni Bakwe Yehova iliyoonse ililembetwe liina lyakwe Lesa lisalalite. Aboobo, tulabona ayi kutola lubasu muncito yakubotesha ŋanda iyi kwaamba ayi kaiboneka kabotu, ncoolwe alimwi ndubasu lusuniki lwakulambila kwesu kusalalite. Uli woonse inga wasebensaako ncito iyi.

Inga mwaboteshaako pesule lya kubungana. Lyoonse pesule lya kubungana bamakwesu alimwi abenankashi mukuliyandila balapyanga na kubotesha Ŋanda ya Bwaami palaamfu palaamfu. Kulaba bushiku bomwi munsondo ndyekuba kubotesha kunene. Munene na musebenshi ucafwilisha ulapekwa ncito yakubamba ncito mboyeelete kusebensekwa. Bamakwesu abenankashi balalyaaba kusebensa ncito mbuli kupyanga, kukolopa, kubotesha shuuna na mabeenci, kubotesha mawiindo, shimbushu, akupyanga palubaansa. Mwaaka uli woonse kulaba bushiku bomwi ndyekuba kubotesha shintu shoonse paŊanda ya Bwaami. Na katusa abana besu kuncito iyi, nkokwaamba ayi tutobaiisha kupa bulemu misena yesu yakulambililaamo.—Shikushimikila 5:1.

Inga mwasebensaako na kuli kubamba shinyonyookete. Mwaaka uli woonse kulaba kulangalanga Ŋanda ya Bwaami mukati alimwi akunsengwe. Na kuli shimwi shakanyonyooka, tulashibamba kwaamba ayi Ŋanda ya Bwaami inoboneka kabotu akwaamba ayi shitanyonyookeli limwi cakwaamba ayi tusowe maali aanji kushibambulula alimwi. (2 Makani 24:13; 34:10) Ŋanda ya Bwaami njetusebensesha kulambila Lesa ilyeelete kunoboneka kabotu. Na katwabanaamo muncito iyi, cilaakuboneka ayi tulisuni Yehova alimwi tulapa bulemu musena nkotupailila. (Kulumbaisha 122:1) Bantu bamwi abalo balaakulemeka kupaila kwesu.—2 Bene Kolinto 6:3.

• Ino ngumulandunshi tulyeelete kulama kabotu Maanda aBwaami?

• Ino mbubambo nshi buliwo kwaamba ayi Ŋanda ya Bwaami inoboneka kabotu?