Ino Bweene Bwakwe Lesa Nciinshi?

1. Ino Bweene bwakwe Lesa nciinshi?

Bweene bwakwe Lesa mbweendeleshi bwa kwiculu. Bulaakupyana bweendeleshi bwa bantu alimwi bulaakucita kuyanda kwakwe Lesa kwiculu a pacishi. Nga makani abotu kwaamba ayi Lesa ulaakusebensesha Bweene bwakwe mu mushobo uyo. Onoono Bweene bwakwe Lesa bulaakutalika kweendelesha bantu kweelana ambocelete kuba. Bulaakucatanya bantu boonse beshi bakanokala pa cishi.—Amubelenge Danyelo 2:44; Mateyo 6:9, 10; 24:14.

Bweene bulyeelete kuba a mwaami. Yehova wakasala Yesu Klistu, mwanaakwe, kuba Mwaami wa Bweene Bwakwe.—Amubelenge Ciyubululo 11:15.

2. Nceebo nshi Yesu ngo weelete kuba Mwaami?

Mwanaakwe Lesa uleelela kuba Mwaami mukwiinga ulicite nkumbu, ulayandisha akucita shiluleme. (Joni 1:14) Alimwi ulicite nkusu sha kucafwa bantu mukwiinga ulaakunokweendelesha cishi kuswa kwiculu. Ndyaakabushikwa wakaya kwiculu mu kukala ku lulyo lwakwe Yehova a kunolindila kumubika pa Bwaami. (Bene Ebulu 10:12, 13) Ciindi cakashika Lesa ndyaakamupa nkusu sha kutalika kweendelesha.—Amubelenge Danyelo 7:13, 14.

3. Mbaani beshi bakanokweendelesha a Yesu?

Bantu beetwa ayi “basalalite” balaakunokwendelesha a Yesu kwiculu. (Danyelo 7:27) Bakatanguninawo kusalwa pa baabo basalalite bakalinga batumwi balushomo bakwe Yesu. Yehova wakatolelela kushika acecino ciindi kunosala basankwa a banakashi balushomo beetwa ayi basalalite. Mbuli mbocakalinga kuli Yesu balabushikwa a mubili wa mushimu.—Amubelenge Joni 14:1-3; 1 Bene Kolinto 15:42-44.

Ino mbantu bongaye baya kwiculu? Yesu wakabeeta ayi “litanga liniini.” (Luka 12:32) Balyeelete kuba 144,000. Balaakunokweendelesha cishi a Yesu.—Amubelenge Ciyubululo 14:1.

4. Nciinshi cakacitika Yesu ndyakatalika kweendelesha?

Bweene bwakwe Lesa bwakatalika kweendelesha mu 1914.a Cakutanguna Yesu ncaakacita ndyakaba Mwaami nkuwaala Sataana a mishimu yakwe pa cishi. Sataana wakakalala akutalika kuleta mapenshi mu cishi coonse. (Ciyubululo 12:7-10, 12) Kuswa waawo, mapenshi alaya cifula. Nkondo, nsala, malwashi a shitentanshi, shoonse ishi shili pa ‘cakushibilaako’ kwaamba ayi ononobo Bwene bwakwe Lesa bulakutalika kweendelesha.—Amubelenge Luka 21:7, 10, 11, 31.

5. Ino nshiinshi Bweene bwakwe Lesa nshobutocita a nsheshi bukacite kunembo?

Bweene bwakwe Lesa bwakatalika kale kucatanya likoto lya bantu baanji mu cishi coonse kwiinda mu kushimikila. Bantu baanji balibombya batoba mumaansa a Bweene bwakwe Lesa bweendeleshekwa a Yesu. Bweene bwakwe Lesa bulaakubafuna ndyeshi bukanyonyoole bamucita shibi pa cishi. Boonse basuni kucana coolwe mu Bweene bwakwe Lesa balyeelete kunyumfwila Yesu utokweendelesha.—Amubelenge Ciyubululo 7:9, 14, 16, 17.

Mu myaaka 1,000, Bweene bwakwe Lesa bulaakucita kuyanda kwakwe Lesa kwakutanguna ku bantu. Cishi coonse cilaakuba paladaiso. Kuswa waawo, Yesu ulaakuboosesha Bweene kuli ba Ishi. (1 Bene Kolinto 15:24-26) Sa kuli ngo mushi wenga mwayanda kulwiita sha Bweene bwakwe Lesa?—Amubelenge Kulumbaisha 37:10, 11, 29.