Inga Mwasangalala Buyani A Beshikamukowa?

1. Kweebana kweelana a milawo inga kwacafwa buyani beshikamukowa kusangalala?

Makani abotu alaswa kuli Yehova, Lesa usangalete, uyanda beshikamukowa kusangalala. (1 Timoti 1:11) Lesa ngo wakatalika cikwati. Kweebana kweelana a milawo kulacafwa beshikamukowa kusangalala mukwiinga shintu mu maanda shilaba kabotu a baana balakula kabotu.Bene Klistu balyeelete kukonkela milawo ya cikwati kweelana ankobakalila.—Amubelenge Luka 2:1, 4, 5

Ino Lesa ulisuni cikwati kuba buyani? Ulisuni ayi musankwa a mwanakashi na beebana tabeelete kulekana. Lesa ulisuni basankwa a bamakaabo kunoshomeka kuli womwi awomwi. (Bene Ebulu 13:4) Lesa ulipatite kulekana. (Malaki 2:16) Ono ulasuminisha bene Klistu kulekana a kweeba alimwi na womwi wacita bulale.—Amubelenge Mateyo 19:3-6, 9.

2. Ino beebene balyeelete kucita nshi kwaamba ayi banonyumfwana?

Yehova wakalenga musankwa a mwanakashi kwaamba ayi banocafwana mu cikwati. (Matalikilo 2:18) Mukwiinga musankwa ngocite nkusu pa mwanakashi, ngo weelete kubambila bashikamukowa shoonse nshobayanda a kubeisha shakwe Lesa. Ulyeelete kutondesha lusuno ku mukaakwe kwakubula kukakatishikwa. Beebene balyeelete kunolemekana a kusunana. Mukwiinga beebene tabamaninitewo, balyeelete kunolekelelana kwaamba ayi banosangalala mu cikwati.—Amubelenge Bene Efeso 4:31, 32; 5:22-25, 33; 1 Pita 3:7.

3. Sa na tamutosangalala mulyeelete kuswaako ku cikwati?

Na tamutonyumfwana mu cikwati canu, noonse nobilo mulyeelete kweelesha cankusu kunotondesha lusuno. (1 Bene Kolinto 13:4, 5) Maswi akwe Lesa tayuminishi kuswa ku cikwati ayi njo nshila ya kumanishishamo kutanyumfwana.—Amubelenge 1 Bene Kolinto 7:10-13.

4. Ino nobaana, Lesa ulayanda ayi mube buyani?

Yehova ulisuni ayi munosangalala. Ulamwaambila nshenga shamucafwa kunokala kabotu mu bwanike bwanu. Ulisuni ayi munonyumfwila bashali banu kwaamba ayi bamucafwe mukwiinga balishi shintu shiinji kwiinda ndimwe alimwi balicite maano. (Bene Kolose 3:20) Yehova ulisuni ayi mukashibe bubotu bucanika mukucita nshayanda Mulengi wanu a Mwanaakwe.—Amubelenge Shikushimikila 11:9–12:1; Mateyo 19:13-15; 21:15, 16.

5. Nobashali, inga mwacita nshi kwaamba ayi bana banu banosangalala?

Mulyeelete kusebensa cankusu kwaamba ayi munobambila bana banu shakulya, mwakukala a shakufwala. (1 Timoti 5:8) Ono kwaamba ayi bana banu banosangalala, cimwi nco mweleete kucita nkubeisha kusuna Lesa a kwiiya kuli nguwe. (Bene Efeso 6:4) Na nobashali mulatondesha lusuno kuli Lesa, inga mwacafwa bana banu kusuna Lesa. Nsho mwaambila bana banu kucita na kashiswa mu Maswi akwe Lesa, inga mwacafwa bana banu kunoyeeya shiluleme.—Amubelenge Dutolonomi 6:4-7; Tushimpi 22:6.

Tulacafwa baana na tutobayuminisha a kubalumba na bacita shibotu. Cimwi ciindi balayandika kubakalalila a kubalulika. Na kamubeisha mu mushobo uyo, mulaakubafuna ku kucita shintu nshenga shabaletela mapenshi. (Tushimpi 22:15) Ono ndi mutobalulika tamweelete kwiindilisha nabi kubacisa.—Amubelenge Bene Kolose 3:21.

Bakamboni bakwe Yehova balalemba mabuku ashiyeneshiyene enga acafwa bashali a baana. Shilembwa mu mabuku aya shilaswa mu Baibo.—Amubelenge Kulumbaisha 19:7, 11.