Ino Lesa Ngani?

1, 2. Ino njimiipusho nshi liinji bantu njobeepusha?

BAANA baleepusha miipusho abuumbi. Nabi kwaamba ayi mwabakumbula mwiipusho womwi, liinji balisuni kwiipusha alimwi ayi, ‘Ino nceebonshi?’ Alimwi nabi mweelesha buyani kukumbula, inga beendilisha akumwiipusha ayi, ‘Ano ino nceebonshi?’

² Soonse tuleepusha miipusho, baana nabi bamanene. Inga twaba amiipusho mbuli, ‘Ino tutoolyanshi? Ino tutoofwalanshi? Ino ntokuulanshi?’ Na mpashi tulicite miipusho inene pamakani abuumi ashitoosa kunembo. Ono na twacana kwaamba ayi taakuwo shikumbulo shinyumfwika kabotu pamakani aya, inga twacileka kulangoola shikumbulo.

3. Ino nceebonshi bantu baanji balayeeya ayi inga tabacani shikumbulo kumiipusho inene njobacite?

³ Sa Baibo ilicite shikumbulo kumiipusho inene njotwiipusha? Bamwi mbweenga bayeeya; sombi baanji balayeeya ayi Baibo njiyumu kunyumfwisha. Balayeeya ayi bamafundishi na bamapailishi mbobacishi shikumbulo. Alimwi bamwi balanyumfwa nsoni kwiipusha. Ino mwebo mulalinyumfwa buyani?

4, 5. Ino njimiipusho nshi iyandika njeenga twaliipusha? Ino nceebonshi tulyeelete kutolelela kulangoola shikumbulo?

⁴ Mpashi inga mwasuna kushiba shikumbulo kumiipusho mbuli: Ino ngumulandunshi ngotubetele pacishi ca panshi pano? Nciinshi ceshi cikacitike kulindime ndaakufwa? Ino Lesa ngumuntu wamushobo nshi? Yesu, Shikwiisha ushibikitwe abuumbi, wakaamba ayi: ‘Amutolelele kusenga, lyalo mulaakupekwa; amutolelele kulangoola, lyalo mulaakucana; amutolelele kukonkoonsha, lyalo mulaakucalwitwa.’ (Mateyo 7:7) Aboobo, tamweelete kucileka kulangoola kushikila mukacane shikumbulo nsheenga mwashooma.

⁵ Ncakwiila, na ‘mwatolelela kulangoola,’ mulaakushicana shikumbulo mu Baibo. (Tushimpi 2:1-5) Shikumbulo isho nshuubu kunyumfwisha. Nsheshi mwiiye shilaakumucafwa kuba abuumi busangalasha pacecino ciindi abulindilishi bubotu bwa kunembo. Atubandike mwiipusho womwi upensha bantu baanji.

SA LESA ALATUBIKILAAKO MAANO?

6. Ino nceebonshi bantu bamwi balayeeya ayi Lesa taatubikiliiko maano?

⁶ Bantu baanji balayeeya ayi Lesa taatubikiliiko maano. Balayeeya ayi, na Lesa alatubikilaako maano, nakwiinga cishi tacibete bobulya. Cishi coonse ciliswitebo nkondo, kupatana amapensho. Bantu balaciswa, balapenga akufwa. Aboobo bamwi balaliipusha ayi, ‘Na Lesa alatubikilaako maano, ino nceebonshi ncaatakushiliwo mapensho?’

7. (a) Ino bamapailishi bamaceeci balayiisha buyani bantu ayi Lesa ngumubiibi moyo? (b) Ino nciinshi nceenga twashomena ayi Lesa teshi ngoolengesha ayi shintu shibiibi shinoocitika?

⁷ Cimwi ciindi bamapailishi bamaceeci mbobalengesha bantu kuyeeya ayi Lesa ngumubiibi moyo. Na kwacitika cintu cibiibi mbuli lufu, balaamba ayi nkuyanda kwakwe Lesa. Balaamba ayi Lesa ngwaabamba ayi cibe boobo. Munshila imwi balapa Lesa mulandu. Sombi Baibo ilaiisha ayi bubi tabuswi kuli Lesa. Jemusi 1:13 ilatutondesha ayi Lesa taeeleshi muntu uli woonse ashintu shibiibi. Lilaamba ayi: “Muntu na weeleshekwa, ataambi ayi: ‘Lesa ngowanjelesha’. Ceebo Lesa taeeleshiwo abubi alimwi taaku muntu ngwaeelesha.” Ici cilaamba ayi nacibi kwaamba ayi Lesa taana kukasha shintu shibiibi kucitika, teshi ngoolengesha ayi shinoocitika. (Amubelenge Jobo 34:10-12.) Atwaambe cakubonenaako.

8, 9. Ino nceebonshi tatweelete kupa mulandu Lesa na twacana mapensho? Amwaambe cakubonenaako.

⁸ Amuyeeye ayi mwaana musankwa ucikala abashali bakwe paŋanda. Baishi balimusuni abuumbi alimwi bakamwiisha kusala kabotu. Ono bushiku bumwi waashuka akuswa paŋanda. Watalika kucita shintu shibiibi akulicana mumapensho. Sa inga mwapa baishi mulandu pamapensho ngaacana? Sobwe! (Luka 15:11-13) Bweenka mbuli ishi wa mwaana uyu, alakwe Lesa taakwe kubakasha bantu ndyebakasala kwaashuka akucita shintu shibiibi. Aboobo, na kwacitika cintu cimwi cibiibi, tatweelete kuyeeya ayi Lesa ngowalengesha. Inga caba cilubo kupa mulandu Lesa.

⁹ Kuli mulandu Lesa ncaalekela shintu shibiibi kucitika kushika amunshiku shino. Mulaakwiiya Baibo ncoyaamba pamulandu uyo mu Mutwi 11. Ano cancine ncakwaamba ayi Lesa alitusuni alimwi teshi ngoolengesha ayi tunoopenga. Alimwi lakwebo eenka ngweenga wakonsha kumana mapensho esu.—Isaya 33:2.

10. Ino nceebonshi nceenga twashomena ayi Lesa alaakubamba shintu shoonse nshobanyonyoola bantu babiibi?

¹⁰ Lesa alisalalite. (Isaya 6:3) Shintu shoonse nshaacita shilisalalite, shililuleme alimwi nshibotu. Aboobo inga twamushoma. Ano bantu teshi mbobabete. Shimwi shiindi balacita shintu shibiibi. Alimwi nabi muleli ushomeka taacitewo nkusu shakukusha shintu shibiibi shoonse bantu nsheenga bacita. Taakuwo muntu wiinda Lesa nkusu. Alaakucikonsha kubambulula shoonse shakanyonyoola babiibi. Alaakukusha shibiibi shoonse kwamuyayaya.—Amubelenge Kulumbaisha 37:9-11.

INO LESA ALANYUMFWA BUYANI NA KATUPENGA?

11. Ino Lesa alanyumfwa buyani na katupenga?

¹¹ Ino Lesa alanyumfwa buyani na wabona shintu shibiibi shicitika pacishi asheesho shimucitikila? Baibo ilatwiisha ayi Lesa “ulayandishisha bululami.” (Kulumbaisha 37:28) Aboobo alisuni abuumbi shintu shibotu sombi alipatite shibiibi. Cilamucisa abuumbi na wabona bantu kabapenga. Baibo ilaamba ayi “cakamucisa abuumbi kumoyo” ndyaakabona ayi cishi casula bubi muciindi cakale kale. (Matalikilo 6:5, 6) Lesa taakwe kwaaluka. (Malaki 3:6) Baibo ilaamba ayi Lesa ngoomulama.—Amubelenge 1 Pita 5:7.

12, 13. (a) Ino nciinshi citupa kwaamba ayi tube alusuno kubantu akubabikila maano, alimwi ino tulalinyumfwa buyani pamapensho ali pacishi? (b) Ino nceebonshi inga twashooma ayi Lesa alaakukusha mapensho oonse akutalulama?

¹² Baibo alimwi ilaamba ayi Lesa wakatulenga mucikoshanyo cakwe. (Matalikilo 1:26) Ici cilasansulula ayi Lesa wakatulenga amibo ibotu yeenka mbuli njaacite. Aboobo, na mwebo cilamucisa kubona bantu batacite mulandu kabapenga, nkokwaamba ayi Lesa lakwe cileendaawo kumucisa! Ino tulishi buyani?

¹³ Baibo ilatwiisha ayi “Lesa ndusuno.” (1 Joni 4:8) Shintu shoonse nshaacita alashicita ceebo calusuno. Aboobo, tulatondesha lusuno mukwiinga Lesa ngushilusuno. Amuyeeye makani aya: Naakwiinga mwakalinga kucite nkusu, sa inga mwakushaawo mapensho oonse akutalulama kuli pacishi? Ncakwiila mulakonsha kucita boobo, mukwiinga mulisuni bantu. Ino mbuyani Lesa? Alicite nkusu, alimwi mukwiinga alitusuni, alaakukusha mapensho oonse akutalulama koonse. Inga mwashooma kwaamba ayi Lesa alaakukumanisha shishomesho shakwe shoonse shaambwa kumatalikilo alibuku ili! Ano kwaamba ayi mushome shishomesho ishi, mulyeelete kushiba makani aanji pali Lesa.

LESA ALISUNI KWAAMBA AYI MUMUSHIIBE

14. Ino liina lyakwe Lesa ngani, alimwi ino tulicishi buyani ayi tulyeelete kulisebensesha?

¹⁴ Ino nciinshi ncemutaanguna kumulwiita muntu na mulisuni kupanga bushicibusa anguwe? Liinji inga mwamulwiita liina lyanu. Sa Lesa alicite liina? Maceeci aanji balaamba ayi liina lyakwe ngu Lesa na Mwaami, ono aya teshi meena sobwe. Ngamaswi abulemu bweenka mbuli liswi lyakwaamba ayi “mweendeleshi” na “mwaami.” Lesa alatulwiita ayi liina lyakwe ngu Yehova. Kulumbaisha 83:18 ilaamba ayi: “Bantu abashibe kwaamba ayi mwebo, nomucite liina lyakwaamba ayi Yehova, mwebo nweenkabo ndimwe Mwiinditeewo pacishi coonse.” Balembi ba Baibo bakasebensesha liina lyakwe Lesa mankanda aanji abuumbi. Aboobo, Yehova alisuni kwaamba ayi mulishiibe liina lyakwe akulisebensesha. Wamulwiita liina lyakwe kwaamba ayi mube shicibusa wakwe.

15. Ino liina lyakwaamba ayi Yehova lilasansulula nshi?

¹⁵ Liina lyakwe Lesa lyakwaamba ayi Yehova licite busansulushi bunene. Lilasansulula ayi Lesa alakonsha kukumanisha kuyanda kwakwe acintu cili coonse ncaashomesha. Taakuwo ceenga camukasha. Yehova eenkabo ngoweelela kuba aliina ili.a

16, 17. Ino maswi aya alasansulula nshi, (a) “Shinkusu Shoonse”? (b) “Mwaami walyoonse alyoonse”? (c) “Mulengi”?

¹⁶ Bweenka mbuli mbotwabelenga, lilembo lya Kulumbaisha 83:18 lilaamba pali Yehova ayi: “Mwebo nweenkabo ndimwe Mwiinditeewo.” Alimwi lilembo lya Ciyubululo 15:3 lilaamba ayi: “Shintu nshemucita nshinene alimwi shilakankamika abuumbi, Yehova Lesa, Shinkusu Shoonse. Nshila shako shililuleme alimwi nshalushinisho, O Mwaami walyoonse alyoonse.” Ino liswi lyakwaamba ayi “Shinkusu Shoonse” lilasansulula nshi? Lilasansulula ayi taakuwo ucite nkusu kwiinda Yehova kwiculu apacishi. Liswi lyakwaamba ayi “Mwaami walyoonse alyoonse” lilasansulula ayi lakwebo eenka ngowakalingaako lyoonse. Kulumbaisha 90:2 ilaamba ayi lakwe wakalingaako kuswabo lili alili alimwi unanooliiko lyoonse kushikila muyayaya. Makani aya alakankamika abuumbi!

¹⁷ Yehova eenkabo ngo Mulengi. Ciyubululo 4:11 ilaamba ayi: “Uleelela, Yehova, O Lesa wesu, kutambula bulemu ankusu, mukwiinga ndiwe wakalenga shintu shoonse, alimwi ceebo cakuyanda kwako shakabaako alimwi shakalengwa.” Ncakwiila, Yehova wakalenga shintu shoonse nsheenga mwacikonsha kuyeeya mbuli baanjelo kwiculu, nyenyeenshi, shisepo answi shili mumilonga amulweenge!

SA INGA MWABA SHICIBUSA WAKWE YEHOVA?

18. Ino nciinshi ceenga capa bamwi kuyeeya ayi inga tabakoonshi kuba bashicibusa bakwe Lesa? Ino Baibo ilaamba nshi pamakani aya?

¹⁸ Bantu bamwi na babelenga mibo ikankamika yakwe Yehova, balaloonda akutalika kuyeeya ayi, ‘Lesa alicite nkusu abuumbi, alicindeme abuumbi alimwi ulekala kulaale abuumbi andime, sa inga wambikilaako maano nebo?’ Ano sa ubo Lesa mbwaasuni ayi tunoolinyumfwa? Sobwe tabushi. Yehova alisuni kuba pafwiifwi andiswe. Baibo ilaamba ayi Lesa “taabete kulaale aswebo soonse.” (Milimo 17:27) Lesa alisuni kwaamba ayi musene kulinguwe alimwi alashomesha ayi “alakwe alaakusena pafwiifwi amwebo.”—Jemusi 4:8.

19. (a) Ino inga mwaba buyani shicibusa wakwe Lesa? (b) Ino ngu mubo uli pamibo ibotu yakwe Yehova ngomusuni abuumbi?

¹⁹ Ino inga mwaba buyani shicibusa wakwe Lesa? Yesu wakaamba ayi: “Ici cilaamba buumi butamaani, kushiba ndiwe Lesa wancinencine eenkabo, awooyo ngowakatuma, Yesu Klistu.” (Joni 17:3) Amutolelele kwiiya, lyalo mulaakumushiba Yehova a Yesu. Aboobo inga mwacikonsha kucana buumi butamaani. Kucakubonenaako, tweeya kale ayi “Lesa ndusuno.” (1 Joni 4:16) Sombi alicite mibo aimwi iinji ibotu abuumbi. Baibo ilatulwiita ayi Yehova ‘ngushinkumbu alimwi ngushikulekelela, taafwambaani kukalala alimwi aliswite lusuno lutamaani alushinisho.’ (Kulonga 34:6) Yehova ‘ngumubotu alimwi alilibambite kulekelela shibiibi.’ (Kulumbaisha 86:5) Lesa alakalika moyo alimwi alashomeka. (2 Pita 3:9; Ciyubululo 15:4) Mulaakwiiya shiinji pamakani amibo yakwe ibotu ndyemutobelenga Baibo.

20-22. (a) Ino inga mwaba buyani abushicibusa aLesa nabi tamukoonshi kumubona? (b) Ino nciinshi ncomweelete kucita na bamwi kabamukasha kwiiya Baibo?

²⁰ Ino inga mwaba buyani shicibusa wakwe Lesa ngomutaboni? (Joni 1:18; 4:24; 1 Timoti 1:17) Ndyemutobelenga makani aamba pali Yehova mu Baibo, mulesa mukushiba mbwaabete. (Kulumbaisha 27:4; Bene Loma 1:20) Ndyemutokwiiya shiinji pali nguwe, mulaakutalika kumusuna abuumbi akulinyumfwa ayi mulicite bushicibusa buyumu anguwe.

²¹ Mulaakunyumfwishisha ayi Yehova ngu Ishiwesu. (Mateyo 6:9) Wakatupa buumi, alimwi alisuni ayi tunookala buumi bubotu abuumbi. Ici ncecintu mushali uli woonse shilusuno ncaasuni kubana bakwe. (Kulumbaisha 36:9) Ncakwiila, Baibo ilaiisha ayi inga mwaba shicibusa wakwe Yehova. (Jemusi 2:23) Amuciyeeyelebo. Yehova Mulengi wakwiculu acishi ca panshi, alisuni kwaamba ayi mube shicibusa wakwe!

²² Bantu bamwi inga basuna ayi mucileeke kwiiya Baibo. Mpashi inga baloonda ayi mutooswaako nkomupaila. Sombi mutasuminishi muntu uli woonse kumukasha kuba shicibusa wakwe Yehova. Lakwe nguShicibusa mubotu kwiindaawo.

23, 24. (a) Ino nceebonshi tulyeelete kutolelela kwiipusha miipusho? (b) Ino tulaakubandika nshi mu mutwi utokonkelaawo?

²³ Ndyemutokwiiya Baibo, kulaakuba shintu shimwi nsheshi mukabule kunyumfwishisha. Mutakanyumfwi nsoni kwiipusha miipusho na kusenga lucafwo. Yesu wakaamba ayi tulyeelete kuliceesha mbuli baana baniini. (Mateyo 18:2-4) Alimwi baana balisuni kwiipusha miipusho abuumbi. Lesa alisuni kwaamba ayi mucane shikumbulo. Aboobo amwiiye Baibo cakubikila maano kwaamba ayi mushinishe ayi nshomweeya nshancine.—Amubelenge Milimo 17:11.

²⁴ Kwaamba ayi tushibe Yehova tulyeelete kwiiya Baibo. Mu mutwi utokonkelaawo, tulaakwiiya Baibo mboipusene amabuku amwi woonse.