Mbweenga Mwaba Shicibusa Wakwe Lesa

1, 2. Ino mbaani bamwi bakalinga beshicibusa bakwe Yehova?

INO inga mwasuna kuba bushicibusa amuntu wa mushobonshi? Muntu ngomusuni. Alimwi ngomunyumfwanaakwe. Ucite mibo ibotu amoyo ubotu.

² Yehova alakwe alasala bantu bamwi kuba bashicibusa bakwe. Kucakubonenaako, Abulaamu wakalinga shicibusa wakwe Yehova. (Isaya 41:8; Jemusi 2:23) Yehova wakalinga kusuni a Defedi. Wakaamba ayi Defedi wakalinga ‘muntu ngwaakalinga kusuni abuumbi.’ (Milimo 13:22) Mushinshimi Danyelo alakwe wakalinga muntu ngwaakalinga ‘kusuni abuumbi’ Yehova.​—Danyelo 9:23.

3. Ino nciinshi cakalengesha ayi Abulaamu, Defedi, a Danyelo babe beshicibusa bakwe Yehova?

³ Ino Abulaamu, Defedi, a Danyelo bakaba buyani bashicibusa bakwe Yehova? Yehova wakalwiita Abulaamu ayi: ‘Wanyumfwila maswi angu.’ (Matalikilo 22:18) Yehova alaba shicibusa kubantu baliceesha akumunyumfwila. Nabibo mushobo woonse wa bantu inga waba abushicibusa a Lesa. Yehova wakalwiita bene Isilaeli ayi: ‘Kamunyumfwila maswi angu, anebo ndaakuba Lesa wanu, alimwi mulaakuba bantu bangu.’ (Jelemiya 7:23) Aboobo na amwebo mulisuni kuba shicibusa wakwe Yehova mulyeelete kumunyumfwila.

YEHOVA ALASHITILISHA BESHICIBUSA BAKWE

4, 5. Ino Yehova alabashitilisha buyani beshicibusa bakwe?

⁴ Baibo ilaamba ayi Yehova alalangoola nshila ‘shakutondesha nkusu shakwe kucafwa baabo bamushoma camoyo woonse.’ (2 Makani 16:9) Palilembo lya Kulumbaisha 32:8, Yehova wakashomesha beshicibusa bakwe ayi: “Ndaakukupa kuba amaano akukwiisha nshila njoweelete kukonkela. Ndaakukutondesha shakucita kankulangite.”

⁵ Ono kuli mulwani shinkusu uyo usuni kunyonyoola bushicibusa bwesu a Lesa. Sombi Yehova alisuni kutushitilisha kumulwani uyu. (Amubelenge Kulumbaisha 55:22.) Mukwiinga Yehova ngushicibusa wesu, tulamusebensela camoyo woonse. Tulashomeka kuli nguwe nabi tucane bukaalo buyumu buyani. Alimwi tulicite lushomo bweenka mbuli shikulumbaisha. Uyo wakalemba pali Yehova ayi: “Mukwiinga uli kulyaansa lyangu lyalulyo, teshi nkatenkanishikwewo.” (Kulumbaisha 16:8; 63:8) Ino Satana alacita nshi kwaamba ayi apilinganye bushicibusa bwesu a Yehova?

SATANA NSHAKABEKESHA BANTU

6. Ino nciinshi Satana ncaakabekesha bantu?

⁶ Mumutwi 11 twakeeya ayi Satana wakapikisha Yehova, akumubekesha ayi ngumubeshi alimwi taabete kabotu, mukwiinga taakwe kusuminisha Adamu a Efa kulisalila beene cibiibi acibotu. Mulibuku lyakwe Jobo Baibo ilatondesha ayi Satana alabekesha abantu boonse basuni kuba beshicibusa bakwe Lesa. Satana alaamba ayi teshi lusuno lupa bantu kusebensela Lesa, sombi ayi nceebo ca shibotu nshebasuni kucana kuli Lesa. Satana alalinyumfwa ayi inga wacikonsha kukusha muntu uli woonse kuli Lesa. Atubone Yehova mbwaakashitilisha Jobo, akubona nsheenga tweeyawo.

7, 8. (a) Ino Yehova wakalinga kumubona buyani Jobo? (b) Ino Satana wakaamba nshi pali Jobo?

⁷ Ino Jobo wakalinga aani? Wakalinga muntu mubotu uyo wakekalaako myaaka yakuma 3,600 yainda. Paciindi cilya Yehova wakaamba ayi, taakuwo muntu wakalinga mbuli Jobo pacishi ca panshi. Jobo wakalinga muntu uloonda Lesa, alimwi upatite shibiibi. (Jobo 1:8) Ncakwiila, Jobo wakalinga shicibusa wakwe Yehova wancinencine.

⁸ Satana wakabekesha Jobo ayi wakalinga kusebensela Lesa ceebo cakulisuna. Satana wakaambila Yehova ayi: “Sa te nceebo cakwaamba ayi mulamutabilila pantu pomwi abamuŋanda yakwe ashintu shakwe shoonse? Shoonse nshaacita shilaswitilila alimwi matanga a shifubwa shakwe alibo luundu loonse. Amweeleshe kumunyaya nshaacite mulinyumfwile mbweshi amushingane.”​—Jobo 1:10, 11.

9. Ino nciinshi Yehova ncaakasuminisha Satana kucita?

⁹ Satana wakabekesha Jobo ayi wakalinga kushomeka kuli Lesa ceebo ca shoolwe Yehova nshaakamupa. Satana wakalinga kwaamba ayi alicite nkusu shakulengesha ayi Jobo acileeke kushomeka kuli Lesa. Sombi Yehova teshi mbwaakalinga kubona Jobo ubo, aboobo wakasuminisha Satana kweelesha Jobo kwaamba ayi abone na Jobo wakalinga kushomeka kuli Lesa ceebo calusuno lwakwe pali nguwe.

SATANA MBWAAKEELESHA JOBO

10. Ino Satana wakeelesha buyani Jobo, alimwi ino Jobo wakacita buyani?

¹⁰ Cakutaanguna, Satana wakanyonyoola shifubwa shakwe Jobo shoonse. Kuswawaawo wakacaya basebenshi bakwe Jobo baanji. Jobo wakasowekelwa shintu shoonse. Cakweelaako, Satana wakacaya bana bakwe Jobo bali 10 mucipuupu. Sombi Jobo wakatolelela kushomeka kuli Lesa. “Mumapensho aya oonse, Jobo taakwe kubishaawo kwiinda mukucobola Lesa.”​—Jobo 1:12-19, 22.

11. (a) Ino nshiinshi shimwi Satana nshaakacita kuli Jobo? (b) Ino Jobo wakacita buyani?

¹¹ Satana taakwe kweelabo peenka apo. Wakapikisha Lesa akwaamba ayi: “Amweeleshe kucisa mubuli wakwe, mulinyumfwile mbweshi amushingane.” Aboobo Satana wakaleta bulwashi bubiibi abuumbi pali Jobo. (Jobo 2:5, 7) Nacibi boobo Jobo wakatolelela kushomeka kuli Yehova. Wakaamba ayi: “Kushikila nkafwe, teshi nkacileeke kushomeka!”​—Jobo 27:5.

12. Ino Jobo wakatondesha buyani ayi Satana ngumubeshi?

¹² Jobo taakalinga kucishiwo nabibo comwi pamakani Satana ngaakalinga kumubekesha nabi cakalengesha ayi apenge bobulya. Wakalinga kuyeeya ayi Yehova ngowakaleta mapensho alya. (Jobo 6:4; 16:11-14) Nacibi boobo, Jobo wakatolelela kushomeka kuli Yehova. Ano cancine cakabonekela patuba. Jobo taakalinga kulisuni. Wakalinga shicibusa wakwe Lesa ceebo cakwaamba ayi wakalinga kusuni Lesa. Makani akaamba Satana oonse akalinga akubeca!

13. Ino nciinshi cakacitika ceebo cakushomeka kwakwe Jobo?

¹³ Nabi kwaamba ayi Jobo taakalinga kucishiwo shakalinga kucitika kwiculu, wakatolelela kushomeka kuli Lesa akutondesha kwaamba ayi Satana ngumubiibi abuumbi. Yehova wakamupa cilambu Jobo ceebo cakuba shicibusa ushomeka.​—Jobo 42:12-17.

SATANA MBWAATUBEKESHA

14, 15. Ino nshiinshi Satana nshaabekesha bantu boonse?

¹⁴ Inga tweeya makani ayandika pashintu shakacitikila Jobo. Pacecino ciindi, Satana alatubekesha ayi tulashomeka kuli Yehova ceebo ca shintu nshetusuni kuli nguwe. Pa Jobo 2:4, Satana wakaamba ayi: “Muntu ulakonsha kupa shintu shoonse nshaacite kwiinda kufwa.” Aboobo Satana alabekesha bantu boonse kuteshibo Jobo eenka ayi balasebensela Lesa ceebo ca shintu nshaabapa. Nabi kwaamba ayi peenda myaaka iinji kuswa ciindi Jobo ndyaakafwa, Satana taakwe kucileka kucobola Yehova akubekesha basebenshi bakwe. Kucakubonenaako, Tushimpi 27:11, ilaamba ayi: ‘Omwanaangu ba musongo akusangalasha moyo wangu, lyalo ndaakwishiba bwakukumbula wooyo untongoola.’

¹⁵ Amwebo inga mwasala kunyumfwila Yehova akuba shicibusa wakwe ushomeka, akutondesha ayi ncakwiila Satana ngumubeshi. Mpashi cimwi ciindi inga mwayandika kwaalula shiinji mubuumi kwaamba ayi mube shicibusa wakwe Lesa, ico ncintu cibotu abuumbi! Kucita boobo kulicindeme abuumbi. Satana alamubekesha ayi na mwacana mapensho inga tamutoleleli kushomeka kuli Lesa. Alisuni kutucenjeeka kwaamba ayi tutashomeki kuli Lesa. Munshila nshi?

16. (a) Ino ni nshila nshi Satana nshaasebensesha kwaamba ayi alengeshe bantu kucileka kusebensela Yehova? (b) Ino Satana inga wamweelesha buyani kwaamba ayi mucileeke kusebensela Yehova?

¹⁶ Satana alasebensesha nshila shipusene pusene kwaamba ayi atulengeshe kutaba beshicibusa bakwe Lesa. Alatulwana mbuli “Inkalamu itoobuluma, kulangoola ngweshi imine.” (1 Pita 5:8) Aboobo mutakankamani na babyaanu, beshikamukowa, nabi bantu bamwi batalika kumupikisha ayi mucileeke kwiiya Baibo akucita shibotu. Paciindi ico inga mwalinyumfwa anga batoomulwana.a (Joni 15:19, 20) Satana alalishisa akulibonesha “anga ngu munjelo wamumuni.” Aboobo inga watucenjeeka akutupa kwaamba ayi tutanyumfwili Yehova. (2 Bene Kolinto 11:14) Nshila imwi Satana njaasebensesha kwaamba ayi tucileeke kusebensela Yehova, nkutupa kutalika kunoyeeya ayi tatweeleli kusebensela Lesa.​—Tushimpi 24:10.

AMUKONKELE MILAWO YAKWE YEHOVA

17. Ino nceebonshi tulanyumfwila Yehova?

¹⁷ Tulatondesha ayi Satana ngumubeshi na katukonkela milawo yakwe Yehova. Ino nciinshi ceenga catucafwa kuba bantu banyumfwila? Baibo ilaamba ayi: “Suna Yehova Lesa wako amoyo wako woonse, buumi bwako boonse, ankusu shako shoonse.” (Dutolonomi 6:5) Tulanyumfwila Yehova mukwiinga tulimusuni. Lusuno lwesu pali Yehova ndyelutooya cikomena, tulaba alusuno lwakucita cili coonse nceenga watulwiita. Mutumwi Joni wakalemba ayi: “Uku nkokusuna Lesa, kwaamba ayi tunookonkela milawo yakwe; alimwi milawo yakwe teshi iyumu sobwe.”​—1 Joni 5:3.

18, 19. (a) Ino nshintu nshi Yehova nshaamba ayi nshibiibi? (b) Ino tulishi buyani ayi inga twacikonsha kucita nshaatulwiita Yehova?

¹⁸ Ino nshintu nshi Yehova nshaatulwiita ayi nshibiibi? Amubone shimwi shilembetwe mukabokosi katokwaamba ayi ‘Amupate Shintu Yehova Nshaapatite.’ Pakutaanguna, mpashi inga mwayeeya ayi shintu shimwi pasheshi shilibo kabotu. Ano na mwabelenga Baibo akuyeeyawo cakubikila maano, mulaakubona kwaamba ayi kunyumfwila milawo yakwe Yehova ncintu camaano. Alimwi mulaakubona kwaamba ayi kuli shimwi nshomweelete kwaalula mubuumi bwanu. Nabi kwaamba ayi teshi cuubu kucita boobo, kwaalula buumi kulaleta luumuno alusangalalo lusa paceebo cakuba shicibusa wakwe Lesa ushomeka. (Isaya 48:17, 18) Ino tulishi buyani ayi cilakonsheka kwaalula buumi?

¹⁹ Yehova inga taatulwiiti kucita cintu ncaacishi ayi inga tatucikoonshi. (Dutolonomi 30:11-14) Mbuli shicibusa wesu utusuni abuumbi, alitushi kabotu kwiinda mbotulishi sobeene. Alishi kabotu nsheenga twacikonsha ansheenga tatucikoonshi. (Kulumbaisha 103:14) Mutumwi Paulo wakatuyuminisha ayi: ‘Lesa ulashomeka, aboobo teshi akamulekelele kwaamba ayi mweeleshekwe kwiinda nkusu shanu sobwe, sombi alaakumupa nshila yakucicilaako kwaamba ayi mucikoonshe kuliyumya mumeelesho ayo.’ (1 Bene Kolinto 10:13) Inga twashooma kwaamba ayi Yehova alaakutolelela kutupa nkusu shakwaamba ayi tucikoonshe kucita shibotu. Alaakumupa “nkusu shikankamika shiinda shabuntu” kwaamba ayi shikamucaafwe kuliyumya mubukaalo buli boonse buyumu. (2 Bene Kolinto 4:7) Pesule lyakucafwikwa a Yehova ciindi ndyaakalinga mumapensho, Paulo wakaamba ayi: “mushintu shoonse ndicite nkusu kwiinda muli wooyo umpa nkusu.”​—Bene Filipi 4:13.

AMUSUNE SHINTU YEHOVA NSHAASUNI

20. Ino njimibo nshi njomweelete kukonkela, alimwi ino nceebonshi?

²⁰ Na tulisuni kuba shicibusa wakwe Yehova, tulyeelete kucileka kucita shintu nshaatulwiita ayi nshibiibi, kwiilikaawo ashimwi shiyandika. (Bene Loma 12:9) Beshicibusa bakwe Lesa balisuni shintu Lesa nshaasuni. Lilembo lya Kulumbaisha 15:1-5. (Amubelenge.) lilabasansulula kabotu beshicibusa bakwe Lesa. Beshicibusa bakwe Yehova balakonkela mibo yakwe akutondesha “lusuno, lusangalalo, luumuno, kukalika moyo, kubota moyo, bubotu, lushomo, kutakalala bwangu, akulikasha.”​—Bene Galatiya 5:22, 23.

21. Ino inga mwacita buyani kwaamba ayi mube amibo Lesa njaasuni?

²¹ Ino inga mwacita buyani kwaamba ayi mube amibo ibotu iyi? Mulyeelete kushiba Yehova nshaasuni kwiinda mukubelenga akwiiya Baibo lyoonse. (Isaya 30:20, 21) Kucita boobo kulaakutola panembo lusuno lwanu pali Yehova akumuyuminisha kumunyumfwila.

22. Ino nciinshi cibotu ceshi cikasweemo na mwasala kunyumfwila Yehova?

²² Inga mwayandika kwaalula buumi bwanu bweenka mbuli muntu mbwaafuula shakufwala shicite matombe akufwala shitubite. Baibo ilaamba ayi mulyeelete “kufuula buntu bwakale” akufwala “buntu bupya.” (Bene Kolose 3:9, 10) Nabi kwaamba ayi teshi cuubu kwaalula buumi, na twaaluka akunyumfwila Yehova, washomesha ayi alaakutupa “cilambu cinene.” (Kulumbaisha 19:11) Aboobo amusale kunyumfwila Yehova akutondesha ayi Satana ngumubeshi. Amushomeke kuli Yehova, kuteshi ceebo cakusuna kutambulabo shoolwe shili kunembo, sombi ceebo cakwaamba ayi mulimusuni. Lyalo mulaakuba shicibusa wakwe Lesa!