Nkalata Itooswa Kulikoto Litanjilila
Mushominyineesu ngotusuni:
Bweenka mbuli mbomushi, Baibo ndibuku lyaamba pa bantu. Baanji bakalinga basankwa abanakashi bashomeka abo bakakumana amapensho ali mbuli eesu. Bakalinga “bweenka mbuli ndiswe.” (Jemusi 5:17) Bamwi bakacana mapensho alimwi bakalinga kulisukama. Bamwi bakakalashikwa abeshikamukowa na mbobapailaabo. Alimwi bamwi bakapenshekwa anjelacaamba pa shilubo nshebakacita.
Ono sa bantu aba bakacilekelabo limwi kusebensela Yehova? Sobwe. Baanji bakalinga anga ngu shikulumbaisha uyo wakapaila ayi: “Ndeengaila anga nimbelele isowekete. Amunyandoole nemusebenshi wanu, ceebo nshilubiiko milawo yanu.” (Kulumbaisha 119:176) Sa amwebo mbomulinyumfwa ubo?
Yehova taalubiiko basebenshi bakwe bakaswa mulitanga. Mubupusano, ulabacafwa kwiinda mukusebensesha bashominyinaabo. Mucakubonenaako, amuyeeye ubo Yehova mbwakacafwa musebenshi wakwe Jobo, uyo wakeenda mumapensho apusene-pusene—ishi shakeelikaawo kunyonyooka kwa buboni, kufwitwa bantu mbwaakalinga kusuni abuumbi, alimwi amalwashi. Jobo taakwe kuboolela mwisule ndyakaambilwa maswi abiibi ababye abo bakalinga kweelete kumuyuminisha. Nabi kwaamba ayi wakalinga wabaako amiyeeyo itabete kabotu, taakwe kupa mulandu Yehova. (Jobo 1:22; 2:10) Ino Yehova wakamucafwa buyani Jobo kushibona kabotu shintu?
Nshila yomwi Yehova njaakasebensesha kucafwa Jobo nkwiinda mumushominyina wakalinga kwiitwa ayi Eliyu. Jobo ndyaakalinga kwaamba mapensho akalinga kumucitikila, Eliyu wakakutika akwaambawo. Ino nshiinshi nshakaamba? Sa wakapa mulandu Jobo na kweelesha kumuyuminisha kwiinda mukusebensesha maswi abiibi alensha nsoni? Sa Eliyu wakalisumpula akulibona ayi ulendaawo pali Jobo? Kulaale! Kwiinda mukutanjililwa amushimu wakwe Lesa, Eliyu wakaamba ayi: “Webo anebo tulyeelenebo pameenso akwe Lesa soonse sobilo twakabumbwabo kuswa kubulongo.” Lyalo wakashomesha Jobo ayi: “Aboobo taapu nceenga wanoondela nebo maswi angu taakoonshi kukucisa bunene kumoyo.” (Jobo 33:6, 7) Muciindi cakwilikaawo pakulisukama kwakwe Jobo, Eliyu calusuno wakamululika alimwi akumuyuminisha.
Twamusenga kwaamba ayi mushibe ayi buloshuwa iyi yakabambwa ayi imucafwe kuteendilisha kulisukama. Katutana kulemba buloshuwa iyi twakataanguna twanyumfwa miyeeyo ya bantu bakaboolela mwisule akubepusha mapensho ngobakakumanaawo. (Tushimpi 18:13) Lyalo cakupaililaawo twakayandoola Malembo atondesha ubo Yehova mbwakacafwa basebenshi bakwe ciindi cakwisule abo bakakumana amapensho. Ndyetwakamana twakabwesa makani ayo ashicitika munshiku shino akulemba buloshuwa iyi. Aboobo twamusenga kwaamba ayi mubelenge akuyeeyawo pamakani ali mubuloshuwa iyi. Amushibe kwaamba ayi tulimusuni abuumbi.
Likoto Litanjilila lya Bakamboni Bakwe Yehova