LUBASU 1
“Ndaakulangoola Shisowekete”
Atuyeeye ayi mbelele yasoweka. Mpashi ndyeyalinga kulya mweemfu yaswa pashibiye. Taicishiwo nkweenga yacana shibiye amweembeshi. Lyalo kwatalika kushiya. Mubusena moyasowekela mulacanika shinyama shiloondesha alimwi taaku weenga waishitilisha. Ndyeli mubusena ubu yanyumfwa liswi ndyolishi lya mweembeshi, uyo waicicila akuibika mucisani akuinyamuna pacaamba akwitola kuŋanda.
LIINJI Yehova ulalikoshanisha amweembeshi. Mumaswi akwe, ulatushomesha ayi: ‘Nebo nemwiine Ndaakulilangweeta mbelele shangu akusheembela.’—Esekelo 34:11, 12.
‘Mbelele Nshoombikilaako Maano’
Ino mbelele shakwe Yehova mbaani? Mbantu bamusuni alimwi bamulambila. Baibo ilaamba ayi: “Tumulambile cakushisha shiwa panshi atufukame pameenso aMwaami Lesa uyo wakatulenga, mukwiinga lakwe nguLesa wesu. Swebo tuli bantu bakwe mbwaaembela anga nimbelele shili mumaansaakwe.” (Kulumbaisha 95:6, 7) Bweenka mbuli mbelele mboshikonkela mweembeshi, abalo bantu balambila Yehova balayandishisha kumukonkela mbuli mweembeshi wabo. Sa balisalalite? Sobwe. Basebenshi bakwe Yehova cimwi ciindi balaba anga “nimbelele shapalangana,” na “mbelele shisowekete,” nabi anga “nimbelele shakasoweka.” (Esekelo 34:12; Mateyo 15:24; 1 Pita 2:25) Nacibi boobo, na muntu waboolela mwisule, Yehova taacileki kulangila kwaamba ayi ulaakuboola.
Sa mulayeeya ayi Yehova ucili mweembeshi wanu? Munshiku shino, ino Yehova ulatondesha buyani ayi ngu mweembeshi? Amubone nshila shotatwe:
Ulatupa Shintu Shitucafwa lwakumushimu. Yehova waamba ayi “Ndaakusheembelela mumafulo mutaamu cakulisukama”, “Mutulundu mushinyika alimwi amumafulo acite mweemfu.” (Esekelo 34:14) Yehova taana kwaalilwawo kale kutupa shintu shibotu shipusene-pusene shitucafwa lwakumushimu alimwi shapaciindi ceelete. Sa inga mweengashila libuku, likani, na vidyo yakamuyuminisha na kumucafwa? Sa taikwe kumucafwa kushoma kwaamba ayi Yehova ulamubikila maano?
Ulatushitilisha Alimwi Akutucafwa. Yehova ulatushomesha ayi: “Ndaakuboosha shakaswa mulitanga. Ndaakwanga shilonda sha sheesho shakalicisa, kuyumya shilefukite.” (Esekelo 34:16) Yehova ulayumya baabo balefukite na abo balisukama. Ulaanga shilonda sha mbelele shakwe, akushicafwa kwaamba ayi shoole na shalicisa—cimwi ciindi kuswa kubashomi. Ulaboosha baabo bakaboolela mwisule alimwi abaabo batopenshekwa amiyeeyo itabete kabotu.
Ulatulama. Yehova waamba ayi “Ndaakushifuna kuswa mumisena yoonse moshakalinga shapalanganina.” “Ndaakuyandoola shisowekete.” (Esekelo 34:12, 16) Yehova ulalangila mbelele shakasoweka ayi shilakuboola. Na mbelele yasoweka ulashiba, ulailangoola, alimwi ulakondwa na waicana. (Mateyo 18:12-14) Mukwiinga Yehova uleeta basebenshi bakwe boonse ayi “Mwebo nombelele shangu mbelele sha mumafulo angu.” (Esekelo 34:31) Amwebo muli pakati ka mbelele isho.
Yehova ulalangila mbelele shakasoweka ayi shilakuboola. Ulakondwa na mbelele waicana
“Amulengeshe Nshiku Shesu Shibe Shabulemu Mbuli Shikulukulu”
Ino Yehova utomulangwetanshi akumwiita ayi muboole? Mukwiinga ulisuni ayi munoosangalala. Wakashomesha ayi “Ncakwiila ilaakuba mfula yatepetepe ya coolwe” ku mbelele shakwe. (Esekelo 34:26) Cishomesho ici cilaakukumanishikwa. Mwakabona kale ubo Yehova mbwaatucafwa kuba alusangalalo.
Amwiibaluke shakacitika ndyemwakatalika kwiiya pali Yehova. Mucakubonenaako, ino mwakanyumfwa buyani ciindi ndyemwakashiba liina lyakwe Lesa alimwi akuyanda kwakwe? Sa inga mwebaluka mbomwakalinga kusangalala abashominyinaanu ciindi ca kubungana kunene alimwi akwalubasu? Ciindi ndyemwakaba acoolwe cakucana muntu usuni kwiiya makani abotu, sa tamuna kukondwa akulinyumfwa kabotu ndyemwakakotoka muncito yakushimikila?
Inga mwatalika alimwi kuba alusangalalo bweenka mbuli kale kale. Basebenshi bakwe Yehova bakalekale bakapaila ayi: “NoBaami baLesa amutubooshe kuli ndimwe, atupilukile kuli ndimwe. Amulengeshe nshiku shesu shibe shabulemu mbuli shikulukulu.” (Malilo 5:21) Yehova wakakumbula mupailo uyu, alimwi bantu bakwe bakaboolela akutalika kumusebensela calusangalalo. (Neyemiya 8:17) Yehova ulaakucita bweenka ubo kuli ndimwe.
Nacibi boobo, kuboolela kuli Yehova teshi cuubu. Atubone mapensho ngeenga mwacana kwaamba ayi muboolele alimwi ambweenga mwaakoma.