LUBASU 5
Amuboolele “kuMweembeshi Uyo Utanjilila Buumi Bwanu”
Sa amwebo mwakeendawo kale mumapensho ali mbuli aya aambwa mubuloshuwa iyi? Na mboboobo, amushibe ayi tamubete nweenka. Basebenshi bakwe Lesa baanji bashomeka—bakalekale abamunshiku shino—abalo bakeenda mumapensho mbuli aya. Bweenka mbuli Yehova mbwakabacafwa kukoma buyumuyumu, amwebo inga wamucafwa.
Yehova ulaakuba andimwe na mukaboolele kuli nguwe
AMUSHOME kwaamba ayi na mukaboolele, Yehova ulaakumutambula akumucafwa. Ulaakumucafwa kwaamba ayi mucileke kulisukama, kutakalashikwa ashakacitika, alimwi akuba aluumuno lwa mumiyeeyo ndotucana na katucite njelacaamba isalalite. Ici inga camucafwa kutalika alimwi kusebensela Yehova pomwi abashominyinaanu. Mulaakuba anga mBeneklistu bakutaanguna abo mutumwi Pita mbwaakalembela ayi: “Mwakalinga anga nimbelele shakasoweka, sombi bulya mwaboola kuMweembeshi uyo utanjilila buumi bwanu.”—1 Pita 2:25.
Kuboolela kuli Yehova ncintu cibotu abuumbi. Ino ngumulandunshi? Mulakusangalasha moyo wakwe Yehova. (Tushimpi 27:11) Mbuli mbomushi kale shintu nshetucita inga shasangalasha Yehova nabi kumukalasha. Ncakwiila, Yehova taatukakatishiwo kumusuna akumusebensela. (Dutolonomi 30:19, 20) Muntu umwi wakeeya shamu Baibo wakaamba ayi: “Moyo wamuntu inga tookonshi kuucalula na kooli pansengwe. Ulacalwitwa mukati.” Na katusebensela Yehova calusuno cili anga twacalula moyo wesu. Na twacita boobo, tulapa Yehova cipo cibotu abuumbi—kushomeka kwesu—alimwi tulasangalasha moyo wakwe abuumbi. Ncakwiila taakuwo cintu ceenga catuletela lusangalalo lwancinencine kwiinda kupa Yehova bulemu mbwaeelete kutambula.—Milimo ya Batumwi 20:35; Ciyubululo 4:11.
Kwiilika pasheshi, na mwatalika alimwi kulambila kwa Bwineklistu, mulaakucafwikwa lwakumushimu. (Mateyo 5:3) Munshilanshi? Bantu baanji nsengwe yoonse balalipusha ayi, ‘ino ngumulandunshi tuli pano pa cishi?’ Bantu balisuni abuumbi kucana shikumbulo kumiipusho mbuli “Ino buumi bulicite mpindunshi.” Bantu balasunishisha kucana shikumbulo mukwiinga Yehova mbwaakabalenga. Wakatulenga munshila yakwaamba ayi tunoocana lusangalalo na katumusebensela. Kulambila Yehova mukwiinga tulimusuni kulatuletela lusangalalo lutelanishikwi.—Kulumbaisha 63:1-5.
Twamusenga amushibe kwaamba ayi Yehova ulisuni ayi muboolele kuli nguwe. Ino nga mwashiba buyani? Amuyeeyebo: Buloshuwa iyi yakalembwa cakubikila maano abuumbi alimwi akupaililawo. Mpashi wakamuletela ngumunene mulibungano na mushominyinaanu. Lyalo mwakaibelenga, akukonkela nshoyaamba. Ishi shoonse mbumboni butondesha ayi Yehova taakwe kumulubaako. Mubupusano, cakubikila maano ulisuni kwaamba ayi musene pafwaafwi anguwe.—Joni 6:44.
Inga twayuminishikwa na twashiba ayi Yehova talubiiko basebenshi bakwe bakaboolela mwisule. Ishi nshaakesa mukushiba nankashi umwi liina lyakwe, Donna. Wakaamba ayi: “Paniini paniini ndakatalika kuboolela mwisule, sombi liinji ndakalinga kwiibaluka lilembo lya Kulumbaisha 139:23, 24, lyaamba ayi: ‘NobaLesa amunangenange kwaamba ayi mushibe moyo wangu. Amunsuunke kwaamba ayi mushibe miyeeyo yangu. Amubone na ndakonkela nshila shibiibi lyalo muntanjilile munshila yanu yamuyayaya.’ Ndakalinga kucishi ayi ndyeelete kuba mulibunga lyakwe Yehova kuteshi mucishi ici cibiibi—nshina kwelelwawo abuumi bwamucishi. Ndakatalika kuyeeya akubona kwaamba ayi Yehova taakwe kunshiya, cakalinga kusunikibo nkuboolela kuli nguwe. Alimwi ndisangalete abuumbi kwaamba ayi ndakaboola!”
“Ndakatalika kubona kwaamba ayi Yehova taakwe kunshiyawo, cakalinga kusunikibo nkuboolela kuli nguwe alimwi?”
Mupailo wesu wakuswa panshi lya moyo ngwakwaamba ayi andimwe amucane alimwi ‘lusangalalo luswa kuli Yehova.’ (Neyemiya 8:10) Mulaakubona kwaamba ayi kuboolela kuli Yehova teshi kusowabo ciindi sombi ncintu cibotu abuumbi.